Exodus 37

Akqutem Yaassiigan Piliaqumallra

1Bezalel-aam Akqutem Yaassiigek piliaqak murakegtaarnek aturluni, yuinaak malruk tallimanek cipluku (45) cetyaarnek taktalukek, yuinaq malrunlegnek cipluku cetyaarnek (27) iqtutarrlukek, yuinaq-llu malrunlegnek cipluku cetyaarnek (27) qertutarrlukek. 2Qallilirlukek-llu suulutaamek ilutuumakenka, suulutaamek-llu menglelirlukek kassutmun. 3Teguyarirlukek-llu cetamanek kulutnek suulutaanek, nunalgarrluki-llu cetamanun kanagainun malruulukek atunem avategkeni. 4Tegumiaqessuucirlukek-llu murakegtaraagnek acacia-gnek qallilirlukek suulutaamek, 5nuvullukek-llu kulutnun qacarnerani uitalrianun. 6Patulirlukek-llu suulutaarrlainarmek yuinaak malruk tallimanek cipluku (45) cetyaarnek taktarrluku, yuinaq-llu malrunlegnek cetyaarnek (27) iqtutarrluku. 7Malrugnek-llu mulut'uugumalriignek suulutaagnek cherubim-aagnek piliuq, 8atunem patum iquugken pikakegnek, taqlukek-llu patumun ilakliiyullukek. 9An'gilak cherubim-aak atunem caumallutek patum qaingani, yaqugkenka nengingalriik patumaluku.

Estuulum Caliaqumallra Elliiviim Kelipanek Agayutmun

10Estuuluq caliaqaa murakegtaarnek acacia-nek it'ganernek pingayunek taktarrluku, akimiaq pingayunek cipluku cetyaarnek iqtutarrluku, yuinaq-llu malrunlegnek cipluku cetyaarnek (27) qertutarrluku. 11Qallilirluku suulutaamek, suulutaamek-llu menglelirluku. 12Qerrlulirluku pingayunek cetyaarnek iqtutarrluku kassutmun, qerrlua-llu menglelirluku suulutaamek. 13Cetamanek-llu suulutaanek kulutnek pikiurluku, elliluki-llu cetamanun kangirainun kanagain uitallritnun. 14Kulutet uitavigkakek tegumiaqessuutek takellriik ellimaut mengliin yaaqsinrilkiinun. 15Takellriik tegumiaqessuutek piliaqak murakegtaaraagnek acacia-gnek qallilirlukek-llu suulutaamek. 16Qantaliluni-llu suulutaanek estuulum pikainek: saskat, caqut, ilutulriit-llu wine-anun elliitnun assigtarkat.

Kenurrarviit Piliaqumallrat

17Kenurrarviliuq-llu suulutaarrlainarmek, tusngallra napartii-llu suulutaamek mulut'uugumalriamek piliaqlukek; tangnircautai naunraat, tapeqluki naugaaraat, qikmiruarit-llu atauciurnerurrluki. 18Arvinlegnek avayangqerrarkauluni akiqliqellrianek, pingayutaarlutek avategkeni. 19Atauciq avayaq pingayunek tangnircautengqerraqluni naunraruanek elucingqerrluteng almond-aatun pet'ngelriatun naugaarluteng qikmiruarluteng. 20Napartii tangnircautengqerrluni cetamanek naunrarnek almond-aatun elucilegnek naugaariluni qikmiruarluni-llu. 21Naugaaralriartangqerraqluni ataucimek aciat tamarmeng pingayutaaraat avayat. 22Naugaaraat, avayat, kenurrarvik-llu atauciurneruluteng piliaqumaut mulut'uugumalriamek suulutaamek. 23Kenurrarvik atauciq malrunlegnek kenurrarciraa, kenurriurcuutait-llu uqurviit-llu piliaqai suulutaamek. 24Aturluni suulutaamek yuinaat pingayun akimiarmek (75) uspernek, piliaqellrui kenurrarvik aklui-llu.

Piliaqumallra Ekuaviim Tepkegcilriamek

25Ekuavik piliaqaa murakegtaarmek acacia-mek, ekuavigkaq tepkegcilriamek. Yaassiigenqegtuq akimiaq pingayunek cipluku cetyaarnek taktaluni, akimiaq-llu pingayunek cetyaarnek iqtutaluni, ataucimek-llu yaaltamek (1 yard) qertutaluni. Pugumalriit qaingan kangiraini ilakliiyusngaluteng ekuavigmun. 26Qallilirluku-llu qainga, qacarneri, pugumallrit-llu suulutaamek. Menglelirluku-llu suulutaamek kassutmun. 27Malrugnek-llu suulutaagnek kulutegnek ellivikluku akiqliqellrianek mengliin acianun, nuvusngassuutekagkenek muriik ayagatsuutekaan. 28Ayagatsuutekak-llu muriik piliaqak murakegtaaraagnek acacia-gnek, qallilirlukek-llu suulutaamek.

Piliaqumallrak Mingugkam Uqum Tepkegcilriim-llu Aruvagkam

29Kenciknarqellriamek-llu mingugkamek uqumek piliuq, narnirqellriamek-llu aruvagkamek, tepkegcautetun ayuqluku avukusngalriamek.

Currently Selected:

Exodus 37: YPK

Highlight

Copy

Compare