Maleke 4
4
Faalaalii é ʋilɛ molo zuwu vaza nui ʋa
(Matiyo 13:1-9; Luke 8:4-8)
1Yesu tɔɔzeini mɔnɔ ga é ɗa nuiti kala ziɛ wolai laaʋɛ. Bɛbɛ wolai ɠaalɛɛni ba koba. Kɛni é lɛɛni keingi ta zu vɔlɔ, é zei ná. Keingi ɠɛni ziɛ wolai ɠa, bɛbɛi pɛ ge ɠɛni loni kakei ma. 2É ɠɛni ti ɠalasu ga faa mɔinmɔin faalaaliiti su. Pɛtɛ ʋele ɠa é ɓɔɛni la ti ʋɔ: 3«À woilo dɛɛ: Molo zuwu vaza nui ta ɠulani ga é molo zuwui vaza. 4Kɛai ma moloi vazasu, molo ɠaei tanigaa ti looni pele ɠɛzɛi zu, wɔniiti ti ʋa, ti mi. 5Taɠiligaa ti looni fasa lutui zu, pɔlɔi tago nɔ ɠa é ɠɛni ná. Ti ʋɔnɔni fala, tɔɔzei zooi ɓoma la ɠɛni ɠoozani. 6Kɛlɛ foloi kpaai ma kpekpe, é molo ʋɔnɔ koiti galani ma fala. Ti vɔɔni, tɔɔzei sape la ɠɛni ti ʋa sɛ. 7Taɠiligaa ti looni ɠaingiti saama. Naati ti lɛɛni, ti molo ʋɔnɔ koiti maaɓɔle. Ti la waani pɛ. 8Taɠiligaa ti looni mɔnɔ zou ʋagɔi zu. Ti ɓɛtɛni, ti waa, ma ɠɔpɔgiti ti wɔɔlɔ eyɛsu ti mɔin, tanigaa ti-ɠaawaai ɠɛ ga puuzaʋasaʋa (30), tanigaa puulɔzitalɔzita (60), tanigaa ungilagila (100).» 9Yesu ɠɛni ti ma ʋolu: «Zɔi faa mɛni goiyeɠe ba, naama nui nii mɛni.»
Yesu ná-faalaaliiti bo ungi
(Matiyo 13:10-17; Luke 8:9-10)
10Siɛgi zu ti lago maaɠelesa ge leʋeni la, zɔiti ti ɠɛni koba, naa ʋɛɛ keela puugɔ maazu felegɔiti (12) ba, ti gaazaɠani faalaaliiti ma. 11É ɠɛni ti ma: «GALA ná-masadai ma lɔɔɠuzu vaiti feeʋɛ wo ʋɛ, kɛlɛ zɔiti ti ga kamaʋolu nuiti, ta lɛɛzu ga naati, faalaaliiti su, 12naa ɠa a kɛ:
‹Ti ɗa wɛlɛ nɔ,
kɛlɛ ti mina wozaɠa pɛ,
ti ɗa woilo nɔ,
kɛlɛ ti mina faa ɠaaɠa pɛ,
nii a kɛ ti mina ɠale ma GALA pɔ,
ti ʋa ta-ɠotoiti ma zuvaayɛgi zɔlɔɔ.›#4:12 Eza 6:9-10 bogɛ é zoloo Gɛlɛke woo zɛʋɛ wɔlɔmai ma.»
Faalaalii zuɠulazuʋɛ pilɛgai molo zuwu vaza nui ʋa
(Matiyo 13:18-23; Luke 8:11-15)
13Naa ʋoluma, é ɠɛni ti ma: «Wo la niima vaalaalii ɠaaɠaani? Wa zoo ɠale wo zɔiti gaaɠa? 14Molo zuwu vaza nui ɠa é ga naama nui, nii é GALA daawooi vazasu. 15Niiti ti molo zuwui zɔlɔɔgai pele ɠɛzɛi zu, ti la vɔlɔ ɓeni ga wooi zɔlɔɔ, Setana ʋa, é naa ɠula ti-yiimaʋɛ, nii fazagai ná. 16Zɔiti ti molo zuwui zɔlɔɔgai fasa lutui zu, naati ka ti wooi mɛnisu nɔ feya, ti yeezei bu ga koozunɛ. 17Kɛlɛ ti la naa yɛsu ná, é ʋa zapelɔ ti-yiimaʋɛ, ti la ɗa ga so kpaan. Siɛgi zu kpɔlɔi ɓaa wɔinzeɠemai ʋaazu la wooi maaʋele ma, gaamanɔ ta ɠalesu ma. 18Zɔiti ti molo zuwui zɔlɔɔgai ɠaingiti saama, naati ka ti wooi mɛnisu, 19kɛlɛ naa maa ɠa ɓɔɔlezu ga eteai ma yiizoolɛi, naavolo wɔin, ta ani wɔinlai ma zii pɛ, niiti ti lɔɔzu ti-yiimaʋɛ, é la ɗa ga waa. 20Zɔiti ti molo zuwui zɔlɔɔgai zou ʋagɔi zu, naati ka ti wooi mɛnisu, ti yeezei bu. Toɠa waazu, ma ɠae ɠilagilagi tanigaa ti-ɠaawaai ɠɛ ga puuzaʋasaʋa (30), tanigaa puulɔzitalɔzita (60), tanigaa ungilagila (100).»
