Gɔlɔ Wooiti 3
3
Kidaaʋili golai, ta kito kitei ma ungi
1Nà ga zunui nii unfegi zeeliai ma
Maliɠii ná-ziiɠaawana ɓakɔi ya.
2É liini ga ze, gè siɛi wo
kpidii zu, wozakala su la de.
3Nà nɔ yeenɔpɛ nɔ
é yeei ʋɛɛzu bà.
4É mà zuai vɔɔni su ta kɔ̀lɔgi,
é mà ɠaeiti galeɠale.
5É koozuʋiligi ta kpɔlɔi
latini mà eɠɛ siɠigi.
6É dɔ̀ɔni kpidii zu
eɠɛ nuiti ti zaani kaite.
7É màalatini ga gè mina ɠula,
é màavelevele ga yɔlɔɠɔiti, ti ɗa kàta.
8Gè ɓɔlɔa ga kpeei loa, gè kpɔbai ɠaiziɛ,
é pele leʋeni nà-maanɛɛnɛ wooiti pɛ tuɠɔ.
9É pelei laaɠuluga tùɠɔ ga kɔtu ziɠigiti,
é nà-peleiti seɠeni ma.
10É ɠɛni bɛ̀ ga filɛ zuai, é zei tùɠɔ,
ɓaa zalai é ɓɔɠɔ maalɔɔɠuai.
11É sèɠea pelei ʋa, é bàliʋali,
é fàlibo, é kɛ̀ ga zou vɔɔi.
12É ná-mɛɛin zumɛɛnga,
é tete mà, ga é pili mà.
13É sàamaʋɛ zuvoloni ga
ná-mɛɛinti pɛ.
14Nuɓusɛiti pɛ ta ɲɛɛɠulazu sù,
ti ɗa dàalɔɔ guyei zu yeenɔpɛ.
15É kògi zulaave ga ani wanaiti,
é ani wanai ɠɛɛni ga nà-kpɔɔle ɗɛi.
16É ɲìigaiti gaaɠaleni ga ɲaɠae numagai,
é zuʋui ziɛ mà ɲɛgɛlɛin.
17É ziilɛigi ɠulaa zèa,
gè yeema undaanɛɛi ma.
18Gè ɠɛni ma: «Kito ge la bɛ̀,
kì ge la mɔ loni Ɠɔoɠɔ GALAGI ʋa!»
19Ee! Ɠizɛ nà-nimizai zu ta nà-kpɔlɔi,
toɠa ga anivebɛi ta ani wanai gè ɓɔɔlezu la.
20Kì ka su, gè la yeema ma ɠɔ,
toɠa lɔɔzu ga ze.
21Kɛlɛ wɛlɛ nii gè pɔ gè ɗa ɠisiɛ su zìimaʋɛ,
wɛlɛ nà-kitogi ma ungi ʋa:
22Ɠɔoɠɔ GALAGI zu la ɓɔlɔa ga ná-wooɠɛɠiladai,
kwɛ ge la ná-maawɔinɠai ʋa.
23Toɠa ɗa ti niinɛ sobu-o-sobu.
Ee, Ɠɔoɠɔ GALAGI, ɗa-wooɠɛɠiladai wola wɔɔlɔʋɛ!
24Nà bosu, gè ɠɛ ma: «Ɠɔoɠɔ GALAGI ɠa ga nà-naavoloi,
naa ɠa é kɛɛzu kìgi logai ba.»
25Ɠɔoɠɔ GALAGI laavegɛ ga nuɓɔɠɔlai naama nui ʋɛ nii é ɠitosu ba,
ta zɔi é gaaʋotesu ma.
26Pagɛ nu maaɠɛ kpɔ,
è Ɠɔoɠɔ GALAGI ná-unmɔɔ fai maaɓɔun.
27Pagɛ nui ma è yeezei faaɓaagiti bu
è ma nu niinɛlai zu.
28È zei yɛ, è ɠaalɛi,
mazɔlɔɔ naa ɠa deveai è ma.
29È maayei, è laa lɔ fufiligi zu,
kito ka naa zu tanisu!
30È ɠomagi ve è woizuloɠa nui ya,
è ɓɔɠɔ yɛ ná, ɓaaɠula è ma.
31Mazɔlɔɔ Maliɠii la ɗa ga nu ʋiliga ya
é ʋa yɛsu ɠɔ.
32Kɛlɛ ni a nu ɠaazuɠili vai ɠɛɛna,
toɠa maawɔinɠai ɠɛ,
é zoloo ná-wooɠɛɠilada wolai ma.
33Mazɔlɔɔ ziima la de ga é ʋa nuɓusɛiti unfe,
é ʋa ti ɓɔlɔ.
