1 Korinto 14

Sabab meꞌ kapandeyan pangurung Niyawa Tuhanin

1Iye subey inapasbi teꞌedin, malasa si pagkasibi. Duk subey isab kaꞌam ngapas meꞌ kapandeyan amban Niyawa Tuhanin, lagiꞌ ne kapandeyan magpalataꞌ bissā Tuhanin. 2Bang niyaꞌ aꞌa missā si bissāhan manggaꞌi tasabut weꞌ meꞌ aꞌahin, pamissāhannen Tuhanin duk dumaꞌin meꞌ saweꞌnen peggeꞌ gaꞌi tahātide binissānen. Pinabissā iye weꞌ Niyawa Tuhanin saguwaꞌ kuweꞌ tinapukan bissānen peggeꞌ gaꞌ niyaꞌ makahātine. 3Saguwaꞌ aꞌa magpalataꞌ bissā Tuhanin missā iye si meꞌ saweꞌnen, hangkan makabasag sandelden duk makaꞌasig ateyden duk makapahemokan siye. 4Aꞌa mamissā si bissāhan manggaꞌi tasabut weꞌ meꞌ aꞌahin, ateynen hadja inasignen, saguwaꞌ aꞌa magpalataꞌ bissā Tuhanin, asig weꞌ ne atey kēmon meꞌ pagkasine masandel pu si Isa Almasihin.

5Kabayaꞌankun weꞌ kēmon kaꞌam kapamissā si bissāhan manggaꞌi tasabut weꞌ meꞌ aꞌahin. Saguwaꞌ pasōng hāp bang kaꞌam kēmon kaꞌurungan kapandeyan magpalataꞌ bissā Tuhanin peggeꞌ pasōng kagunahan aꞌa magpalataꞌ bissā Tuhanin amban aꞌa mamissā si meꞌ bissāhan seddilihin. Saliꞌ-saliꞌ kagunahanden basta niyaꞌ du laꞌi magpahāti meꞌ binissānen supaya ngaꞌasig atey kēmon meꞌ masandel pu si Isa Almasihin. 6Na, meꞌ kapungtinaꞌihanku, bang upama piyu ku si kaꞌam bu missā ku si kaꞌam si bissāhan seddili gaꞌi tahātibi, ine kagunahannen? Gaꞌ du niyaꞌ. Saguwaꞌ bang ku missā si kaꞌam sabab meꞌ pinakataꞌu Tuhan si akuhin atawa sabab meꞌ kinataꞌuhanku sabab Tuhanin atawa bang ku missā meꞌ pinabissā si aku weꞌ Tuhanin, atawa magusihat si kaꞌam, na, iyan niyaꞌ kagunahanne si kaꞌam.

7Na, upama, bang niyaꞌ aꞌa magsuling atawa magkulaꞌing, gaꞌi tapagngale meꞌ aꞌahin bang luguꞌ ine miyaꞌan bang gaꞌi pastiꞌ hellingnen. 8Bang upama isab aꞌahin nitik agung makabaluꞌ bu gaꞌi tewwaꞌ panitikne agungin, na, gaꞌi tahāti meꞌ aꞌa makakalehin bang ine hāti panitikne agung miyaꞌan hangkan gaꞌi siye baluꞌ. 9Damikkiyan isab kaꞌam bang kaꞌam missā bu gaꞌi pastiꞌ, gaꞌi kataꞌuhan meꞌ aꞌahin bang ine pinaꞌinbin. Kuweꞌ baliyu hadja si tayingede. 10Ekka bayuꞌ-bayuꞌan bissāhan si dunya duk kēmon taga hāti. 11Saguwaꞌ bang niyaꞌ aꞌa missā si aku bu gaꞌi kataꞌuhanku bissānen, kuweꞌ du iye aꞌa paliyu-liyu si aku duk aku isab kuweꞌ aꞌa paliyu-liyu si iye, gaꞌi kami magsinabut. 12Na, peggeꞌ mabayaꞌ teꞌed kaꞌam weꞌ kaꞌurungan kaꞌam kapandeyan weꞌ Niyawa Tuhanin, subey gunahun bi teꞌed meꞌ kapandeyan makabasag sandel meꞌ masandel pu si Isa Almasihin.

