Markus 14
14
Pagisun laꞌat para pu si Isahin
(Mateo 26:1-5; Lukas 22:1-2; Yahiya 11:45-53)
1Na, duwem bahangi pe meke pagkādjaꞌan ēnande Kādjaꞌan Pangessebanin duk kādjaꞌan pagkakande pan gaꞌi sinagetan pasuligin. Meꞌ nakuraꞌ imamin duk meꞌ guru si saraꞌ āgamahin, pinikil-pikil weꞌ de bang saꞌingge paniggewde duk pamapateyde si Isahin duk gaꞌi kataꞌuhan meꞌ aꞌahin. 2“Daꞌa bang baytu kādjaꞌan inin,” paꞌinde, “kaw hewuhalaꞌ meꞌ aꞌahin.”
Pamuꞌus isellan bengngi si kōk si Isahin
(Mateo 26:6-13; Yahiya 12:1-8)
3Na, laꞌi si Isa si Betani. Laꞌi iye mangan si lumaꞌ si Simon, aꞌa bakas inipulin. Manjari sasangde mamanganin, niyaꞌ dende tekka pī magboꞌo isellan bengngi. Pangisihannen batu alabaster hininangin. Isellan bengngi miyaꞌan inēnan narda, gaꞌ lamud-lamudne duk mahalgaꞌ teꞌed. Manjari pinessaꞌ weꞌ dendehin pangisihan isellan bengngihin duk binuꞌusan weꞌ ne isellanin diyataꞌ kōk si Isa. 4Saguwaꞌ niyaꞌ meꞌ aꞌa malaꞌihin astel duk magbissā-bissā siye. “Weꞌey isellan bengngi miyaꞌan pinakaꞌatan sa miyaꞌan?” paꞌinde. 5“Gam pe miyaꞌan pinabellihan labi tellu hatus pilak duk ulinen pangurung si meꞌ mamiskinin.” Hangkan inamāhan teꞌed weꞌ de dendehin. 6Saguwaꞌ paꞌin si Isa si siye, “Pasagadanun bi iye. Weꞌey iye sasewbi? Hāp hininangne si aku inin. 7Peggeꞌ mamiskinin,” paꞌin si Isa, “gaꞌi du usaꞌ amban kaꞌam, duk sumiyan-sumiyan kaꞌam mabayaꞌ, kapanabang kaꞌam si siye. Saguwaꞌ aku, gaꞌi ku teteg tuꞌu si kaꞌam. 8Dende inin, hininang weꞌ ne tageꞌesnen. Inisellanan weꞌ ne andang barankun panyap pangubul akuhin. 9Duk sabennal akahante kaꞌam,” paꞌin si Isa, “antag-antag si tibuꞌukan dunya minahalayak aka-aka mahāpin, inaka-aka du isab tahinang dende si aku inin, pangesseb-ngesseban meꞌ aꞌahin iye.”
Paꞌisun si Judas muddihan si Isa
(Mateo 26:14-16; Lukas 22:3-6)
10Manjari pagubus miyaꞌan, si Judas Iskariyot, dambuwaꞌ si meꞌ tindeg si Isa sampūꞌ duk duwehin, hap pī si meꞌ nakuraꞌ meꞌ imamin supaya tabuddihanne si Isa duk tasōnganne si siye. 11Na, pagkalede pinaꞌin si Judasin, sinna teꞌed siye duk nanggup siye ngurungan iye sīn. Manjari puwas miyaꞌan, miha ne si Judas waktu hāp panōngne si Isa si siye.
