Maleke 1
1
GALA keelai Zan Ɓatisete
(Matiyo 3:1-12; Luke 3:1-18; Zan 1:19-28)
1Ʋele ɠa Woo Niinɛ Ʋagɔi lɔɔzeiɗai la, nii pilɛgai GALA Doun Zunui Yesu Kilista ʋa. 2Ʋelei sɛʋɛai la GALA goo wo nui Ezayi ná-sɛʋɛi zu ga:
«Nà nà-keelai leʋesu è luɠɔ,
é ɗa-ʋelei ɓɛtɛ è ʋɛ.#1:2 Mal 3:1.
3Nui ta ɠa ɓainsu teʋebai zu, é ɗa ɠɛ ma:
‹À Maliɠii ná-pelei ɓɛtɛ bɛ.
À ná-pele goiti sɔle.› »#1:3 Eza 40:3 bogɛ é zoloo Gɛlɛke woo zɛʋɛ wɔlɔmai ma.
4Zan ɠulani kɛlɛma ɠana. É ɠɛni ɓatizei wosu teʋebai zu. É ɠɛni GALA daawooi laazeelizu, é ɗa ɠɛ ma: «À wo-ziɛ ʋelei maavalibo, wo ɓatize, naa ɠa a kɛ wo zuvaayɛ ga wa-ɠotoiti.» 5Nuiti ti ɠɛni ʋaazu pɔ, ti zeɠe Zudé yooi zu ná pɛ, ta Zeluzalɛme, é ɗa ti ɓatize Zuludɛn wu, ti ɗa laa zɔ ga ga ta-ɠotoiti.
6Zan ɠɔba zeɠei ɠɛni ga seɠei fɛlɛai ga ɲɔmɛ leɠai, ná-saamaɠiligi ɠɛni ga kɔlɔ ʋaai. Kɔnɔgi ɠɛni ga kotogi ta dɔɓɔ ɠɔin gulɔi. 7Zan ɠɛni GALA daawooi laazeelizu, é ɗa ɠɛ ma: «Zɔi é ʋaazu nɔ̀un poluma, sɛbɛi wɔɔlɔʋɛ nɔ̀nɔi ʋa. Gè la vɔlɔ kula ɠɛɛni su ga gè ʋa maaʋɛ, gè ʋa ná-saʋala galuiti daavie. 8Nɔ̀un, gè wo ɓatizegɛ ga ziɛi, kɛlɛ tɔun, toɠa wo ɓatize ga Zɛnvu Ɲadegai.»
Yesu ɓatize fai ta tɛgai é zeelini ma
(Matiyo 3:13—4:11; Luke 3:21-22; 4:1-13)
9Naama ziɛgi zu, Yesu zeɠeni Galilé yooi zu, Nazalɛte taazuʋɛ. Zan kpatizeni Zuludɛn ɗɛi wu. 10Kulaai ma ziɛi wu feya, é geeɠɔlɔgi ɠaani daa ɗa lao, Zɛnvu Ɲadegai ɗa yei ma, eɠɛ poopogi. 11Wooi ta ɠulani geeɠɔlɔgi zu, é ɗa ɠɛ ma: «Ɗa ɠa è ga nɛ̀ɛbɛ Loun Zunui, ɗa gòla yiilaazu.»
12Gaamago, Zɛnvu Ɲadegai Yesu laaʋilini teʋebai zu. 13É kɛɛni ná ga folo ʋuunaanigɔ (40), Setana ɠɛni tɛɛzu ga. É ɠɛni ná dɔɓɔ zuaiti saama, geezuɠeelaiti ti ɗa maaleʋebo.
Yesu ná-botii lɔɔzei vai Galilé
(Matiyo 4:12-17; Luke 4:14-15)
14Ti Zan ʋiligai ma kasoi ɠa, Yesu liini Galilé yooi zu, é ɠɛni GALA ná-Woo Niinɛ Ʋagɔi laazeelizu. 15É ɠɛni ɠɛɛzu ma: «Yeeɠɛɠalai zeelia, GALA ná-masadai maaɓuɠaa. À wo-ziɛ ʋelei maavalibo, wo la Woo Niinɛ Ʋagɔi la.»
Yesu ná-kaladopo mɔungiti toli fai
(Matiyo 4:18-22; Luke 5:1-11)
16Yeeta, tɛi é ɠɛni leʋesu Galilé ɗɛ wolai laaʋɛ, é Simon ɠaani ta kɛɛɠɛloin Andelé. Ti ɠɛni kale ɓɛɛ lumɔi ʋilisu ziɛ wolai wu, tɔɔzei ti ɠɛni ga kale ɓɛɛ nuiti. 17Yesu ɠɛni ti ma: «À ʋilɛ pòlu, nà wo ɠɛ ga nu ɠaiziɛ nu.» 18Gaamago, ti ta-lumɔiti zɛni ná, ti ʋilɛ polu.
19Yesu lago liini poun, é Zeɓedé ná-doun zunu felegɔiti ka: Zake ta kɛɛɠɛloin Zan. Naati ti ɠɛni keingi zu, ti ɗa ta-lumɔiti kpɛtɛ. 20É naati tolini gaamago. Naati ti ti-ɠɛɛ Zeɓedé yɛni keingi zu ta ná-botiɠɛ nuiti, tiya ma ti ʋilɛ Yesu ʋolu.
Yesu inɛ su nui ɠɛdɛ fai
(Luke 4:31-37)
21Ti liini Kapɛɛlɛnawume taazuʋɛ. Dooɠo foloi, Yesu lɛɛni GALA dɛbi ʋɛlɛi wu, é zɛba é ɗa kalagi wo. 22Nuiti ti wola laavɔɔni ga ná-kalabo pelei, tɔɔzei é la ɠɛni kalagi wosu ga tɔ kalamɔinti kɛʋele, kɛlɛ é ɠɛni bosu ga zobogi.
