Luke 4
4
Tɛgai nii é zeelini Yesu ma
(Matiyo 4:1-11; Maleke 1:12-13)
1Yesu laavega ɠɛni de ga Zɛnvu Ɲadegai, é zeɠe Zuludɛn. Zɛnvu Ɲadegai loni tuɠɔ, é lii la teʋebai zu. 2É kɛɛni ná ga folo ʋuunaanigɔ (40), Inɛgi ɠɛni tɛɛzu ga. É la ɠɛni daami nɔpɛ boni naama voloiti su. Naati teʋegai ma, pului soni.
3Inɛgi ɠɛni ma: «Tɛi è ga GALA Doun Zunui, devei ve kɔtui nii ya, é valibo ga ɓului.» 4Yesu gooɠaaʋoteni, é ɠɛ ma: «Sɛʋɛʋɛ GALA Sɛʋɛi zu ga: ‹Nui la zɛnvui woga ga daamianigi nɔ.›#4:4 TSV 8:3.»
5Naa ʋoluma, Inɛgi liini la ada ɠaaɠoozagi ta, é eteai zu masadai pɛ dɛɛ la, yeeɠɛɠala ɓuɠa ko nɔ laawu, 6é ɠɛ ma: «Nà niima masadaiti pɛ ma zobogi ta ma lɛbiyaiti pɛ fe è ya, mazɔlɔɔ ti pɛ puuʋɛ zèezu, ta nà zoo feezu nu nɔpɛ zea, nii a nɛ bɛ̀. 7Ni ɗa nɔkɔna bù, ti pɛ ka ɠɛ ga ɗɔnɔ.» 8Yesu gooɠaaʋoteni, é ɠɛ ma: «Sɛʋɛʋɛ GALA Sɛʋɛi zu ga: ‹Nɔkɔ Maliɠii ɗa-ƓALAGI wu, tɔ ɠila kpe nɔ ɠa ɗa dɛbi.›#4:8 TSV 6:13.»
9Naa ʋoluma, Inɛgi liini la Zeluzalɛme, é pilɛ GALA sei ʋɛlɛi ungaʋɛ, é ɠɛ ma: «Tɛi è ga GALA Doun Zunui, zeɠe ʋɛ, è ʋili bu, 10mazɔlɔɔ sɛʋɛʋɛ GALA Sɛʋɛi zu ga: ‹Toɠa devei ve ná-geezuɠeelaiti zea ɗa-vaa zu, ga ti ɓaa è maazu.›#4:10 Guy 91:11. 11Bogɛ ɓalaa ga: ‹Ta è la yeezu, nii a kɛ è-ɠɔɠɔi mina ziɠa kɔtu ʋa.›#4:11 Guy 91:12.» 12Yesu gooɠaaʋoteni, é ɠɛ ma: «Sɛʋɛʋɛ GALA Sɛʋɛi zu ga: ‹Mina Maliɠii ɗa-ƓALAGI zuɠɔɠɔ.›#4:12 TSV 6:16.»
13Inɛgi ɓega ʋoluma ga tɛ ga, é maaɠoozani ba, eyɛsu yeeɠɛɠala ɠili.
Yesu ná-botii lɔɔzei vai Galilé
(Matiyo 4:12-17; Maleke 1:14-15)
14Yesu ɠaleni ma Galilé yooi zu, Zɛnvu Ɲadegai ná-zɛbɛi ba. Tɔɠɔi ɠulani zou yɔɠɔzuʋɛ miná. 15É ɠɛni kalagi wosu GALA dɛbi ʋɛlɛiti bu, ɛsɛ pɛ ge ɠɛni dɛbizu.
