Wɔlɔme 3
3
Nuɓusɛi pɛ ka ga sɔba nu GALA gaazu
1Leeni ɠa é ga Zuifui vizɔsuʋɛ? Tatipɛlɛʋolui ma ɠulanumai ɠa ga ɓɛgele? 2Ti vizɔgɛ gola, fai pɛ su. Mɔunpa, Zuifuiti ka GALA daawooi ɠalivaai ti ma. 3Naama leeni ɠa da bo naazu, ni tanigaani ta ti zaama, ti ga wooʋalada nu? Ta-wooʋaladalai ɠa GALA ná-wooɠɛɠiladai ɠoloɠolo ɓaa? 4Naa li poun! Kɛni GALA ge ɠwɛɛ ga gaama ƓALAGI, anɛɛ ni nuɓusɛi pɛ ka levezu ga zɛɛ wo nu, eɠɛʋelei sɛʋɛai la GALA Sɛʋɛi zu ga:
«Kɛni ti è ɠwɛɛ ga telebo nu è ɓɔɛ wooiti su,
ni nu a ɠɛna é è lukpɔ, è pee zɔlɔɔ.»#3:4 Guy 51:6 bogɛ é zoloo Gɛlɛke woo zɛʋɛ wɔlɔmai ma.
5Kɛlɛ ni telebotalai de kɛɛzu, naa ɠa kulazu kɛlɛma ga GALA telebogɛ, leeni ɠa da bo? Telebotalai ɠa GALA ge su ɓaa, siɛgi zu a ná-ziiɠaawanai zei la de ma? (Nà ɓɔɛzu ga nuɓusɛiti kpɔɛ ʋelei.) 6Naa li poun! Mazɔlɔɔ ni GALA ge ɠɛni ga telebotala nu, a la zoo ɠale, é eteai lukpɔɠaaleʋe?
7Kɛlɛ ni nà-zɛɛi ɠa GALA ná-gaamai ɠulazu kɛlɛma ga pagɔ, suwɔɔlɔ é ɠɛ bɛ ga lɛbiyai, leeni vaa zu màanɛai mɔnɔ gè ʋeelala eɠɛ kotoba nu? 8Naazu leeni vaa zu ada ɠɛ ma mu: «Ade faa ɲɔi ɠɛ, faa ʋagɔi ɗa ɠula su»? Nui tanigaani ta ná, nii a kɛ ti nà-faa ɲɔi wo, ta pèelalazu ga naa ɠɛɠala ɓɔɛiti ka, gè ti wosu. Naama nuiti ta peelalai zɔlɔɔ, tɔɔzei naa ɠa soloogai ti ma.
Telebo nu la ná
9Kɛlɛ leeni ʋe deɠɛmu? Adɛiti de ga Zuifuiti, de vizɔgɛ zii ɠiligiti ba ɓaa? Naa laade, ɲɛgɛlɛin! Gè ɓega ga dɛɛ ga Zuifuiti ta zii ɠiligiti kpein, kotoi ɠa zeini ti pɛ unda. 10Sɛʋɛʋɛ GALA Sɛʋɛi zu ga:
«Telebo nu nɔpɛ ge la ná, anɛɛ gila kpalaa,
11tanɔpɛ ge la ga faaɠaaɠaa nu,
ti tanɔpɛ ge la GALA gaiziɛzu.
12Ti pɛ ti ɠakaga,
ti kpein ti luʋa ʋelei ɲɔuɗa ʋɔɔma,
taɠila kpalaa ge la ná, nii é faa ʋagɔ ɠɛɛzu,
anɛɛ gila kpalaa.»#3:10-12 Guy 14:1-3.
13«Ti-ɠɔdayeɠei ɠɛɛʋɛ eɠɛ kabayeɠei daalaogai,
ti-nɛgi ɠa ti-laaʋɛ ga ti ɗa yaavai ɠɛɛ la.»#3:13 Guy 5:10 bogɛ é zoloo Gɛlɛke woo zɛʋɛ wɔlɔmai ma.
«Kaali wanai ɠa é ɠulazu ti-lakɔlɔgiti bu.»#3:13 Guy 140:4 bogɛ é zoloo Gɛlɛke woo zɛʋɛ wɔlɔmai ma.
14«Ti-laaʋɛti daavegɛ ga foovooi ta woo ɲɔi.»#3:14 Guy 10:7 bogɛ é zoloo Gɛlɛke woo zɛʋɛ wɔlɔmai ma.
