Wɔlɔme 10
10
Zuifuiti ta zii ɠiligiti ta-ƓALAGI ɠa ɠila nɔ
1Kɛ̀ɛleaiti, nii wɔin mà zìimaʋɛ, gè falizu GALA ma Zuifuiti faa zu, naa ɠa é ga ti ɠizo. 2Mazɔlɔɔ nà naama zeele wooi wo ti ʋɛ, ga GALA ná-fai wɔin ɠa ti ma gola, kɛlɛ ma vaaɠaaɠai ɠa é la ti ya. 3Ti la gaaɠaani ʋelei GALA ge nuiti kɛɛzu la ɠaazu ga telebo nui, ti ɠaaɓaaʋɛ ti ti ɓɔɠɔ vaiti kpɛtɛ, ti ʋa ɠɛ ga telebo nuiti. Naa ma, ti la vaani naa wu, ʋelei GALA ge nuiti kɛɛzu la ga telebo nuiti. 4Mazɔlɔɔ Kilista ɠa é ga tɔgi laazeeliai, naa ɠa a kɛ niiti kpein ti ɠidaaleʋezu, GALA ge naati kɛ ɠaazu ga telebo nuiti.
5Wɛlɛ nii ɠa Moize sɛʋɛni, é lo telebodai ʋa, nui a sɔlɔɔ tɔgi zogai maaʋele ma: «Zɔi a ziɛ ga tɔ gooiti, naa ɠa zɛnvui wo ti maaʋele ma.»#10:5 Lev 18:5. 6Kɛlɛ wɛlɛ, ʋelei telebodai é zɔlɔɔsu ga kidaaleʋei maaʋele, naa ɓɔɛzu la, é ɠɛ ma: «Mina bo è-yiimaʋɛ ga: ‹Ɓɛ ɠa a lɛ geeɠɔlɔgi zu?› (naa ɠa ga è Kilista yei, è kula ná), 7ɓaa è ɠɛ ma: ‹Ɓɛ ɠa a yei zeɠezaɠa ɓokulagi zu?› » (naa ɠa ga è Kilista wuzeɠe, é ɠula saai ya). 8Leeni ɠa é bosu deɠɛmu? «Wooi ɠa è ɠoba nɔ, toɠa è-laaʋɛ ta è-yiimaʋɛ.» Naama wooi ɠa ga kidaaleʋe ɓɔɛi, nii gi daazeelizu.
9Ni ɗa bona laaʋɛ ga Yesu ɠa ga Maliɠii, è la da è-yiimaʋɛ ga GALA ge buzeɠeni, é kula saai ya, GALA ka è ɠizo. 10Mazɔlɔɔ nui a laana da yiimaʋɛ, GALA ka kɛ ɠaazu ga telebo nu, a bona ga laaʋɛ, GALA ge kizo. 11Eɠɛʋelei GALA Sɛʋɛi bogai la, é ɠɛ ma: «Zɔi nɔpɛ a ɠidaaleʋe ma, naa la unfega.»#10:11 Eza 28:16 bogɛ é zoloo Gɛlɛke woo zɛʋɛ wɔlɔmai ma. 12Naa ɠa é ba, zeeɠaaɠwɛɛzu la Zuifuiti ba, ta zɔiti ti la ga Zuifua. Mazɔlɔɔ ti pɛ ti-Maliɠii ɠa ɠila kpe nɔ, nii é faaɓɔɠɔi ɠɛɛzu naati pɛ bɛ, niiti ti wooɠulazu ma. 13Mazɔlɔɔ sɛʋɛʋɛ GALA Sɛʋɛi zu ga: «Zɔi nɔpɛ a wooɠula Maliɠii ma, toɠa ɠizo.»#10:13 Zow 3:5.
14Ta zoo ti wooɠula ma ɠale, ni ti la ɠidaaleʋeni ma? Tama ta zoo ti ɠidaaleʋe ma ɠale, ni ti la ná-faa mɛnini? Ta zoo ná-fai mɛnisu ɠale, ni nu la daazeelini ti ma? 15GALA daawoo laazeeli nuiti ta ɠɛ ná ɠale, ni nu la ti leʋeni? Sɛʋɛʋɛ GALA Sɛʋɛi zu ga: «Pagɛ gola ga nu wɛlɛ keelaiti ba, ti ɗa ʋa ga woo niinɛ ʋagɔi.»#10:15 Eza 52:7. 16Kɛlɛ nui pɛ ge la Woo Niinɛ Ʋagɔi zoni. Tama Ezayi ɠɛni ma: «Màliɠii, ɓɛ ɠa é ɠidaaleʋea naa ma, é mɛniga gi la?»#10:16 Eza 53:1 bogɛ é zoloo Gɛlɛke woo zɛʋɛ wɔlɔmai ma. 17Naa ɠa é ba, kidaaleʋei ɠa zɔlɔɔsu ga faa mɛnigi maaʋele, nii ma nu mɛnisu, naa ɠa ɠulazu Kilista ná-fai laazeeliai zu.
18Kɛlɛ nɔ̀un gè ɠɛ ma: Ti la ɠɛni niima wooi mɛnini ɓaa? Ɓa-o! É la zɛʋɛni ɓaa, ga:
«Ti-ma wooi laazeelini eteai zu ná pɛ,
ti-wooi zeelini zou ɓela ga.»#10:18 Guy 19:5 bogɛ é zoloo Gɛlɛke woo zɛʋɛ wɔlɔmai ma.
19Kɛlɛ nɔ̀un gè ɠɛ ma: Izilayɛle la ɠɛni gaaɠaani ɓaa? Moize mɔunpa ge ɠɛni ma:
«Nà wo ɠɛɛzu ga tolo nuiti ga naa maaʋele, nii é la ga zii nɔpɛ.
Nà wo yiiɠaawanazu ga zii ta, nii ɠi ge la ma.»#10:19 TSV 32:21.
20Ezayi kulani dualuagi zu feya, é ɠɛ ma:
«Zɔiti ti la ɠɛni gàiziɛzu, naati ti kàani,
gè ɠulani kɛlɛma naati bɛ, niiti ti la ɠɛni màaɠaazaɠabosu.»#10:20 Eza 65:1 bogɛ é zoloo Gɛlɛke woo zɛʋɛ wɔlɔmai ma.
21Kɛlɛ é nii woni Izilayɛle ná-faa zu, é ɠɛ ma:
«Yeenɔpɛ ka zèe maalegai la nuɓusɛiti ma,
ti la ɠoloni, ti maaɠaaliai.»#10:21 Eza 65:2 bogɛ é zoloo Gɛlɛke woo zɛʋɛ wɔlɔmai ma.
Currently Selected:
Wɔlɔme 10: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.