Nazalɛte nuiti ti ɠɛlɛ vai Yesu ʋa
(Matiyo 13:53-58; Maleke 6:1-6)
16É liini Nazalɛte, ʋɛ é kulasui woni ná. Dooɠo foloi é lɛɛni GALA dɛbi ʋɛlɛi wu, ʋelei nɔ é ɠɛni kɛɛzu la pɔlɔma. É wuzeɠeni ga é GALA daawooi ná ta ɠala. 17Ti GALA goo wo nui Ezayi ná-sɛʋɛi veeni zea. É suvieni, ʋɛ sɛʋɛai ná ga:
18«Màliɠii ná-Zɛnvui ɠa bà,
mazɔlɔɔ é gulɔ ɲadegai ziɛʋɛ mà,
nii a kɛ gè Woo Niinɛ Ʋagɔi laazeeli bala nuiti ma.
É tèʋegɛ ga gè unmɔɔ fai wo kɔɔ luɔiti ma,
gè gaazuɠole nuiti gaazuzeɠema vai wo ti ma,
niiti ti suziɠaai laawu, gè yeeɓe naati ba, ti ɠɛ ɓɔɠɔ yeema.
19Gè Maliɠii ná-faaɓɔɠɔ ɠɛɛ ɠonagi ma wooi laazeeli.»#4:18-19 Eza 61:1-2 bogɛ é zoloo Gɛlɛke woo zɛʋɛ wɔlɔmai ma.
20Naa ʋoluma Yesu sɛʋɛi maaɓilini, é fe botiɠɛ nui ya, é li, é zei. Niiti pɛ ti ɠɛni GALA dɛbi ʋɛlɛi wu, ti pɛ ti ɠaazuloni ba. 21É zɛba é ɠɛ ti ma: «GALA Sɛʋɛi zu wooi nii wo mɛnigai, é ʋilɛga su, za.»
22Ti kpein ti zeele wooi woni ná-faa zu. Ti laavɔɔni ga woo nɛɛnɛgiti, niiti ti ɠɛni ɠulazu da, ti ɗa ɠɛ ma: «Kɛbɛ Zozɛfe ná-doun zunui ɠa, kɛlɛ?»
23Yesu ɠɛni ti ma: «Wa ʋaazu niima vaalaalii wosu mà nɔ ti: ‹Ɗɔɠɔtɔlɔi, ɓɔɠɔ ɠɛdɛna.› Naa ʋolu wa ɠɛ mà: ‹Fai niiti gi mɛnigai ga è ti ɠɛɛʋɛ Kapɛɛlɛnawume, naa ta ɠɛɛna è ɓɔɠɔ yooi zu.› » 24É ɠɛni ti ma ʋolu: «Gè bo wo ma ga gaamai, GALA goo wo nu nɔpɛ ge la ɗa ga zeezeibu zɔlɔɔ kpɔɠɔ yooi zu. 25Gè bo wo ma ga gaamai, poanzai mɔinni Izilayɛle yooi zu Eli ná-yeeɠɛɠalai, siɛgi zu geeɠɔlɔgi laaɠuluni da kona saʋagɔ alu dɔzita laawu, pulu wolai zɛba é loo zooi ɠa ná pɛ. 26Kɛlɛ GALA ge la ɠɛni Eli leʋeni tanɔpɛ pɔ bɛ, kɛni poanzai nii é ɠɛni Salɛpɛta, Sidɔn yooi zu.#4:26 Wɛlɛ ʋɛ: 1Ma 17:8-16. 27Gee nui ɓalaa mɔinni Izilayɛle yooi zu, GALA goo wo nui Elizé ná-yeeɠɛɠalai, kɛlɛ tanɔpɛ ge la ɠɛni ɲadeni, kɛni Siili yooi zu nui Naaman.»#4:27 Wɛlɛ ʋɛ: 1Ma 5:1-14.
28Niiti pɛ ti ɠɛni GALA dɛbi ʋɛlɛi wu, ti naama wooi mɛnigai ma, ti pɛ ti yiiɠulani ga gola. 29Ti wuzeɠeni, ti ɗa zɔɔ ba, ti kula taai ʋa, ti liini la gize zɛlɛgi ɠa, nii ta-laai loga ɠɛni de ma, nii a kɛ ti daaʋili, é loo bu. 30Kɛlɛ é leʋeni ti zaama, é ɗa li.
