Misé 3
3
Izilayɛle ɠundiɠiiti ta-lopele ɲɔi
1Gè ɠɛ ma:
«À woilo, Zakɔɓe mavofodai ma ɠundiɠiiti,
wɔi wo zeini Izilayɛle nuɓusɛiti unda!
Wo-losuʋɛ la ga wo ʋa ziɛ ga sɔledai ɓaa?
2Wa ɠɛlɛzu faa ʋagɔi ʋa,
faa ɲɔi ɠa nɛai wo ʋɛ,
wa nuiti kɔlɔgi ɠulazu ti ma,
wo ti ma zuai ɠula ti-ɠaeiti ma.»
3Ti-laamianigi ɠa nɔnɔ ga nà-nuɓusɛiti ma zuai.
Ta ti-ɠɔlɔgi ɠulazu ti ma,
ti ti-ɠaeiti galeɠale.
Ti ti zuɓulukpulu,
eɠɛ suai, nu gilizu kɔlu liɠii zu.
4Naa ɠa é ba, ta wooɠulana Ɠɔoɠɔ GALAGI ma ga é ɓɔ ti ʋa,
Maliɠii la ti wooɠaaʋotega pɛ,
kɛlɛ toɠa ʋoluave ti ʋa,
tɔɔzei faa ɲɔi ʋa, ti kɛɛni.
GALA goo wo nuiti ti Izilayɛle yaavazu
5Ɠɔoɠɔ GALAGI wooi ɠaa, é ga nii,
GALA goo wo nuiti ta-vaa zu,
niiti ti ná-nuɓusɛiti kakasu, é ɠɛ ma:
«Ni ta ani lɔɔna ti-la,
ta ɗa ɠɛ ma naazu fai pɛ ge zolooga,
kɛlɛ ta ɗa kɔɔi ʋɛɛ naati ba,
zɔiti ti la ani lɔɔni ti-la.
6Wa ɠɛ niina kpidii zu,
wo la mɔ kulakɛlɛma ɠaa!
Ʋelela ʋele vaiti bo fai ɓega!
Kpidii ɠa ʋɛɛ niina wo ma, eɠɛ foloi a daana,
foloi zu ɠa ɓidi wo ʋɛ.»
7Zɔiti ti faiti bosu ma yeeluɠɔ, ɓaa ɠa ɠula ti ma,
ungaiziɛ nuiti ta unfe!
Ti pɛ ta ɠaazulɔɔɠu,
mazɔlɔɔ GALA ge la ti wooɠaaʋotega pɛ.
8Kɛlɛ nɔ̀un, dàavegɛ ga gaaɓaai ta Ɠɔoɠɔ GALAGI ná-Zɛnvui,
ta sɔledai, ta zɛbɛi,
ga gè Zakɔɓe mavofodai ná-tɔ koloɠologiti dɛɛ la,
ta gè Izilayɛle ná-kotoi lɛɛ la.
Zeluzalɛme ɠoloɠolo fai
9À woilo deɠɛmu nii ma,
Zakɔɓe mavofodai ma ɠundiɠiiti,
wɔi wo zeini Izilayɛle nuɓusɛiti unda!
Wa sɔle fai wɔinzeɠezu,
wo telebodai maaʋe.
10Wa Siyɔn losu ga nu ʋaai,
wo Zeluzalɛme lo ga suɲɔi.
11Ta-ɠundiɠiiti ta tukpɔi ɠaaleʋezu lobɛanii maazu.
Kɛni ti ta-zalaɠa ɠula nuiti sala pɛ, ti ʋa nuiti kala ga tɔ gooi.
Kɛni ti ta-ƓALA goo wo nuiti sala pɛ ga walii, ti ʋa ʋelela ʋele vaa wo.
Ti ɗa ʋoluzei Ɠɔoɠɔ GALAGI ʋa, ti ɗa ɠɛ ma:
«Ɠɔoɠɔ GALAGI la gi zaama ɓaa?
Ɗa ma, maanɔɠɔ nɔpɛ ge la zeelia gi ma.»
12Naa ɠa é ba, wo maaʋele ma,
Siyɔn ɠa woli, eɠɛ kpalagi,
Zeluzalɛme ɠa ɠolo, é ɠɛ ga kɔtu ziɠigi,
dɔɓɔi ɠa GALA sei ʋɛlɛi ma ɠizei maaɓɔle.
Currently Selected:
Misé 3: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
