Zakali 2
2
Kulakɛlɛmai velesiɛi: Minɛiti ta ɠain bo nuiti
1Gè ɠaazuwuzeɠeni, gè minɛ naanigɔ ɠaani kulakɛlɛmai taɠili su. 2Gè ɠɛni geezuɠeelai ma, é ɠɛni ɓɔɛzu pɔ̀: «Minɛi niiti ta ga leeni?» É gòoɠaaʋoteni, é ɠɛ mà: «Minɛi niiti ka ti Zuda zuvazagai, naa ʋɛɛ Izilayɛle ta Zeluzalɛme ʋa.»
3Ɠɔoɠɔ GALAGI ɠain bo nu naanigɔ lɛɛni ga ze. 4Gè ɠɛni ma: «Leeni ɠa ti ʋaazu kɛɛzu?» É gòoɠaaʋoteni, é ɠɛ mà: «Ɠain bo nui niiti paaʋɛ ga ti zii ɠiligi naati kpɔlɔ, ti ti-minɛiti suɠale, tɛigiti ti-minɛiti buzeɠeai Zuda yooi laalɔɠɔma ga ti su nuɓusɛiti suvaza. Minɛiti ka ti Zuda ta Zeluzalɛme nuɓusɛiti suvazagai ga kɛʋele ɲɔu, nu nɔpɛ ge la mɔ ɠɛa zoosu unbuzeɠezu.»
Kulakɛlɛmai zaʋasiɛi: Kɔɠɔ galui
5Gè ɠaazuwuzeɠeni, gè zunu ɠila ka, kɔɠɔ galui zoni zea. 6Gè ɠɛ ma: «Mini ɠa è liizu ná?» É ɠɛ mà: «Nà liizu Zeluzalɛme ɠɔɠɔsu, gè sakpai, ta kogi ɠwɛɛ.»
7Geezuɠeelai nii é ɠɛni ɓɔɛzu pɔ̀, naa maaɓuɠani geezuɠeelai taɠili ba, nii é ɠɛni daaɠomisu. 8É ɠɛni naa ma: «Ɓizɛ, è ɓɔɛ zunu loungoi nu ʋɔ, è ɠɛ ma: ‹Zeluzalɛme ɠa ɠɛɛzu ga taai, siɠi nɔpɛ ge la mɔ ɠɛa ma, tɔɔzei nuɓusɛiti ta toganiiti mɔin ʋelei ʋa, niiti ti ɠɛɛzu ná. 9Nà ɓɔɠɔi ɠa gè ɠɛɛzu maaɠoolii zu eɠɛ abu ziɠigi, gè ɠɛ ma taazuʋɛ ga ná-lɛbiyai,› » Ɠɔoɠɔ GALAGI wooi ɠana.
Kula zou ʋa nuiti toli fai ʋolu
10«Ee! Ee! À ʋela!
Wo ɠula lɛkpɛma ʋelei nu ɠɔʋɛzuʋɛ yooi tɛi ba ga suvilɛ!»
Ɠɔoɠɔ GALAGI wooi ɠana.
«Mazɔlɔɔ gè wo zuvazagɛ geeɠɔlɔgi wu ʋepema naanigɔi pɛ,»
Ɠɔoɠɔ GALAGI wooi ɠana.
11«Ee, Siyɔn nuɓusɛiti, à ʋela,
wɔi wo zeini Ɓaɓilɔne taazuʋɛ.
12Mazɔlɔɔ Ɠɔoɠɔ GALAGI, Fai-Pɛ-Maliɠii wooi ɠaa:
‹Tɛigi é tèʋegai ga ná-zobogi,
zooi naati daalɔɠɔma niiti ti loai wo ma, é ɠɛ ma:
Zɔi nɔpɛ é vɔɔɠuzu wo ʋa,
naama nui vɔɔɠua gàazuleegi ʋa.
13Wɛlɛ, nà yeewuzeɠezu zooi naati daalɔɠɔma,
ta latisu ti ɠɛ ga ta-luɔiti zeezu ani.› »
Wa kwɛɛ naazu ga Ɠɔoɠɔ GALAGI, Fai-Pɛ-Maliɠii tèʋegɛ.
14«Wa ʋe de, Siyɔn nuɓusɛiti, à ɠoozunɛ!
Wo wooɠula ga koozunɛɛi,
mazɔlɔɔ nà ga ʋa gè zei wo zaama,»
Ɠɔoɠɔ GALAGI wooi ɠana.
15«Naama volo ná, zii ɠiligi ma mɔinmɔin ka ʋa,
ti ɠili Ɠɔoɠɔ GALAGI ʋa.
Ta ɠɛ ga nà-nuɓusɛiti,
nà zei wo zaama.»
Wa kwɛɛ naazu ga Ɠɔoɠɔ GALAGI, Fai-Pɛ-Maliɠii ɠa é tèʋegai wo ma.
16Ɠɔoɠɔ GALAGI ɠa Zuda zeɠe ʋolu ga nɔnɔi, zou ɲadegai zu.
É yiimazeɠe ʋolu ga Zeluzalɛme.
17Eteai pɛ ge maaɠɛ kpɔ mu Ɠɔoɠɔ GALAGI ɠaazu!
Mazɔlɔɔ toɠa na ɠula ga suvilɛ sei ʋɛlɛ ɲadegai wu.
Currently Selected:
Zakali 2: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
