Matiyo 19
19
Kalagi Yesu boni é ʋilɛ vulu zaa vai ʋa
(Maleke 10:1-13)
1Yesu ɓegai ma ga kalagi naati bo, é zeɠeni Galilé yooi zu, é li Zudé yooi zu, ʋɛ ná Zuludɛn ʋoluʋelei. 2Bɛbɛ wolai ʋilɛni polu. É seeɓɛ nuiti kɛdɛni náʋɛ.
3Faliziɛin tanigaa ti maaɓuɠani ba, nii a kɛ ti suɠɔɠɔ ga gaazaɠagi, ti ɠɛni ma: «Tɔgi vaaʋɛ nɛi bu ga zunui ɠɛlɛ anzai ʋa, fai ma zii tanɔpɛ su?» 4É ti wooɠaaʋoteni, é ɠɛ ti ma: «Wo la dɛ kalani mu GALA sɛʋɛiti su ga tɔɔzeizu mɔunpa Ani Ɓɛtɛ ƓALAGI nuɓusɛi ɓɛtɛni, zunui ta anzanui,#19:4 Zen 1:27; 5:2. 5é zɛba é ɠɛ ma: ‹Naa ɠa é ba, zunui ɠa zeɠe kɛɛɠɛ ta dee ʋa, é ɠili anzai ʋa, ti felegɔ ta ɠɛ ga kpusɛ ɠila›?#19:5 Zen 2:24. 6Naazu ti la mɔ ga nu felegɔ, ta niina ga kpusɛ ɠila kpe. Naa ɠa é ba, nu nɔpɛ ge mina naa ɠaaɠwɛ, nii GALA ge kpɔgai su.»
7Kɛlɛ Faliziɛinti ti ɠɛni ma: «Lee vaa zu mu Moize devei veai ga zunui ɠa zoo vulu zaa zɛʋɛi veezu anzai ya, ti bali ma ta naa?»#19:7 TSV 24:1. 8É ti wooɠaaʋoteni, é ɠɛ ti ma: «Wa-ɠikpaai maaʋele ɠa é kɛɛni, Moize ɗa va bu ga wo ɗa ɠɛlɛ wo-anzaiti ba. Kɛlɛ mɔungi é la ɠɛni ɠana. 9Naa ʋoluma, nɔ̀un, nà bosu wo ma ga: Zɔi nɔpɛ é ɠɛlɛzu anzai ʋa, é taɠili sei, é wɛɛnziɛgi ɠɛa, kɛni ni anzai koloɠolo kɛɛʋɛ.»
10Ná-kaladopoiti ti ɠɛni ma: «Ni ʋele ɠana zunui ɠɛʋelei la ti yɔɠɔzu ta anzai, é la vizɔni mu ga nu ʋa anza vulu.» 11É ti wooɠaaʋoteni, é ɠɛ ma: «Ɛsɛ pɛ ge la zoosu yeezeizu naama wooi wu, kɛni zɔiti nɔ niiti GALA ge ma zobogi veai ti ʋɛ. 12Tɔɔzei tanigaa ta ná ti la zooga anza zeizu mazɔlɔɔ ti zɔlɔɔgɛ ɠana, tanigaa ti ná niiti ti sɔlɔɔgai ga nuiti saɓui, taɠiligaa ti ɠɛlɛʋɛ anza zei vai ʋa geeɠɔlɔgi ma masadai maaʋele zu. Zɔi nɔpɛ a zoo yeezeizu faa wu, naama nui yeezei nii wu.»
Yesu yeezei vai doungoiti bu
(Maleke 10:13-16; Luke 18:15-17)
13Nuiti ti ʋaani ga doungoiti Yesu ʋɔ, nii a kɛ é yeela ti ma, é GALA fali ti ʋɛ. Kaladopoiti ti ɠɛni zelii losu naama nuiti ma. 14Kɛlɛ Yesu ɠɛni ti ma: «À ɓe doungoiti ba, ti ʋa pɔ̀. À mina pele leʋe ti luɠɔ, tɔɔzei geeɠɔlɔgi ma masadai ɠa ga naati tɔnɔ, niiti ti ga ti ɠɛʋele.» 15Naa ʋoluma é yeelaani ti ma, é zɛba é zeɠe miná, é ɗa li.