Magpanyap disi Isa para si pagjamu-jamuhan Pangessebanin
(Mateo 26:17-19; Lukas 22:7-13)
12Na, taꞌabut ne tagnaꞌ ellew kādjaꞌanin pagkakande pan gaꞌi sinagetan pasuligin. Ellew miyaꞌan subey meꞌ aꞌahin numbaliꞌ anak bili-bili kakande pangessebande pamaluwas Tuhan bangsaden amban kamatey laꞌi si lahat Misil awwalley. Tinilew si Isa weꞌ meꞌ tindegnen, paꞌinde, “Tuwan, antag kami kabayaꞌannu pī manyapan kaꞌu pamanganannu pagkādjaꞌan inin?” 13Dinaꞌak weꞌ si Isa meꞌ tindegnen duwangan duk paꞌinne si siye, “Pī kaꞌam dem puweblo miyaꞌan. Niyaꞌ iyan aꞌa tasampangbi laꞌi magboꞌo komboꞌ isihan boheꞌ. Nuhut kaꞌam iye. 14Duk bang ne iye paꞌasek dem lumaꞌ, paꞌinun bi si dapuꞌ lumaꞌ miyaꞌan, ‘Dinaꞌak kew tinilew weꞌ guruhin bang antag koꞌ bilik pagjamu-jamuhanne duk meꞌ tindegnen para si Kādjaꞌan Pangessebanin.’ 15Manjari niyaꞌ iyan pakitehanne kaꞌam bilik luha laꞌi diyataꞌ lumaꞌ,” paꞌin si Isa. “Andang ne panyap bilik miyaꞌan. Laꞌi ne kaꞌam maghatul kinakanten bi.” 16Manjari lumengngan ne meꞌ tindegne duwanganin pī si puweblo duk takitede laꞌi sa pangaka si Isa siyehin. Duk maghatul ne siye laꞌi para si pagjamu-jamuhan Pangessebanin.
Tamanan pamangan si Isa duk meꞌ tindegnen
(Mateo 26:20-30; Lukas 22:14-20; Yahiya 13:21-30; 1 Korinto 11:23-25)
17Pagsangem ne, hap pī ne si Isa si lumaꞌ miyaꞌan magtuhut duk tindegne sampūꞌ duk duwehin. 18Sasangde ningkoloꞌ si lamisahan magkakan, paꞌin si Isa si meꞌ tindegnen, “Sabennal akahante kaꞌam, niyaꞌ dangan si kaꞌam muddihan aku, saweꞌku magtuhut mangan.” 19Magtawus siye dukka duk maggantiꞌ siye nilew iye. Paꞌin dangan-dangan, “Bugtuꞌ dumaꞌin aku, Tuwan, ēꞌ?” 20Nambung si Isa, paꞌinne, “Mamuddihan akuhin dangan kaꞌam duk magsawu kami mangan si dambuwaꞌ pinggan. 21Aku inin, Anak Manusiyaꞌin,” paꞌin si Isa, “matey du ku peggeꞌ iye iyan gantaꞌankun sa sinulat dem kitabin. Saguwaꞌ makaꞌaseꞌ-aseꞌ teꞌed aꞌa mamuddihan Anak Manusiyaꞌin. Gam pe aꞌa miyaꞌan gaꞌ inanakan.”
22Sasangde mamanganin, ngeddoꞌ si Isa pan duk pagubus iye magpasalamat si Tuhan, kinepak-kepak weꞌ ne bu pinangurung weꞌ ne si siye. Paꞌinne, “Ngeddoꞌ kaꞌam. Pan inin barankun.” 23Manjari ngeddoꞌ iye sawan duk pagubus iye magpasalamat si Tuhan, pinangurung weꞌ ne si siye duk nginum siye kēmon. 24Paꞌin si Isa si siye, “Inin lahaꞌkun sōng buꞌus sabab meꞌ aꞌa ekka. Inin tandaꞌ weꞌ tumanan Tuhanin du janjiꞌnen. 25Sabennal akahante kaꞌam, puwas inin gaꞌi ne ku nginum boheꞌ ubas balik samantaꞌan gaꞌi pe ku nginum ininum baꞌahuhin dem pagbayaꞌan Tuhanin.” 26Manjari ngalang siye dambuwaꞌ kalangan pamudji Tuhan, ubus bu paluwas ne siye pī si kūd Jaitun.