Yesu inɛ su nui ɠɛdɛ fai
(Maleke 1:21-28)
31É liini Galilé laa wolai zu, nii daa ga Kapɛɛlɛnawume. É ɠɛni nuiti kalasu dooɠo foloi, 32nuiti ti wola laavɔɔni ga ná-kalabo pelei, tɔɔzei é ɠɛni ɓɔɛzu ga zobogi.
33Zunui ta ɠɛni GALA dɛbi ʋɛlɛi wu, nii kɔzɔba yɛnvui ɠɛni su. É kpeei looni, é ɠɛ ma: 34«Ee, Nazalɛte nui Yesu, ɗa-vaa ɓɛgele ɠa é gá-vaa zu? È ʋaaʋɛ gi undaaʋilisu ɓaa? Gè è ɠwɛni, ɗa ga GALA ná-Nu Ɲadegai!» 35Yesu devei veeni zea ga sɛbɛi, é ɠɛ ma: «É vɔ, ɠula zunui tɛi su!» Inɛgi zunui loai ma ti zaama, é ɠulani su, é la faa ɲɔu nɔpɛ kɛɛni la. 36Ɛsɛ pɛ daavɔɔni, ti ɗa ɓɔɠɔ ɠaazaɠa ga: «Wooi ma zii ɓɛgele ɠa ga nii? Toɠa kɔzɔba yɛnvuiti devezu ga zobogi ta zɛbɛi, naati ti ɗa ɠula nuiti su.» 37Maawooi ɠɛni ziɛzu ná maaɠoolii pɛ su.
Yesu seeɓɛ nu mɔinmɔin kɛdɛ fai
(Matiyo 8:14-17; Maleke 1:29-34)
38Yesu ɠulaai ma GALA dɛbi ʋɛlɛi wu, é liini Simon ná-pɛlɛi wu. Kɔlɔkpadima wolai ɠɛni Simon mɔɛin ʋa, é laani. Ti Yesu maanɛɛnɛni ga é fai ta ɠɛ naa ʋɛ. 39Yesu zɛlɛni maazu, é devei ve ga kɔlɔkpadimai zeɠe ba. Kɔlɔkpadimai ɠaayeini. Gaamago, anzanui wuzeɠeni, é tɔɔzei ga é ɗa ti maaleʋebo.
40Foloi liai ma, niiti seeɓɛ nuiti ti ɠɛni ti ya ta-ʋɛlɛiti bu, seeɓɛ laalitaaligiti ti ʋa, ti ʋaani ga naati pɔ. É yeelaani ti ɠilagilagi pɛ ma, é ti ʋalo. 41Inɛgiti ɓalaa ti ɠɛni ɠulazu nu mɔinmɔin su, ti ɗa kpeei loo, ti ɗa ɠɛ ma: «Ɗa ga GALA Doun Zunui!» Kɛlɛ é ɠɛni devei veezu ti ya ga sɛbɛi, é la ɠɛni vaazu bu, naati ti ʋa ɓɔɛ, mazɔlɔɔ ti ɠɛni kwɛɛni ga tɔ ɠa é ga Kilista.
Yesu GALA daawooi laazeeli vai
(Maleke 1:35-39)
42Geelaalaogai ma, é ɠulani, é li teʋebai zu. Bɛbɛ wolai ʋilɛni, é ɗa gaiziɛ. Ti kaai ma, ti ɠɛni pɔ ga ti suzo, é mina zeɠe ti ʋa. 43Kɛlɛ é ɠɛni ti ma: «Kɛni gè GALA ná-masadai ma Woo Niinɛ Ʋagɔi laazeeli ɓalaa zɔɔma laaiti su, tèʋe ungi ɠana.» 44É ɠɛni GALA daawooi laazeelizu GALA dɛbi ʋɛlɛiti bu, Zudé yooi zu.
Currently Selected:
Luke 4: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
