Matiyo 11
11
Ɓɛɛni ka ga Yesu ta Zan Ɓatisete?
(Luke 7:18-35)
1Yesu ɓegai ma ga naama leveiti fe keela puugɔ maazu felegɔiti (12) zea, é zeɠeni ná, é li, é ɗa kalagi wo, ta é ɗa GALA daawooi laazeeli taaiti su ná maaɠoolii zu. 2Zan yɛni kasoi ɠa, é Kilista ná-kɛɛwotiiti ma wooi mɛni. É ná-kaladopoi tanigaa leʋeni, ti gaazaɠa, ti ɠɛ ma: 3«Ɗa ɠa è ga naama nui, nii maanɛai ga é ʋa, ɓaa gi taɠili maaɓɔun?»
4Yesu ti wooɠaaʋoteni, é ɠɛ ti ma: «À li, wo naa zuɠula Zan ma, nii wo mɛnisu, ta wo kaazu: 5Gaazuɠole nuiti gaazu ɠa zeɠezu ma, mɛɠɛlɛ nuiti ti ɗa ziɛ ga pagɔ, gee nuiti ti ɗa ɲade, goizuɓɔlɔ nuiti ti ɗa faa mɛni, gɔvɛiti ti ɗa wuzeɠe, woo niinɛ ʋagɔi laa ɠa zeelizu bala nuiti ma. 6Undaanɛ nu ɠa ga naama nui, nii é la loa kakagi zu ga nɔ̀un maaʋele.»
7Tɛi Zan ná-keelaiti ti ɠɛni liizu, Yesu tɔɔzeini ga ɓɔɛa bɛbɛi ʋɔ, é ʋilɛ Zan ʋa, é ɠɛ ti ma: «Ɓɛgele ɠa wo liini kaazu teʋebai zu? Seeligi nii fiilɛi ɲiikpisu ɓaa? 8Leeni ɠa mu wo liini kaazu? Nui nii maaɠiliai ga seɠe ʋapagiti ɓaa? Niiti ti maaɠiliai ga seɠe ʋapagiti, naati ta masa pɛlɛiti bu. 9Ɓɛgele ɠa mu wo liini kaazu? GALA goo wo nu? Gaama ɠana, nɔ̀un nà bosu wo ma ga teʋegɛ GALA goo wo nu ʋa. 10Tɔ ɠa sɛʋɛai ná-faa zu GALA Sɛʋɛi zu ga:
‹Nà nà-keelai leʋesu è luɠɔ,
é ɗa-ʋelei ɓɛtɛ è luɠɔ.›#11:10 Mal 3:1.
11Gè bo wo ma ga gaamai, nui kpein nii anzanu sɔlɔɔgai, tanɔpɛ ge la dɛ ɠulani, nii bɔɔlɔai é leʋe Zan Ɓatisete ʋa. Tama zɔi dɔiɗai geeɠɔlɔgi ma masadai zu, naa wɔɔlɔʋɛ ba. 12É zo Zan Ɓatisete ná-yeeɠɛɠalaiti ma, é zeeli za ma, geeɠɔlɔgi ma masadai ɠa zeeɠaaɓaai laawu,#11:12 geeɠɔlɔgi ma masadai ɠa zeeɠaaɓaai laawu: Tati pelei taɠili ɓalaa ka ga nii: geeɠɔlɔgi ma masadai ɠa leʋe pelei ɠaiziɛzu ga maaɓaai zeeɠaaɓaa nuiti ka ti pɔ ti seɠe ga tɔnɔ.#11:12 zeeɠaaɓaa nuiti ka ti pɔ ti seɠe ga tɔnɔ: Tati pelei taɠili ɓalaa ka ga nii: zeeɠaaɓaa nuiti ta valazu ba 13Tɔɔzei GALA goo wo nuiti pɛ ta tɔ sɛʋɛi, ti GALA gooi wogɛ eyɛsu é zeeli Zan ma. 14Ni wa pɔ ga wo la da, tɔ ɠa é ga Eli, nii ná-fai wogai ga toɠa ʋaazu. 15Zɔi faa mɛni goiyeɠe ba, naama nui nii mɛni.