Pinaꞌal pamasuwey si Petrosin
(Mateo 26:31-35; Lukas 22:31-34; Yahiya 13:36-38)
27Paꞌin si Isa si siye, “Kēmon kaꞌam, ambananbi du ku. Peggeꞌ tasulat inin dem kitab, pinaꞌin, ‘Daꞌakku pinapatey magbantey bili-bilihin, manjari meꞌ bili-bilinen magkanat-kanat.’ 28Saguwaꞌ pagellum ne ku balik, magkasuwaꞌ du kite bi. Padehellu ku amban kaꞌam pī si lahat Jalil.” 29Manjari paꞌin si Petros si iye, “Bisan kēmon siye ngambanan kaꞌu, Tuwan, saguwaꞌ aku, asal gaꞌi kew ambananku.” 30Paꞌin si Isa si iye, “Sabennal akahante kew, sangem inin du, gaꞌi pe manukin makatingkowak minduwe, kapamasuwey ne kew mintellu weꞌ gaꞌi ku kataꞌuhannu.” 31Saguwaꞌ pasōng si Petros missā pinamuwakkad, paꞌinne, “Bisan pe ku matey patuhut si kaꞌu, asal gaꞌi kew teꞌed pasuweyanku.” Duk kēmon siye, inin isab binissāden.
Si Isa ngampun si Tuhan laꞌi si kabbun Getsemane
(Mateo 26:36-46; Lukas 22:39-46)
32Manjari palanjal siye pī si kabbun inēnan Getsemane. Paꞌin si Isa si meꞌ tindegnen, “Ningkoloꞌ kaꞌam tuꞌu tiggelanku laꞌi māku-māku si Tuhan.” 33Duk binoꞌo weꞌ ne si Petros duk si Yakub duk si Yahiya. Nagnaꞌ iye kebba-kebbahan duk sasew dem ateynen. 34Manjari paꞌinne si siye, “Ateykun dukka teꞌed, agen-agen makamatey aku. Paꞌamban ne kaꞌam tuꞌu duk magjaga kaꞌam.”
35Manjari lumengngan iye patala-tala duk pasujud iye diyataꞌ bulak duk ngampun iye si Tuhan weꞌ bang makajari gaꞌi pinaꞌantag si iye kabinasahan sōng matekka si iyehin. 36Duk paꞌinne, “O Ammaꞌ, kēmon tahinangnu. Bang kew mabayaꞌ daꞌa ku pasagadanun bininasa. Saguwaꞌ dumaꞌin tinuhutin kinabayaꞌankun, saguwaꞌ kinabayaꞌannun.”
37Manjari balik iye pī si meꞌ tindegnen duk takitene siye kapatuli. Paꞌinne pu si Petros, “O, Simon, tuli kew? Gaꞌi kew kapagjaga bisan da ora? 38Papateng-pateng kaꞌam duk māku-māku kaꞌam si Tuhan supaya kaꞌam gaꞌi taboꞌo weꞌ sassat. Tapikil weꞌ atey saguwaꞌ gaꞌi kaꞌanggawtaꞌan weꞌ baran.”
39Manjari tahalaꞌ ne isab si Isa duk māku-māku iye, binalik weꞌ ne bakas binissāne si Samanen. 40Ubus balik ne isab iye pī si meꞌ tindegnen duk takitene siye kapatuli peggeꞌ kinaruꞌ teꞌed siye. Gaꞌi kataꞌuhande bang ine panambungde si Isahin.
41Pagbalik si Isa kamintellunen, paꞌinne si siye, “Tuli pe kaꞌam duk pahali pe? Sarang ne iyan. Tekka ne waktuhin. Aku, Anak Manusiyaꞌin, sōng sinōngan ne si antanan meꞌ aꞌa dusehan. 42Kuwat kaꞌam, sūng ne kite bi. Payamanun bi, tiyaꞌ ne aꞌa mamuddihan akuhin.”