23Tama naama yeeɠɛɠalai nɔ zu, zunui ta ɠɛni ta-ƓALA dɛbi ʋɛlɛi wu, nii kɔzɔba yɛnvui ɠɛni su. É kpeei looni, 24é ɠɛ ma: «Nazalɛte nui Yesu, ɗa-vaa ɓɛgele ɠa é gá-vaa zu? È ʋaaʋɛ gi undaaʋilisu ɓaa? Gè è ɠwɛni, ɗa ga GALA ná-Nu Ɲadegai!»
25Yesu devei veeni zea ga sɛbɛi, é ɠɛ ma: «É vɔ, ɠula zunui tɛi su!» 26Kɔzɔba yɛnvui zunui ɲiikpini. É ɠulani naa zu, é ɗa kpee wolai loo. 27Ɛsɛ pɛ daavɔɔni, ti ɗa ɓɔɠɔ ɠaazaɠa ga: «Lee ɠa é ɠɛɛzu ɠani? Kala niina ɠa ga nii! Toɠa kɔzɔba yɛnvuiti devezu ga zobogi, naati ti ɗa ɠolo bɛ!» 28Gaamago nɔ, maawooi ziɛni ná maaɠoolii pɛ su, Galilé yooi zu.
Yesu seeɓɛ nu mɔinmɔin kɛdɛ fai
(Matiyo 8:14-17; Luke 4:38-41)
29Yesu ɠulaai ma GALA dɛbi ʋɛlɛi wu, tɔ ʋe, Zake ʋe ta Zan ti liini Simon ta Andelé ta-ʋɛlɛi wu. 30Simon mɔɛin ɠɛni laani ga kɔlɔkpadimai. Yesu unkulani nɔ feya, ti ná-fai zuɠula naa ma. 31Yesu maaɓuɠani ba, é so zeei ʋa, é buzeɠe. Kɔlɔkpadimai ɠaayei, é tɔɔzei ga é ɗa ti maaleʋebo.
32Kpɔkɔi, foloi liai ma, ti ʋaani pɔ ga seeɓɛ nuiti pɛ, ta inɛ su nuiti pɛ. 33Taai ɓusɛni nɔ kpulu, ti ʋa, ti ʋu pɛlɛlaʋɛ. 34É seeɓɛ nu mɔinmɔin kɛdɛ, niiti seeɓɛ laalitaaligiti ti ɠɛni ti ʋa. É inɛ mɔinmɔin kpɛɛni ɓalaa, é ɗa pele leʋe ti luɠɔ ga ti mina kpɔɛzuɠula, tɔɔzei naati ti ɠɛni kwɛɛni nui ma zii nii é le.
Yesu GALA daawooi laazeeli vai GALA dɛbi ʋɛlɛiti bu
(Luke 4:42-44)
35Polumai, gosu ɓidii nɔ ɠɛni de, é ɠula, é li teʋebai zu, é GALA fali ná. 36Simon ta bɔɔlaiti ti ʋilɛni, ti ɗa gaiziɛ. 37Siɛgi zu ti kaani la, ti ɠɛni ma: «Ɛsɛ pɛ ka è ɠaiziɛzu.»
38É ɠɛni ti ma: «Ade li ʋɛ ɠoba laaiti su. Kɛni gè GALA daawooi laazeeli náti. Tɔɔzei naa ɠa é kɛa gè ʋaa.» 39Tama é leʋeni Galilé yooi zu ná pɛ, é ɗa GALA daawooi laazeeli ta-ƓALA dɛbi ʋɛlɛiti bu, é ɗa inɛgiti kpɛ.
Yesu gee nui ɠɛdɛ fai
(Matiyo 8:1-4; Luke 5:12-16)
40Gee nui ta maaɓuɠani ba, é nɔkɔ kɔɠɔwu, é maanɛɛnɛ, é ɠɛ ma: «Ni ɗa vaana bu, ɗa zoo è ɲàde.» 41Maawɔin Yesu zoni, é yeemaale, é vɔɔɠu ba, é ɠɛ ma: «Gè vaa bu, ɲade!» 42Gaamago nɔ, gee zeeɓɛi zeɠeni zunui naa ʋa, é ɲade. 43É tɛnɛni ɠɛzɛɠɛzɛ, é teʋe gaamago, 44é ɠɛ ma: «Dama, nii kɛai ga ɗe ʋɛ, è mina bo nu nɔpɛ ma. Kɛlɛ li, è ɓɔɠɔ lɛ ga zalaɠa ɠula nui, é è ɠɛʋele ʋɛtɛ, naa ʋoluma è ɗa-ɲade fai ma zalaɠai ɠula, eɠɛʋelei Moize ma levei veeni la. Naa ɠa ɠɛ ga zeele woo nuiti bɛ.» 45Kɛlɛ zunui naa ɠulani nɔ feya, é tɔɔzei ga naa laazeelia ɛsɛ pɛ ma, nii kɛai. É ma wooi vazani adaʋɛ pɛ. Naa maaʋele ma, Yesu la mɔ ɠɛni zooga é ʋa lɛ taa nɔpɛ su kalakalaga, é ɠɛni liizu kamaʋolu teʋebaiti su. Kɛlɛ anɛɛ naa ʋe, nuiti ti ɠɛni zeɠezu adaʋɛ pɛ, ti ɗa ʋa pɔ.
Currently Selected:
Maleke 1: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