15«Ti-ɠɔɠɔiti maavilɛʋɛ ɲama ʋuu ɓizɛi wosu,
16faa zuɠoloɠologi ta nimizaiti ta ɗa yɛ ti-ziɛzuʋɛti pɛ,
17ti la ziilɛi pelei ɠwɛɛ.»#3:15-17 Eza 59:7-8.
18«GALA gaazuluabai la ti ɠaazu ga faa nɔpɛ.»#3:18 Guy 36:2 bogɛ é zoloo Gɛlɛke woo zɛʋɛ wɔlɔmai ma.
19Niizu, de kwɛni, de ɠɛ ma, nii tɔgi bosu, toɠa naa wosu naati ma, niiti ti tɔgi wu, naa ɠa a kɛ ɛsɛ pɛ daaɠulu, eteai pɛ ge kwɛɛ ga toɠa ga sɔba nu GALA gaazu. 20Mazɔlɔɔ nuɓusɛ nɔpɛ ge la ɠɛa ga telebo nu GALA gaazu ga tɔgi zo fai maaʋele. Tɔgi ɠa nɔ ga zaɓui, nui kwɛɛ ga é kotoi ɠɛɛʋɛ.
Telebodai zɔlɔɔ fai ga kidaaleʋei maaʋele
21Kɛlɛ niizu, ʋelei nu a ɠɛɛ la ga telebo nu GALA gaazu, naa ɠulaʋɛ kɛlɛma, tɔgi ná-faa la naa zu. Moize ná-tɔgi ta GALA goo wo nuiti ta-zɛʋɛiti ti ma zeele woo woni. 22GALA ka nuɓusɛi pɛ kɛɛzu ɠaazu ga telebo nu ga kidaaleʋei maaʋele, Yesu Kilista ma. Toɠa naa ɠɛɛzu naati pɛ bɛ, niiti ti ɠidaaleʋezu Kilista ma, zeeɠaaɠwɛɛzu la nuɓusɛiti ba. 23Mazɔlɔɔ ɛsɛ pɛ ge kotoi ɠɛa, ti ʋalaga GALA ná-lɛbiyai ma. 24Ti pɛ ti levea ga telebo nu ga ná-zaalai maaʋele, GALA ná-faanɛɛi ɠana é kɛɛni, unmɔɔgi maaʋele ma Yesu Kilista ʋaani la. 25Tɔ ɠa GALA ge deveni ga koto gba zalaɠai, naati faa ma, niiti ta ɠidaaleʋe ma ɲamai ma, puai, naa ɠa a kɛ é ná-telebodai lɛ. Kotoiti ti ɠɛɛni kaite, GALA ge naati sala vai yɛni ná, ná-ziilɔɔi maaʋele ma. 26É ɠɛni pɔ ga é ná-telebodai lɛ niima ziɛgi zu, mazɔlɔɔ toɠa pɔ ga é ɠɛ ga telebo nu, ta é naati kɛ ga telebo nu, niiti ti ɠidaaleʋezu Yesu ma.
27Ɓɔɠɔ maamusɛ ungi ɠa mini naazu? É la ná ɲɛgɛlɛin. Lee vaa zu? Tɔɔzei tɔgi zo fai la mɔ ga faa wola, kɛni kidaaleʋei nɔ. 28Mazɔlɔɔ gá ɠisiɛzu ga nui ɠa ɠɛ ga telebo nu GALA gaazu ga kidaaleʋei maaʋele, naa la ɠɛɛzu ga tɔgi zo fai maaʋele. 29Ɓaa mu, GALA ka ga Zuifuiti gila nɔ ta-ƓALAGI ɓaa? É la ga zɔɔma nuɓusɛiti ɓalaa ta-ƓALAGI ɓaa? Gaamazu, toɠa ga zii ɠiligiti ɓalaa tɔnɔ. 30Tɔɔzei GALA gila kpe nɔ ɠa é ná. Tɔ ɠa é Zuifuiti kɛɛzu ɠaazu ga telebo nuiti ga kidaaleʋei maaʋele. Zɔiti ti la ga Zuifua, é naati ɓalaa kɛ ga telebo nu ga kidaaleʋei maaʋele. 31Da GALA ná-tɔgi zɛbɛi ɠoloɠolosu mu ga kidaaleʋei maaʋele ɓaa? Naa li poun! Tɔun, tɔgi ná-zɛbɛ ɠitei ɠa, de feezu zea.
Currently Selected:
Wɔlɔme 3: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.