Paniggew pu si Isahin
(Mateo 26:47-56; Lukas 22:47-53; Yahiya 18:3-12)
43Manjari sasang si Isa pe mamissāhin, tekka si Judas. Dambuwaꞌ iye si meꞌ sampūꞌ duk duwe tindeg si Isahin. Banes teꞌed aꞌa nuhut si Judas magbarung duk magboꞌo meꞌ kakakal. Siye miyaꞌan dinaꞌak pī weꞌ meꞌ nakuraꞌ imamin duk meꞌ guru si saraꞌ āgamahin duk meꞌ kabahiꞌanin. 44Kaꞌurungan siye indan weꞌ si Judas. Bakas paꞌinne hep si siye, “Sine-sine ūkku, iye ne iyan aꞌahin. Siggewun bi iye duk boꞌohun bi tahalaꞌ duk banteyanun bi pinahāp-hāp.”
45Manjari pagtekkade laꞌi, magtawus si Judas patapit pu si Isa duk paꞌinne, “Tuwan.” Bu inūk si Isa weꞌ ne. 46Manjari siniggew ne si Isa weꞌ de duk inantan weꞌ de pahaget. 47Saguwaꞌ niyaꞌ dambuwaꞌ meꞌ magtengge matapitin, ngurus barungnen duk pineddang weꞌ ne daraꞌakan imam nakuraꞌin, duk butas tayingenen. 48Manjari paꞌin si Isa si meꞌ maniggew iyehin, “Weꞌ kannalbi mundu ku hangkan kaꞌam pitu niggew aku magbarung duk magboꞌo meꞌ kakakal? 49Ellew-ellew laꞌi ku magusihat dem langgal hadje. Laꞌi du kaꞌam saguwaꞌ gaꞌ ku siggewbi laꞌi. Saguwaꞌ,” paꞌinne, “subey katumanan kēmon tasulat dem kitabin.” 50Manjari kēmon tindeg si Isahin nayikutan iye duk lahi siye.
51Manjari niyaꞌ isab laꞌi dambuwaꞌ subul patuhut pu si Isa. Magdikat hadja iye. Sōng isab iye siniggew weꞌ de. 52Saguwaꞌ inambanan weꞌ ne dikatnen duk magubas iye magkuwantang.
Si Isa si harapan meꞌ kakunsihalanin
(Mateo 26:57-68; Lukas 22:54-55, 63-71; Yahiya 18:13-14, 19-24)
53Manjari binoꞌo weꞌ de si Isa pī si lumaꞌ imam nakuraꞌin. Duk magtipun isab laꞌi kēmon nakuraꞌ imamin duk meꞌ kabahiꞌanin duk meꞌ guru si saraꞌ āgamahin. 54Na, si Petros paturul pu si Isa saguwaꞌ patala-tala, sampay pī diyalem lame lumaꞌ imam nakuraꞌin. Ningkoloꞌ iye duk meꞌ guwaldiyahin si bihing ebbut ngindāng.
55Manjari meꞌ nakuraꞌ imamin duk meꞌ kakunsihalanin miha pureba panuntutande si Isa supaya iye tapapateyde. Saguwaꞌ gaꞌ niyaꞌ kasuwaꞌde panuntutande iye. 56Ekka naksiꞌ kuntara pu si Isa saguwaꞌ gaꞌi bennal duk gaꞌi maguyun meꞌ bissāden.
57Ubus niyaꞌ sinduwe kuwat naksiꞌ kuntara pu si Isa gaꞌi du isab bennal. 58Paꞌinde, “Bakas takale kami aꞌa inin magpaꞌin weꞌ larakne koꞌ langgal mahadjehin, hininang weꞌ manusiyaꞌ, duk dem tellu ellew matengge koꞌ iye seddili saguwaꞌ dumaꞌin aꞌa mangahinang iyehin.” 59Saguwaꞌ bisan pe kuweꞌ miyaꞌan panaksiꞌden, gaꞌ du maguyun meꞌ bissāden.