13Hangkan hep aꞌa makabissā si bissāhan gaꞌi tasabut weꞌ meꞌ aꞌahin, subey isab iye māku-māku weꞌ urungan Tuhanin du iye kapandeyan magpahāti meꞌ bakas binissānen. 14Peggeꞌ bang ku ngampun si bissāhan gaꞌi tasabut weꞌ meꞌ aꞌahin, toꞌo, ngampun ku amban dem ateyku saguwaꞌ gaꞌi taboꞌo pikilankun. 15Na, ine subey hininangkun? Hinangku kaduwe bayuꞌ. Ngampun ku si bissāhan gaꞌi tasabut weꞌ meꞌ aꞌahin duk ngampun ku isab si bissāhan tahāti meꞌ aꞌahin. Damikkiyan isab nganta ku si bissāhan gaꞌi tasabut weꞌ meꞌ aꞌahin duk nganta ku isab si bissāhan tahāti meꞌ aꞌahin. 16Bang upama magpasalamat kaꞌam si Tuhan si bissāhan seddili hadja gaꞌi tasabut weꞌ meꞌ aꞌahin, sinduwe maluꞌu si pagtipunanbin gaꞌi padūs si kaꞌam magpasalamat si Tuhan peggeꞌ gaꞌi tahātide pinaꞌinbin. 17Bisan pe saꞌingge kahāp pagsalamatbin, gaꞌi du makabasag sandel meꞌ aꞌahin peggeꞌ gaꞌi tasabutde.

18Magsukul ku si Tuhan weꞌ inurungan ku kapandeyan missā si bissāhan manggaꞌi tasabut weꞌ meꞌ aꞌahin, pasōng pe amban kaꞌam kēmon. 19Saguwaꞌ bang dem pagtipunan meꞌ masandel pu si Isa Almasihin, peneꞌku pe missā lime tegtang hadja basta tasabut meꞌ aꞌahin supaya siye taꞌusihatanku, amban missā ku ibuhan tegtang si bissāhan manggaꞌi tasabut weꞌ meꞌ aꞌahin.

20Meꞌ kapungtinaꞌihanku, daꞌa kaꞌam magpikil kuweꞌ pamikil nakanak dikiꞌin. Bang pasal malaꞌatin, subey kaꞌam kuweꞌ nakanak baꞌahu inanakanin peggeꞌ gaꞌi siye magpikil meꞌ malaꞌatin. Saguwaꞌ bang pasal meꞌ bakas pinaꞌinku si kaꞌam sabab meꞌ kapandeyan amban Tuhanin, subey pamikilbin pamikil aꞌa bahiꞌ. 21Tasulat hep dem kitab pinaꞌin Tuhanin, paꞌinne,

“Mapiyu ku si kaꞌam meꞌ aꞌa bissāhanden seddili peggeꞌ meꞌ aꞌa paliyu-liyu siye. Pabissāku siye si kaꞌam. Saguwaꞌ masi ku gaꞌi kahagadbi.”

22Manjari, kapandeyan magbissā si bissāhan seddilihin tandaꞌ pamakite balakat Tuhanin si meꞌ manggaꞌi makahagad pu si Isa Almasihin, dumaꞌin tandaꞌ si meꞌ makahagadin ne. Saguwaꞌ kapandeyan magpalataꞌ bissā Tuhanin, tandaꞌ pamakite balakat Tuhanin si meꞌ makahagadin, dumaꞌin tandaꞌ si meꞌ manggaꞌi makahagadin.

23Hangkan hep bang upama magtipun kaꞌam kēmon meꞌ masandel pu si Isa Almasihin bu kēmon kaꞌam missā si bissāhan gaꞌi tasabut weꞌ meꞌ aꞌahin, bang niyaꞌ piyu si pagtipunanbi meꞌ aꞌa seddili atawa meꞌ aꞌa gaꞌi kahagad pu si Isa Almasi, na, paꞌinde iyan weꞌ binalew ne kaꞌam peggeꞌ gaꞌi tahātide bissābin. 24-25Saguwaꞌ bang kēmon kaꞌam magpalataꞌ bissā Tuhanin bu niyaꞌ padiyalem piyu aꞌa gaꞌi pe kahagad pu si Isa Almasi atawa aꞌa seddili, pagkalene bissā Tuhan pinalataꞌbin, kataꞌuhanne weꞌ dusehan iye duk talep iye ilegga peggeꞌ pahāti Tuhanin dem ateyne kēmon meꞌ bakas hinanganne malaꞌatin. Manjari pasujud du aꞌa miyaꞌan ngisbat si Tuhan duk magbennal iye weꞌ asal luꞌu Tuhanin si diyalemanbi.

