Markus 13
13
Pinaꞌal weꞌ si Isa pamagkaꞌat langgal hadjehin
(Mateo 24:1-2; Lukas 21:5-6)
1Manjari sābu si Isa paluwas amban langgal mahadjehin, dambuwaꞌ meꞌ tindegnen nambat, paꞌinne, “Uy, Tuwan. Makasinna-sinna pahāp meꞌ batu hinang langgal inin. Asal hāp teꞌed bantuk langgal inin.” 2Paꞌin si Isa si siye, “Langgal mahadje inin ujud hebbaꞌ du. Niyaꞌ ellew si pasōngan, gaꞌ du iyan niyaꞌ talebbi tuꞌu meꞌ batu magbangkat-bangkat iyan, saguwaꞌ kēmon kinanat-kanat du.”
Meꞌ kasasewan duk kabinasahan
(Mateo 24:3-14; Lukas 21:7-19)
3Manjari sasang si Isa ningkoloꞌ si kūd Jaitun paharap tudju langgal hadjehin, hap pī si iye si Petros duk si Yakub duk Yahiya duk Andariyas, siye-siye hadja. 4Tinilew si Isa weꞌ de, paꞌinde, “Akahanun kami, sumiyan umantag meꞌ pinaꞌinnu miyaꞌan? Ine tandaꞌ mapaguwaꞌin bang sōng ne umantag meꞌ kēmon miyaꞌan?”
5Paꞌin si Isa si siye, “Pahatul-hatul kaꞌam duk kaꞌam gaꞌi kaꞌakkalan. 6Peggeꞌ ekka iyan pitu magēnan ēnkun duk magpaꞌin weꞌ siye ne Almasihin. Duk ekka iyan kaꞌakkalande. 7Duk bang kaꞌam makakale sabab magbonoꞌ dem lahat, atawa suwi-suwi sabab magbonoꞌ si meꞌ lahat tala, daꞌa kaꞌam tinalew. Kēmon inin subey umantag saguwaꞌ dumaꞌin pe inin ellew kiyamat. 8Peggeꞌ dambuwaꞌ bangsa,” paꞌin si Isa, “magbonoꞌ iyan duk bangsa seddili. Duk dambuwaꞌ pagsultanan magbonoꞌ iyan duk pagsultanan seddili. Duk niyaꞌ iyan meꞌ linug si meꞌ kalahat-lahatan si dunya duk niyaꞌ unus si meꞌ kalahatan. Saguwaꞌ inin panagnaꞌan meꞌ katiksaꞌan si dunyahin hadja. Kēmon inin, dalil dende sōng nganak duk nagnaꞌ peddiꞌan ne.
9“Subey kaꞌam pahatul-hatul si dibi,” paꞌin si Isa. “Peggeꞌ sōngan meꞌ aꞌa du kaꞌam iyan si meꞌ hukum duk paglubakande kaꞌam dem meꞌ langgal. Niyaꞌ ellew si pasōngan, nengge du isab kaꞌam iyan si harapan meꞌ gubnul duk meꞌ sultan peggeꞌ nuhut kaꞌam aku duk taꞌakabi ne si siye aka-aka mahāp sabab akuhin. 10Peggeꞌ meke kiyamat dunyahin, subey dahuꞌ aka-aka mahāpin pinasampay si kēmon kabangsa-bangsahan,” paꞌin si Isa. 11“Na, bang kaꞌam siniggew duk boꞌode binistiga, daꞌa kaꞌam magsuse andang bang ine binissābin pamēbbegbi dibin. Saguwaꞌ bissāhun bi ine-ine pangurung si kaꞌam si waktu miyaꞌan, peggeꞌ dumaꞌin amban kaꞌam binissābin saguwaꞌ amban Niyawa Sutsihin. 12Si pasōngan,” paꞌinne, “niyaꞌ iyan meꞌ aꞌa, sōngan meꞌ pungtinaꞌiden siye dinaꞌak pinapatey. Niyaꞌ isab iyan meꞌ anak, sōngan samaden siye dinaꞌak pinapatey. Duk meꞌ anakin bantahande matettoꞌaden duk daꞌakde matettoꞌaden pinapatey. 13Duk kaꞌam meꞌ tindegkun,” paꞌin si Isa, “kabunsihan du kaꞌam weꞌ kēmon aꞌa peggeꞌ nuhut kaꞌam aku. Saguwaꞌ sine-sine nandal sampay si tamanan kabinasahan inin, taga umul du si surgaꞌ gaꞌ niyaꞌ tamananne.”