16«Ɓɛ ɠa mu nà niizuʋɛ nuɓusɛiti pokɔɠɔ ma? Ti ɠulaʋɛ ga doungoiti ti zeini dɔɔɠɔ ɓalagi zu, ti ɗa wooɠula ti-wɔɔlaiti ma, ti ɗa ɠɛ ma:
17‹Gi koolei vɛa, wo la kuai woni,
gi saa zu wuyei loa, wo la ɓɔɠɔ maawɔinni.›
18Tɔɔzei Zan ʋaani, é ɗa zugi zo, é la dɔɔ ɓɔlezu, ti ɠɛ ma: ‹Inɛgi ɠa su!› 19Nu ná-Doun Zunui ʋaa, é ɗa daamii ta kpɔɔlei wo, ti ɠɛ ma mɔnɔ: ‹Zunui nii ɠa ga ɠulukpu nu ta dɔɔ ɓɔle nu wolai. Toɠa ga mulu zo nuiti ta kotoba nuiti ti-wɔɔlai.› Kɛlɛ ɠimalai ná-kɛɛwotiiti ta dɛɛzu ga telebogɛ.»
Kidaaleʋelala laaiti
(Luke 10:13-15)
20Yesu zɛba é ɗa zeli ɓaaɓaagi lo taaiti ma, ʋɛti é ná-laavɔɔ vai bɔɔlɔzu ɠɛɛni náti, mazɔlɔɔ taai naati su nuɓusɛiti ti la ɠɛni ti-ziɛ ʋelei maavaliboni. 21«Maanɔɠɔi ɠa è ʋɛ, Kolazɛn, maanɔɠɔi ɠɛ è ʋɛ, Ɓɛtesayida! Mazɔlɔɔ laavɔɔ vai niiti ti ɠɛai wo ʋɔ bɛ, ni naa ɠɛɠalai ɠɛɛni Tiil ta Sidɔn laaiti su, eɠɛ kaite ti zu nuɓusɛiti ti ti-ziɛ ʋelei maavaliboga, ti saa wɔlɔ wo seɠeiti too ɠɔba, ti zuʋui ʋu tɔungiti su. 22Naa ɠa é ba, nà bosu wo ma ga: Tukpɔɠaaleʋe voloi, wa-lukpɔi ɠa ɓaa, é leʋe Tiil ta Sidɔn laaiti tɔnɔi ʋa. 23Ɗɔun, Kapɛɛlɛnawume, ɗa kaazu ga è-lɔɠɔi ɠa wɔɔlɔzu, è zeeli geeɠɔlɔgi zu ɓaa? Naa li poun! Ta è yei gɔvɛalaazu. Mazɔlɔɔ laavɔɔ vai niiti ti ɠɛai è ʋɔ bɛ, ni naa ɠɛɠalai ɠɛɛni Sɔdɔme taai zu, eɠɛ é ná dɛ zaaɠaza. 24Naa ɠa é ba, nà bosu wo ma ga: Tukpɔɠaaleʋe voloi, wa-lukpɔi ɠa ɓaa, é leʋe Sɔdɔme yooi nɔnɔi ʋa.»
À ʋa pɔ̀, nà dooɠo fe wo ʋɛ
(Luke 10:21-22)
25Naama yeeɠɛɠalai zu, Yesu ɠɛni ma: «Ee, Kɛ̀ɛ, geeɠɔlɔgi ta zooi Maliɠii, nà è mamasu, tɔɔzei è niima vaiti dɔɔɠua ɠima nuiti ta keleɠele nuiti ba, è ti lɛ ga naati, niiti ti yeemalɔigai. 26Gaamazu, Kɛ̀ɛ, ʋele ɠana nɛai la è ʋɛ. 27Kɛ̀ɛ fai pɛ puuʋɛ zèezu. Nu nɔpɛ ge la Doun Zunui ɠwɛɛ, é ɠula Ɠɛɛɠɛi ʋolu, tama nu nɔpɛ ge la ɓalaa Ɠɛɛɠɛi ɠwɛɛ, é ɠula Doun Zunui ʋolu, ta naama nui nii Doun Zunui a ɠɛna pɔ é dɛɛ la. 28À ʋa pɔ̀, wɔi pɛ wo ɓɔlɔai, kasɔi laani wo unma, nà dooɠo fe wo ʋɛ. 29À nà-unbawului zeɠe, wo da unma, wo lɔ pɔ̀ bɛ kala pelei zu, mazɔlɔɔ nà-fai ɠaanɛɛʋɛ, gè ɠɛ ga ɓɔɠɔmaayei nu zìimaʋɛ, wa dooɠogi zɔlɔɔ ɓɔɠɔ vaa ma. 30Nà-unbawului zeɠezu la ɓaani, kasɔi ɓalaa gè daazu wo unma, feɠagɛ.»
Currently Selected:
Matiyo 11: GDZ
Highlight
Share
Compare
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
