Zowɛle 2
2
Maliɠii ná-foloi wola maaɓuɠaa
1À koolei vɛ Siyɔn,
wo kidaaʋili kpee loo nà-gize ɲadegai ma!
Zooi ɠa zei wo nuiti kpein ti ɓali,
mazɔlɔɔ Ɠɔoɠɔ GALAGI ná-foloi ɠa ʋaazu, gola maaɓuɠaa.
2Toɠa ga kpidi ɓɔi volo wolai,
buulaavegai ga tonaɓiingi ta ɓumugi.
Zɛbɛsu ɠɔɔʋɛbɛ wolai ʋɛtɛ, é ʋaazu,
ti ʋaazu, eɠɛʋelei wozai a ɗa seɠe la ma fuaa gizeiti ma.
Kaipa kɛɠala vaa la dɛ ɠaani,
tama eyɛsu pɛ kɛɠala vaa la mɔ ɠaa ʋelela ʋelei.
3Abui ɠa faa zuɠoloɠolo ɠɛɛzu tuɠɔʋelei,
abuzogi ɗa galai wo mulututu poluʋelei.
Aisa ti ʋa ʋa, zooi ɠɛa ɠɛɛni eɠɛ Edɛn kpelei.#2:3 Wɛlɛ ʋɛ: Zen 2:8-9.
Ti leʋegai ma, ná ɠɛa ga teʋebai maaluai,
ani nɔpɛ ge la ɠulazu ti yeewu.
4Ɗa ti ɠaana, ɗa ɠɛ nɔ sooiti,
eɠɛ kɔɔɠɔ nuiti ti ɓizɛzu sooiti kɔma.
5Ti-maalugi ɠɛɛʋɛ eɠɛ kɔɔɠɔ wotolo mɔinmɔingi lugi,
niiti ti ʋilisu kpɔɔnkpɔn gizeiti ma,
ɓaa eɠɛ abuzogi lugi, nii é kpataɠala fɔɔi ɠalazu,
ɓaa eɠɛ kɔɔɓɔ golai nii zeeɠaaɓaai, é lopele ɓɛtɛzu kɔɔɠɔ vai ma.
6Ti maaɓuɠazuʋɛ, ɛsɛ pɛ ka luazu,
nuiti gaazu ɗa ɓɔi yɔlɛ.
7Ta ɓizɛzu eɠɛ ɠuluɓaiti,
ta ʋilisu siɠigiti ga eɠɛ kɔɔɠɔ nuiti,
ɛsɛ ge ɗa li ga letegi nɔ,
ta la zeɠezu ná-pelei ʋa.
8Ta la bɔɔla laaʋilisu,
mazɔlɔɔ ɛsɛ ka nɔnɔ ma ʋele ʋa.
Ta faaɓaagi kpein maazuɓudɛzu, niiti ti ti luɠɔ,
faa nɔpɛ ge la zooga pele leʋesu ti luɠɔ.
9Ta taai maaleʋesu,
ti ɗa ɓizɛ siɠigiti ga,
ti ɗa lɔ pɛlɛiti bu ga fenɛtɛlɛ laa ʋelei eɠɛ unma nu.
10Zooi ɠa ɓalizu ti luɠɔ,
geeɠɔlɔgi ɗa ɲiikpi,
foloi ta alugi ti ɓidi,
somideɠaiti ta-wozakalagi lɔɔɠu.
11Naama ziɛ su Ɠɔoɠɔ GALAGI ɠa loni ná-kɔɔʋɛbɛi luɠɔ,
é ɗa ɓɔɛ ti ʋɔ ga woo wola.
Mazɔlɔɔ zɔiti ti ná-devei zosu, ti mɔinʋɛ, ti maayiki.
Ɠɔoɠɔ GALAGI ná-foloi ɠa ga folo wola, maayikiai,
ɓɛ ɠa a zoo é lo daawu?
Galemai Ɠɔoɠɔ GALAGI ʋɔ
12«À ɠale ma pɔ̀ ʋolu.
À ʋa pɔ̀ ʋolu ga wo-yii pɛ,
ga zu sogai, ta gɔlɔi, naa ʋɛɛ kidaaʋili kpeeiti ba,»
Ɠɔoɠɔ GALAGI wooi ɠana.
13Wo ɠɔba zeɠeiti tɛi wa ti ʋali ga, kɛni wo-yiiti.
À ɠale ma Ɠɔoɠɔ GALAGI ʋɔ, wa-ƓALAGI,
mazɔlɔɔ toɠa ga maawɔinɠa ƓALAGI, nii é zaalai veezu,
zii la ɠulaa fala, kpɛtɛai wooɠɛɠiladai zu,
a ɗa zeɠe maanɔɠɔi naa ʋaa vai ʋolu, é ɠɛa deveni ga é ʋaa la.
14Ɓɛ ɠa é kwɛɛ ni tanisu kigi la valiboga,
é ʋa tuyai loo wo ʋɛ ga pooʋaa?