Katiksaꞌan manggaꞌ niyaꞌ saliꞌnen
(Mateo 24:15-28; Lukas 21:20-24)
14“Na, si pasōngan, niyaꞌ iyan takitebi makapagkaꞌat duk ngandiyawaꞌan Tuhanin laꞌi si antag gaꞌi patut palaꞌihannen. Bang takitebi inin subey ne meꞌ aꞌa malaꞌi si Yahudiyahin lahi pī si meꞌ kapunuhan. (Ambat mamatsa inin sabutanne.) 15Duk bang niyaꞌ aꞌa si luwasan lumaꞌne, subey ne iye gaꞌi padiyalem ngeddoꞌ ine-ine, saguwaꞌ subey ne iye lahi. 16Duk malaꞌi si tanaꞌnen subey ne gaꞌi balik pī si lumaꞌne ngeddoꞌ meꞌ semmeknen. 17Andūꞌ, makaꞌaseꞌ-aseꞌ meꞌ mabettengin duk meꞌ maganak dikiꞌin laꞌi si meꞌ ellew īꞌ. 18Māku-māku kaꞌam si Tuhan karayaw gaꞌi du inin umantag si tempo gaꞌi hap lahatin. 19Peggeꞌ si meꞌ ellew īꞌ,” paꞌin si Isa, “niyaꞌ iyan katiksaꞌan hadje, gaꞌ niyaꞌ saliꞌne kemuwe tagnaꞌ pinapanjari weꞌ Tuhanin dunyahin sampay kuweꞌitu. Duk puwas inin, gaꞌi ne teꞌed kabalikan. 20Duk bang gaꞌi kulangan Tuhanin meꞌ ellew katiksaꞌan īꞌ,” paꞌin si Isa, “gaꞌ niyaꞌ aꞌa ellum. Saguwaꞌ sabab meꞌ aꞌa tapeneꞌnen, meꞌ aꞌa manuhut iyehin, kulangan Tuhanin du meꞌ ellew īꞌ.
21“Duk bang niyaꞌ si ellew īꞌ magpaꞌin si kaꞌam, ‘O, payamanun bi, tiyaꞌ Almasihin!’ atawa ‘Payamanun bi, īꞌ iye laꞌi!’ - daꞌa teꞌed kahagadun bi. 22Peggeꞌ si meꞌ ellew īꞌ, niyaꞌ iyan paguwaꞌ meꞌ aꞌa magpaꞌin weꞌ Almasihin siye bu gaꞌi bennal. Niyaꞌ isab iyan meꞌ aꞌa magpaꞌin weꞌ nabi siye bu gaꞌi toꞌo. Duk magpakite siye iyan meꞌ tandaꞌ duk meꞌ hinangan makaꞌulaliꞌ supaya bang makajari, taboꞌode pasapeꞌ meꞌ aꞌa tapeneꞌ Tuhanin. 23Saguwaꞌ subey kaꞌam papateng-pateng,” paꞌin si Isa. “Bakas ne kaꞌam akahanku andang sabab meꞌ inin pādpād gaꞌ pe umantag.”
Papitu Anak Manusiyaꞌin
(Mateo 24:29-31; Lukas 21:25-28)
24“Manjari si meꞌ ellew īꞌ,” paꞌin si Isa, “pagubus meꞌ katiksaꞌan miyaꞌan, ngalindem mata ellewin, duk bulanin gaꞌi ne dantaꞌ. 25Meꞌ poteꞌanin magkalaboꞌ-laboꞌ amban diyataꞌ langit duk meꞌ bayuꞌan diyataꞌ langitin tahalaꞌ amban lugalden. 26Manjari pagubus inin, kitede du ku, Anak Manusiyaꞌin, pitu dem inalak. Takite meꞌ aꞌahin du sahayakun duk balakatku mahadjehin. 27Duk daꞌakku du pitu meꞌ malaꞌikatin nipun meꞌ aꞌa tapeneꞌkun amban kaꞌampat pidjū alamin.”
Pamintangan si poꞌon kayuhin
(Mateo 24:32-35; Lukas 21:29-33)
28“Pandogahanun bi kayu igirahin,” paꞌin si Isa. “Bang numbuꞌ meꞌ dawennen, kataꞌuhanbi weꞌ sōng baytu panas ne. 29Damikkiyan isab, bang takitebi umantag ne meꞌ pinaꞌinku miyaꞌan, kataꞌuhanbi weꞌ asal tapit ne teꞌed pabalikkun. 30Sabennal akahante kaꞌam,” paꞌin si Isa, “gaꞌi pe ubus matey kēmon aꞌa maꞌellum kuweꞌitu inin, tekka ne meꞌ bakas pinaꞌinku inin. 31Palabey hadja langitin duk dunyahin, saguwaꞌ bang bissākun asal gaꞌi usaꞌ.”
Gaꞌi kataꞌuhan waktunen
(Mateo 24:36-44)
32“Saguwaꞌ gaꞌ niyaꞌ ngataꞌu bang ellew ine atawa waktu ine papituku balik si pasōnganin. Bisan meꞌ malaꞌikat si surgaꞌin gaꞌi kataꞌuhande. Bisan aku, Anak Tuhanin, gaꞌi du isab kataꞌuhanku. Luwal Samaku Tuhanin mangataꞌuhin. 33Hangkan papateng-pateng kaꞌam,” paꞌin si Isa. “Daꞌa kaꞌam lipat peggeꞌ gaꞌi kataꞌuhanbi bang sumiyan inin umantag. 34Dalilne inin, dambuwaꞌ aꞌa lumengngan hap lahat seddili. Sōng patahalaꞌnen, pinangandel weꞌ ne lumaꞌnen si meꞌ daraꞌakannen. Inurungan siye dangan-dangan hinangden. Duk tungguꞌ gawangin daꞌakne gaꞌi lipat. 35Hangkan hep,” paꞌin si Isa, “daꞌa kaꞌam lipat peggeꞌ gaꞌi kataꞌuhanbi bang sumiyan tekka dapuꞌ lumaꞌin. Bang magalib ke, atawa tengaꞌ bahangi ke, atawa dayiꞌ ellew ke, atawa salung ke. 36Peggeꞌ kaw iye bessuwang tekka duk tasaꞌutne kaꞌam tuli. 37Na, pinaꞌinku si kaꞌam inin, paꞌinku isab si kēmon aꞌa: Daꞌa teꞌed kaꞌam lipat.”
Currently Selected:
Markus 13: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.