Zowɛle 4
4
Zii ɠiligiti ta-lukpɔi ɠaaleʋe vai GALA bɛ
1«Gaamazu, naama voloiti,
siɛgi zu gè Zuda ta Zeluzalɛme nuiti gaaɠalesu da ma ta-you wɔlɔmai zu,
2nà zii ɠiligiti kpein gaalɛ ba,
gè ti yei pɛtugi zu, nii daaseigi ga: ‹Ɠɔoɠɔ GALAGI ɠa tukpɔɠaaleʋezu›.
Nà tukpɔi laalɛ ti wu miná,
tɔɔzei nà-nuɓusɛiti ta nà-pogani vaa zu, Izilayɛle nuiti,
niiti ti ɠɛa ti vazani zii ɠiligiti saama,
ta nà-zooi vaa zu, nii ti ɠɛa gaaɠwɛɛni ʋa.
3Ti nà-nuɓusɛiti gaaɠwɛɛʋɛ ʋa ga kpakutoomai,
ti zunu loungoiti pɔdiʋɛ, ti koloɠolo anzanuiti geya ga ma walii,
ti anzanu loungoiti pɔdi, ti dɔɔi ɠeya ga ma walii, ti kpɔle.
4«Wa ɓalaa, Tiil ta Sidɔn laa wolaiti,
naa ʋɛɛ Filisiti ɠoʋi laaiti kpein ba,
leeni ɠa wo kolizu mà?
Wa pɔ wo potokula ɠɛ ga ze ɓaa? Ɓaa wo laalɛ bù?
Ni naa ʋe, su la ɠooza,
gè wa-ɠɛɛwotiiti ma ɠasɔi laa wo unma.
5Wo nà-walii ta nà-zanugi unmaʋɛ,
naa ʋɛɛ nà-sɔɔla ɓiigiti ba,
wo li ga tiye wa-ɠala pɛlɛiti bu.
6Wo Zuda ta Zeluzalɛme zei wo nuiti pɔdiʋɛ Gɛlɛki nuiti ma,
nii a kɛ wo ti maaɠooza ta-yooi ʋa.
7Kɛlɛ nɔ̀un, ʋɛ wo ti ʋɔdiai ná,
nà ti zeɠezu miná, gè ʋa ga tiye,
wa ma, faa ɲɔi nii wo kɛa ga tiye,
gè naa ɠaaɠale ma wo ma.
8Nà wo-loun zunuiti ta wo-loun anzanuiti pɔdi Zuda nuiti ma.
Tiya ɓalaa ti naati pɔdi Saɓa zei wo nuiti ma,
zooi naa zu nii maaɠoozaai.»
Mazɔlɔɔ Ɠɔoɠɔ GALAGI ɠa é boni.
Ɲɛpi ɠaaɓelagi ta tukpɔi
9À zeze ga nii zii ɠiligiti saama:
À kɔɔi ɠɛʋele ɓɛtɛ!
À kɔɔɠuluɓaiti buzeɠe!
Salaʋusuiti nuiti kpein, ti li kɔɔɠɔzuʋɛ,
ti lɛ, ti ɲɛpii ɠɔ.
10À wa-ɠaliiti gain ga boɠa zɔkpɔiti.
À wa-molo leʋe woɠaiti gain ga kpɛɛinti.
Zɛbɛsulala nui ɠɛ ma: «Nà ga kɔɔɠuluɓai!»
11À suvilɛ, wo ʋa,
wɔi kpein wo ga zii ɠiligiti, wo ná maaɠoolii zu,
wo ɠaalɛ ba.
Ee, Ɠɔoɠɔ GALAGI,
ɗa-ɠɔɔɠɔ nuiti teʋe ti laalɔɠɔma ná!
12«Zii ɠiligiti ti ʋilɛ pelei ma,
ti ɗa li pɛtugi zu, daaseigi ga: ‹Ɠɔoɠɔ GALAGI ɠa tukpɔɠaaleʋezu›.
Miná ɠa gè zeizu ná, gè zii ɠiligiti tukpɔɠaaleʋe,
niiti ti Izilayɛle maaɠoolii zu.
13À soo lufa leʋe woɠai zeɠe, mazɔlɔɔ moloi mɔa.
À dɔɔ ɠae ɠaaɠolo, mazɔlɔɔ dɔɔɓɔi kpɛtɛzuʋɛ laavega.
Diɠi wolaiti daavega, é ʋooʋa ma,
mazɔlɔɔ ta-vaa ɲɔi wɔɔlɔʋɛ.»
14Bɛbɛi ɠaawɔɔlɔʋɛ tukpɔɠaaleʋe ʋɛtugi zu.
Mazɔlɔɔ Ɠɔoɠɔ GALAGI ná-foloi maaɓuɠaa,
yeei é ʋaazu tukpɔi ɠaaleʋezu la náʋɛ.
15Foloi ta alugi ti zuɓidia,
somideɠaiti ti ma zezei ɠulaa ti ʋa.
16Ɠɔoɠɔ GALAGI ɠa zikɔzu Siyɔn,
gooi ɠa ɠulazu Zeluzalɛme,
geeɠɔlɔgi ta zooi ta ɓalizu.
Kɛlɛ Ɠɔoɠɔ GALAGI ɠa ɓaazu ná-nuɓusɛiti ma,
toɠa ga Izilayɛle nuiti dɔɔɠuzuʋɛ.
17«Wa suɠwɛɛ naazu ga nà ɠa gè ga Ɠɔoɠɔ GALAGI,
wa-ƓALAGI, é zeini Siyɔn, nà-gize ɲadegai ma.
Zeluzalɛme ɠa ɲade, wɛɛinti ti la mɔ leʋega ná.
18Názu, dɔɔ niinɛi ɠa ɠɛ ɠulazu gizeiti ba,
nɔnɔi ɗa yei gize ɓufɛgiti kakazuʋɛti,
ziɛ yei ʋeleiti kpein ta laa su Zuda yooi zu,
ziɛungi laa ɠa leʋe po Ɠɔoɠɔ GALAGI zei ʋɛlɛi wu,
é ɗa yei Akasia nɛmɛi zu.
19Ezipete yooi zu ɠa voo ga nuɓusɛi,
Edɔme yooi ɠɛ ga teʋebai,
tɔɔzei tooma vai ʋa, ti kɛai ga Zuda yooi,
ta sɔbalala nuiti ma ɲamai ʋu vai ti kɛai ná.
20Kɛlɛ Zuda yooi ta Zeluzalɛme zulaa ɠa ve ɠɔ ga nuɓusɛi.
21Nà ti maavaayɛsu, tɛiti ti-ma ɲamai ʋuai,
gè la ɠɛa dɛ ti maavaayɛni.
Ɠɔoɠɔ GALAGI zeizuʋɛ ɠa ɠɛ ga Siyɔn.»
Currently Selected:
Zowɛle 4: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.