Wa zoo naazu wo ʋa pɔ ga vebɛaniiti ga moloi ta dɔɔi.
15À koolei vɛ Siyɔn,
wo zu so kui lo, wo gaalɛbai maaloli.
16À nuɓusɛi ɠaalɛ ba,
wo maaɓɔ ɲadegai wo.
À nu wɔlɔiti gaalɛ ba,
ta buzeɠe niinɛgiti,
naa ʋɛɛ ɲiimiɓɔlegiti ɓalaa ba.
Anzazini niinɛi ɠula daa ʋɛlɛi wu.
Anzalopo vulua niinɛi ɓalaa ɠula maazaa pɛlɛi wu.
17Zalaɠa ɠula nuiti ti wɔlɔ tɛɛ wosuʋɛ ta zalaɠa ɠulazuʋɛ yɔɠɔzuʋɛ,
tɛiti ti botii ɠɛɛzu Ɠɔoɠɔ GALAGI ʋɛ,
ti GALA fali ɠani: «Ɠɔoɠɔ GALAGI, gi maawɔinɠa, gɛi gi ga ɗa-nuɓusɛiti,
mina ɗɔnɔiti dɔ unfegi zu,
ti mina ɠɛ ga zii ɠiligiti ta-ɲɛɛɠulasu anii,
ti ʋa ɗa ɠɛ ma: ‹Mini ɠa ta-ƓALAGI ná?› »
Gooɠaaʋotegi
18Ɠɔoɠɔ GALAGI wɔinʋɛ ga ná-zooi,
ná-nuɓusɛiti maawɔin soga.
19Ɠɔoɠɔ GALAGI ná-nuɓusɛiti gooɠaaʋotegɛ,
é ɠɛ ti ma: «Nà moloi ta dɔɔi leʋesu wo ma,
naa ʋɛɛ gulɔi ʋa, wo-yii ɠa lɛi.
Gè la mɔ wo ɠɛa pɛ ga zii ɠiligiti ta-ɲɛɛɠulasu anii.
20Nà wo zili nui maaɠooza wo ʋa,
nii é lɛkpɛmaʋɛ nu ɠɔʋɛzu ʋelei,
gè daaʋili teʋebai ta fɔɔvɔ zooi zu,
ná-kɔɔʋɛbɛi é ʋelelaʋɛ,
gè naa ʋili folo ɠulazu ʋele ɓoloɗɛi wu,
zɔi é ʋoluzuʋɛ,
gè naa ʋili folo liizu ʋele ɓoloɗɛi wu.
Maku ɲɔuɲɔugi ɠa lɛ, é fiilɛi vɛɛlo,
mazɔlɔɔ é faa ɲɔu wolaiti kɛɛʋɛ ga woye.»
21Ɗɛigi è ga zooi, mina mɔ lua, ɠoozunɛ, è ɠɔkɔ!
Mazɔlɔɔ Ɠɔoɠɔ GALAGI faa wolaiti kɛɛʋɛ.
22Wa ɓalaa, dɔɓɔ zuaiti, à mina mɔ lua pa.
Teʋebai zu lufai ɓalaa ʋɔnɔ ʋolu,
guluiti ti waa,
kooleɠoole guluiti ta leezɛn ɓeleiti gaalaavega kpekpe.
23Siyɔn zei wo nuiti, à ɠɔkɔ ga koozunɛɛi,
à ɠoozunɛ Ɠɔoɠɔ GALAGI ná-faa zu, wa-ƓALAGI.
Samai, toɠa tonai ʋuuzu wa-yooi zu, ʋelei soloogai la,
toɠa sabala tonaiti puuzu wo ʋɛ, samai ta foɠoi,
ʋelei é ɠɛni kɛɛzu la mɔungi.
24Molo loɠazuʋɛti daa ɠa ve ga molo ɠae,
diɠi wolaiti daa ɠa ve ga dɔɔi ta gulɔi, é ʋooʋa ma.
25«Konagi niiti kpein kotogiti ti koloɠologa wo ma,
ta kolegiti, ta kpazinɛgiti, naa ʋɛɛ kotokɔliiti ba,
nà-kɔɔʋɛbɛ wolai naa, nii gè teʋeni wo laalɔɠɔma,
nà ti kpein potogi ve wo ya.
26Wa laami, wo yiɠo,
wa Ɠɔoɠɔ GALAGI laaseigi maamusɛ, wa-ƓALAGI,
nii é laavɔɔ vaiti kɛai wo ʋɛ.
Nà-nuɓusɛiti ti la mɔ lɔa pɛ unfegi zu.
27Wa suɠwɛɛ naazu ga nà wo zaama, Izilayɛle nuiti,
nɔ̀un nà, Ɠɔoɠɔ GALAGI, wa-ƓALAGI,
taɠili nɔpɛ ge la ná nɔ̀un polu.
Nà-nuɓusɛiti ti la mɔ lɔa pɛ unfegi zu.»
Currently Selected:
Zowɛle 2: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