60Manjari nengge imam nakuraꞌin laꞌi si tengngaꞌde nilew si Isa. Paꞌinne, “Gaꞌ niyaꞌ sambungnu si meꞌ tuntutde si kaꞌu inin?” 61Saguwaꞌ gaꞌ si Isa nambung. Manjari tinilew iye balik weꞌ iman nakuraꞌin, paꞌinne, “Kaꞌu ne ke Almasihin, Anak Tuhanin?” 62“Aku ne,” sambung si Isahin. “Duk kitebi du ku iyan, aku, Anak Manusiyaꞌin, ningkoloꞌ si kanawanan Tuhan Mabalakatanin. Duk kitebi du ku iyan pitu magtuhut duk meꞌ inalak amban diyataꞌ langit.” 63Manjari ginaret weꞌ imam nakuraꞌin semmeknen hawal peddiꞌ ateynen. Duk paꞌinne, “Weꞌey pe kite bi subey miha meꞌ saksiꞌ? 64Takalebi ne binissāne miyaꞌan, kuweꞌ Tuhanin iye. Ine hukumanbin?” Paꞌinde kēmon, “Hukuman kamihin weꞌ subey iye pinapatey.”
65Manjari sinduwe meꞌ aꞌahin nagnaꞌ ngaluraꞌan iye. Binennesan isab weꞌ de luwenen duk pinagsuntukan iye weꞌ de. Paꞌinde si iye, “Na, untukun koꞌ, sine manuntuk kaꞌuhin.” Duk sinampak isab iye weꞌ meꞌ guwaldiyahin pangeddoꞌde iyehin.
Masuwey si Petros weꞌ gaꞌi kataꞌuhanne si Isa
(Mateo 26:69-75; Lukas 22:56-62; Yahiya 18:15-18, 25-27)
66Manjari sasang si Petros laꞌi si lame, niyaꞌ dambuwaꞌ dende daraꞌakan imam nakuraꞌin hap pī laꞌi. 67Pagkitene si Petros ngindāng, dinendengan teꞌed iye weꞌ ne duk paꞌinne, “Oy, kaꞌu isab bakas saweꞌ aꞌa Nasaret miyaꞌan, si Isa.” 68Saguwaꞌ masuwey si Petros, paꞌinne, “Gaꞌi kataꞌuhanku duk gaꞌi tasabutku bang ine binissānu iyan.” Duk magtawus iye tahalaꞌ tudju tarangka. Manjari ningkowak manukin. 69Takite ne isab iye balik weꞌ dende daraꞌakan miyaꞌan duk paꞌin dendehin si meꞌ aꞌa magtengge malaꞌihin, “Aꞌa miyaꞌan saweꞌde isab.” 70Saguwaꞌ masuwey ne isab si Petros. Gaꞌ du tiggel, meꞌ aꞌa magtengge malaꞌihin magpaꞌin pu si Petros, “Gaꞌi kew kapamasuwey weꞌ dumaꞌin kew saweꞌde peggeꞌ aꞌa Jalil du kew isab.” 71Saguwaꞌ nuknaꞌan si Petros dinen duk napa iye. Paꞌinne, “Asal gaꞌi kataꞌuhanku aꞌa pagbissābi iyan.” 72Magtawus tingkowak manukin. Kaminduwenen ne inin. Manjari taꞌesseb weꞌ si Petros bakas pinaꞌin si Isa si iyehin, “Gaꞌi pe makatingkowak manukin minduwe, kapamasuwey ne kew mintellu weꞌ gaꞌi ku kataꞌuhannu.” Sakaliꞌ tapikil si Petros inin, magtangis iye.
Currently Selected:
Markus 14: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.