34Siɛgi zu ti ɠɔɠɔlosu da
zooi zu ɠasoa nuiti pɛ ma,
35siɛgi zu ti lɛɠɛzu la GALA su, nii é Anii-Pɛ-Unda,
ti kakama vai ɠɛ ga nuiti,
36siɛgi zu ti nui ta ná-tukpɔi maaʋesu da,
Maliɠii la ɗa ga naa ɠaa ɓaa?
37Ɓɛ ɠa a wooi wona, su vaiti ta ɗa ɠɛ?
Maliɠii laade é ʋa ɠɛ devei wosu ɓaa?
38GALA nii é Anii-Pɛ-Unda, naa laawooi laade
fai pɛ ge ɠulazu su, maanɔɠɔi ta undaanɛɛi?
39Leeni vaa zu nuɓusɛi a kpee loo, tama é vulua?
Ɛsɛ ge kpee loo ga ná-kotoiti faa.
40De ɠida de-ziɛ ʋeleiti bu,
de ɠale ma, de ʋa Ɠɔoɠɔ GALAGI ʋɔ.
41Ade GALA fali ga yii pɛ, de yeeiti tɛ
GALA pɔ pelei é geeɠɔlɔgi zu.
42Gi ɗa-lɔgiti koloɠoloni, gi ɓakani!
Ɗa ma, è la ɠɛni gi zuvaayɛni!
43È ɓɔɠɔ maaɠilini ɗa-yiiɠaawanai zu,
è ʋilɛni gi ʋolu,
è gi ʋaa, è la gi maawɔinɠaani.
44È ɓɔɠɔ maalɔɔɠuni ga tonaɓiingi,
gá-ƓALA fali wooiti ti ʋa zeeli è ma.
45È gi ɠɛɛni ga kaʋai,
kaʋa luulaai nuɓusɛi zɔiti saama.
46Gi zili nuiti ta laalaosu
gi laalɔɠɔma.
47Gɔnɔi yɛga duai ma ta gaazulatigi,
ta faa zuɠoloɠologi, ta faaɓalakalagi.
48Gàazuɗɛiti ta ʋuuzu eɠɛ kɔtuɗɛiti
nà-nuɓusɛiti ta-vaaɓalakalagi maaʋele ma.
49Gɔlɔɗɛi ɠa gàazuʋɛti, maaleʋe la ba,
ti la looɠosu ɠɔ,
50eyɛsu Ɠɔoɠɔ GALAGI yɛ geezuʋɛ,
é maayei, é wɛlɛ, é ka.
51Nii é zeelizu nà-taazu anzalopoiti ma,
naa ʋɛtɛ fai ɠa kpɔ̀lɔzu gola.
52Ta pòlu, ti ɗa kpɛ̀ eɠɛ wɔni,
ti ga sìli nuiti, un ge la ba.
53Ti mà vului lɔɔɠua zeɠezaɠai zu,
ti kɔtu wolai la màazu.
54Ziɛi lɛɛni, é ɓudɛ nɔ̀ungi maazu,
gè ɠɛni ɠɛɛzu: «Ùndaaʋiliga!»
55Ee, Ɠɔoɠɔ GALAGI, gè yɛni zeɠe ɓomaʋɛ,
gè wooɠula è ma.
56È nà-kpee wooi mɛnini:
«Mina woi zeɠe kpàla gooiti ma, ta nà-kidaaʋili kpeeiti!»
57Voloi gè wooɠulani la è ma, è maaɓuɠani bà,
è ɠɛni mà: «Mina lua!»
58Maliɠii, è màavaawoga,
è zɛ̀nvui unmɔɔga.
59Ɠɔoɠɔ GALAGI, è kakama vai ɠaa ti kɛai ga ze,
nà-tukpɔi lo bɛ̀.
60È pɛtɛga ʋelei ti potokulai ɠɛɛzu la ze,
ta ta-yaava vaiti pɛ dàalɔɠɔma.
61Ɠɔoɠɔ GALAGI, è ta-ʋoomu gooiti pɛ mɛnini,
ta ta-yaava vaiti pɛ dàalɔɠɔma.
62Sìli nuiti ta-ɓɔɛzuɠulaiti ta ta-ɠisiɛiti,
naa pɛ ka ɠɛɛzu dàalɔɠɔma foloi laawu ɲɛgɛlɛin.
63Ti ɠɛni zeini, ti ɠɛni loni,
wɛlɛ, nà ɠa ti dàalɔɔzu ta-wuyeiti su.
64Ee, Ɠɔoɠɔ GALAGI, ti zo
eɠɛʋelei ti kɛɛni la ga ze.
65Ɗa ti-yii zasa ti ɠoozu,
naa ɠa a ɠɛ ga ɗa-voovooi ti ʋa.
66Ɗa ɗa-yiiɠaawanai ʋilɛ ti ʋolu,
è ti-ma zuwu ɠaaleʋe eteai zu, ee, Ɠɔoɠɔ GALAGI!
Currently Selected:
Gɔlɔ Wooiti 3: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