Naavolo nuiti ta GALA ná-masadai
(Maleke 10:17-31; Luke 18:18-30)
16Zinipoi ta maaɓuɠani ba, é ɠɛ ma: «Kalamɔn, faa ʋagɔi ɓɛgele ɠa maanɛai ga gè kɛ, gè ʋa ɠɔoɠɔ zɛnvui zɔlɔɔ?» 17Yesu ɠɛni ma: «Lee vaa zu è gàazaɠasu naa ma, nii pagai? Gila kpe nɔ ɠa pagai. Ni ɗa pɔ ga è lɔ ɠɔoɠɔ zɛnvui zu, deveiti so.» 18Zunui ɠɛ ma: «Devei naati ta ga ɓɛgeleni?» Yesu gooɠaaʋoteni, é ɠɛ ma: «Mina nu ʋaa, mina wɛɛnziɛ bo, mina unma wo, mina zɛɛ zeele woo wo, 19è-ɠɛɛ lɛbi ta è-lee,#19:18-19 Ɛgz 20:12-16; TSV 5:16-20. è-zeiɲɔɠɔi nɛɛ ʋɛ, eɠɛ ɗa ɓɔɠɔi.»#19:19 Lev 19:18.
20Zinipoi ɠɛ ma: «Gè naama leveiti pɛ soga. Ɓɛgele ɠa niina é ʋoluzu, gè la dɛ kɛɛni?» 21Yesu ɠɛni ma: «Ni ɗa pɔ ga è laazeeli, li, è è-ɠɔligiti pɛ pɔdi, è ma naavoloi ve bala nuiti bɛ, naazu ɗa naavolo zɔlɔɔ geeɠɔlɔgi zu. Naa ʋoluma, ʋa, è ʋilɛ pòlu.» 22Zinipoi naama wooi mɛnigai ma, é li ga ziiɓɔlɔi, tɔɔzei kɔligi wola mɔinni.
23Yesu zɛba é ɠɛ ná-kaladopoiti ma: «Gè bo wo ma ga gaamai, kpɛtɛ nui lɔɔ vai wola ɓaaʋɛ geeɠɔlɔgi ma masadai zu. 24Nà bosu wo ma ɓalaa ga ɲɔmɛi leʋe fai la ɓaani sɛɠilɛ zeɠei zu, é ʋa zeeli kpɛtɛ nui lɔɔ vai zu geeɠɔlɔgi ma masadai zu.»
25Kaladopoiti ti naa mɛnigai ma, ti wola laavɔɔni, ti gaazaɠa, ti ɠɛ ma: «Ɓɛ ɠa mu a zoo ɠizosu?» 26Yesu wɛlɛni ti ʋa, é ɠɛ ti ma: «Naa la zooga é ʋa ɠɛ nuɓusɛiti zea, kɛlɛ fai pɛ ka zoo ɠɛɛzu GALA zea.»
27Piyɛlɛ zɛba é kpɔɛi zeɠe, é ɠɛ ma: «Gá ma? Gi fai pɛ zɛga ná, gi ʋilɛ è ʋolu. Gɔnɔi ɠa ɠɛɛzu ɠale?» 28Yesu gooɠaaʋoteni, é ɠɛ ma: «Gè bo wo ma ga gaamai, siɛgi zu etea niinɛi ɠulazu la, Nu ná-Doun Zunui ɠa ʋaana, é zei ná-lɛbiya masa kpɔkpɔgi ɠa, naazu wɔigiti kpein wo ʋilɛgai pòlu, wa ɠɛ zeini masa kpɔkpɔ puugɔ maazu felegɔ (12) ɠa, wo ɗa Izilayɛle woloda puugɔ maazu felegɔiti (12) tukpɔɠaaleʋe. 29Zɔiti nɔpɛ ti zeɠezu ta-ʋɛlɛiti ba, ti-ɠɛɛlointi ɓaa ti-ʋaazeelaiti ba, ti-ɠɛɛni ɓaa ti-leeni ba, ti-lointi ba, ɓaa ta-lii ɠɛɛzuʋɛti ba nɔ̀un maaʋele ma, ta ʋaazu naati ma ʋɛɛda ungilagilagi zɔlɔɔsu, naa ʋoluma ta tɔnɔ zɔlɔɔ ɠɔoɠɔ zɛnvui zu. 30Kɛlɛ nu mɔungiti ma mɔinmɔin ka ɠɛ ga ma ɠaaɓelagiti, tama ma ɠaaɓelagiti ma mɔinmɔin ge ɠɛ ga ma mɔungiti.
Currently Selected:
Matiyo 19: GDZ
Highlight
Share
Compare
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