Faalaalii é ʋilɛ lanboi ʋa
(Luke 8:16-18)
21É ɠɛni ti ma: «Anɠɛ nɛi nu ɠa ɗa ʋa ga lanboi, è dɔ aniɲakai wu, ɓaa betei wu? Kɛbɛ lanbo zei anii ɠa nu a ɗa sei ga, kɛlɛ? 22Tɔɔzei maalɔɔɠu vaa nɔpɛ ge la ná, nii é la ɠulaa kɛlɛma. Dɔɔɠuzu vaa nɔpɛ ge la ná, nii é la laa wozakalagi ɠa. 23Zɔi faa mɛni goiyeɠe ba, naama nui nii mɛni.»
24Yesu ɠɛni ti ma: «À dama ga fai nii wo mɛnisu. Kɔɠɔ ganii nii nɔ wo kɔɠɔgi wosu su, GALA ka kɔɠɔgi wo ɓalaa naa zu wo ʋɛ, é ta ɓɔ ba. 25Mazɔlɔɔ zɔi ani zea, ta ɠa ve naa ya ʋolu. Kɛlɛ zɔi ani la zea, anɛɛ zɔɔgoi é zea, naa ɠa ɠula zea.»
Faalaalii é ʋilɛ ani zuwui ʋa
26É ɠɛni ti ma mɔnɔ: «GALA ná-masadai ɠulaʋɛ eɠɛ zunui nii é ani zuwui vazani ná-kpalagi zu. 27Naa ʋoluma, é ɠɛni ɲiizu ga kpidii, ɓaa é ɗa wuzeɠe folo-o-folo, ani zuwui ɠɛni ʋɔnɔsu nɔ ɓɔɠɔ ʋɛ, é ɗa ɓaɠo, tɔun é la kwɛɛni ʋele naa ɠɛni ɠɛɛzu la. 28Zooi ɓɔɠɔ molo lufai ʋɔnɔni, é tɔɔzei dɛ ga ma lɔkulugi, naa ʋoluma molo ɠɔpɔgi, é gaaɓela ga molo ɠae ga pagɔ. 29Kɛlɛ tɛi moloi mɔɔni nɔ feya, zunui nii boɠa goi lɔɔni su gaamanɔ, tɔɔzei molo leʋe yeeɠɛɠalai zeelia.»
Faalaalii é ʋilɛ mutaalede kaei ʋa
(Matiyo 13:31-32, 34; Luke 13:18-19)
30É ɠɛni ti ma mɔnɔ: «Ɓɛgele ɠa ada geeɠɔlɔgi ma masadai ʋokɔɠɔ ma? Faalaalii ɓɛgele ɠa ada bo, nii a kɛʋele lɛ? 31Geeɠɔlɔgi ma masadai ɠulaʋɛ ga mutaalede kae ɠilagi. Siɛgi zu nu siinsu la zooi ma, tɔ ɠa dɔiɗai ani zuwui kpein saama eteai zu. 32Kɛlɛ siinga ʋoluma, toɠa ɗa wɔɔlɔ, gaaɠooza kpelei zu ziinziin ganigiti pɛ ba, ma ɓekegiti ti lo ba, wɔniiti ti ɗa laɠagi lo ma niinigi wu.»
33Yesu ɠɛni nuiti kalasu ga GALA daawooi, faalaali mɔinmɔin su, é soloo naa ma, nii ti gaaɠaazu. 34É la ɠɛni ɓɔɛzu ti ʋɔ, ni faalaali la ba. Ti maaɠelesa ga leʋena ta ná-kaladopoiti, é ɓena ti pɛ poluʋɛ lɛ ga naati.
Yesu fiilɛ wolai ɠaayei vai
(Matiyo 8:23-27; Luke 8:22-25)
35Naama voloi, kpɔkɔi zeeliai ma, Yesu ɠɛni ná-kaladopoiti ma: «Ade leʋe ziɛ ʋoluʋelei.» 36Ti bɛbɛi yɛni ná, ti li ga Yesu keingi zu, nii é ɠɛni zeini su. Keingi taɠiligaa ti ʋilɛni polu. 37Fiilɛ wolai zɛba é lokoleʋe, ziɛi ɗa ɲiikpi takpatakpa, é ɗa vala keingi zu, é ɗa daave. 38Tɔun nɔnɔi, é ɠɛni laani keingi ɓogaʋɛ, é ɗa ɲi, nɔungi laani undama ɓɔlɔi ma. Kaladopoiti ti maaloɠani, ti ɗa ɠɛ ma: «Kalamɔn, gi undaa ɠana ʋili, ɗɔun, naa la è yiizoolɛzu?» 39É wuunni, é devei ve fiilɛi ya ga sɛbɛi, é ɠɛ ziɛi ma: «Bu ɠɛ toun! Maaɠɛ kpɔ!» Fiilɛi zuleʋeni kpe, woza ɠaalɛi tɔɔntɔɔn. 40É ɠɛni ná-kaladopoiti ma: «Lee vaa zu wo luazu? Kidaaleʋe la wo ya?» 41Naati ti wola luani, ti ɗa ɓɔɠɔ ɠaazaɠa ga: «Ɓɛ ɠa é ga nii mu, nii fiilɛi ta ziɛi ti ɠolozu gooi ʋɛ?»
Currently Selected:
Maleke 4: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