Kēmon hinangan dem langgalin subey pinahatul-hatul

26Iye ne miyaꞌan, meꞌ kapungtinaꞌihanku, bang kaꞌam meꞌ masandel pu si Isa Almasihin magtipun, hāp bang niyaꞌ kaꞌam nganta pamudjibi Tuhanin, duk niyaꞌ isab magusihat, bu niyaꞌ isab magaka bakas pinakitaꞌu Tuhan si iyehin, niyaꞌ isab missā si bissāhan gaꞌi tasabut weꞌ meꞌ aꞌahin, duk niyaꞌ isab magpahāti meꞌ bakas binissā si bissāhan seddili miyaꞌan. Kēmon hininangbin sābubi magtipunin, subey makabasag sandelbi pu si Isa Almasihin. 27Bang niyaꞌ luꞌu mabayaꞌ missā si bissāhan gaꞌi tasabut weꞌ meꞌ aꞌahin, taman duwangan atawa tellungan hadja makajari mamissāhin maggantiꞌ-gantiꞌ. Duk subey niyaꞌ magpahāti bakas binissāde miyaꞌan. 28Saguwaꞌ bang gaꞌ niyaꞌ luꞌu taꞌu magpahāti, na, daꞌa ne siye missā si bissāhan seddili luꞌu dem pagtipunanbi. Makajari iye missā si dine duk si Tuhan. 29Meꞌ mabayaꞌ magpalataꞌ bissā Tuhanin isab, hāp bang taman duwangan atawa tellungan mamissāhin maggantiꞌ-gantiꞌ duk sinduwehin pakale hadja bang kēmon binissāden asal amban Niyawa Tuhanin. 30Saguwaꞌ bang upama dangan meꞌ mapakalehin bessuwang makasangka bissā amban Tuhan, subey ne padeheng mamissāhin duk pagantiꞌ isab missā dambuwaꞌ miyaꞌan. 31Bang kuweꞌ inin hinanganbin, makajari kaꞌam kēmon maggantiꞌ-gantiꞌ malataꞌ bissā Tuhanin supaya kaꞌam kēmon katoloꞌan duk ngaꞌasig ateybin. 32Aꞌa magpalataꞌ bissā Tuhanin kapagbayaꞌ si dine bang missā ke iye atawa gaꞌi. 33Gaꞌi bayaꞌ Tuhanin bang sasew dem pagtipunanten bi saguwaꞌ kabayaꞌannen weꞌ magsulut-sulut kite bi.

Duk iye addat si meꞌ pagtipunan meꞌ masandel pu si Isa Almasi si meꞌ kalahat-lahatanin, 34meꞌ dendehin subey patemmen sābude dem pagtipunanin. Gaꞌi siye makajari palamud magsuꞌal duk meꞌ lellahin peggeꞌ paꞌin kitabin weꞌ gaꞌi makajari dendehin palangkew amban lellahin. 35Bang niyaꞌ bayaꞌ tilewde, ambat tilewde elladen pagtekka siye si lumaꞌ. Gaꞌi talep dendehin missā dem pagtipunan meꞌ masandel pu si Isa Almasihin.

36Hatu gaꞌi kahagadbi pinaꞌinku miyaꞌan. Weꞌ kannalbi, kaꞌam meꞌ aꞌa Korintohin, amban kaꞌam paguwaꞌan lapal Tuhanin? Atawa kannalbi, weꞌ kaꞌam hadja meꞌ aꞌa kaꞌusihatan lapal Tuhanin? 37Bang niyaꞌ luꞌu aꞌa magpaꞌin weꞌ kaꞌurungan iye kapandeyan magpalataꞌ bissā Tuhanin atawa weꞌ asal niyaꞌ kapandeyan seddili pinangurung weꞌ Niyawa Tuhanin si iye, subey tahāti aꞌa iyan weꞌ meꞌ sinulatku inin pangandaꞌakan Isa Almasi, Panuhutanten bi. 38Bang gaꞌi asipne pinaꞌinku inin, daꞌa isab iye asipun bi.

39Manjari, meꞌ kapungtinaꞌihanku, subey kaꞌam magapas teꞌed kapandeyan magpalataꞌ bissā Tuhanin. Saguwaꞌ daꞌa isab taggahanun bi meꞌ mamissā si meꞌ bissāhan seddilihin. 40Subey hadja kēmon hinanganbi dem pagtipunanbin pinahatul-hatul.

Currently Selected:

1 Korinto 14: yakV

Highlight

Copy