Wozé 9
9
Duɔlai zuɓɔlɔi
1Mina ɠoozunɛ, Izilayɛle, è ʋa ɗa ɠɔkɔ ga koozunɛɛi
ga zɔɔma nuɓusɛiti kɛʋele.
Mazɔlɔɔ è ɠɛlɛa ɗa-ƓALAGI ʋa,
è ɓɔɠɔ ʋilɛ koloɠologi laawu.
Ʋɛ kpein ti molo loɠazu ná,
wɔin ɠa è ma ga è ɗa-ɠoloɠologi ma zalai zɔlɔɔ náti.
2Kɛlɛ moloi ta gulɔi la kula ɠɛa ga tiye,
dɔɔ niinɛi ɓalaa kula vai ɠa ga iɲɔteʋe vaa.
3Ti la yɛga pɛ Ɠɔoɠɔ GALAGI ná-zooi zu.
Efelayime ɠa ɠale ma Ezipete yooi zu,
ta kɔzɔba laamianigiti mi Asiili yooi zu.
4Ti la mɔ dɔɔ zalaɠai ta ɠula pɛ Ɠɔoɠɔ GALAGI ʋɛ,
ta-zalaɠaiti ti la naa ɛnɛkɛga pɛ.
Ɠɔnɔgi ɠa ɠɛ ti ʋɛ ga eɠɛ saa wɔlɔ wosu laamianigi,
zɔi kpein é ta miizu, naama nuiti ta ɠɔzɔ.
Mazɔlɔɔ ti-ɠɔnɔgi ɠa ɠɛ nɔ ga ti-ɠogi nɔnɔ,
ta la lia pɛ Ɠɔoɠɔ GALAGI zei ʋɛlɛi ma ɠoizuʋɛ.
5Leeni ɠa wo ʋaazu kɛɛzu fɛti voloi vaa zu,
Ɠɔoɠɔ GALAGI ná-fɛti voloi?
6Mazɔlɔɔ wɛlɛ tiya ʋa, ti liizu tɔɔzei faa zuɠoloɠologi vaa kɛai.
Ezipete ɠa ti zeɠe ga duɔiti, ta-ɠabaiti ta ɠɛ Mɛmefise taazuʋɛ.
Kpele tufaiti ta lɛ ta-naavolo ɓiigiti ma,
ɠaingiti ti ʋɔnɔ ta-ʋɛlɛiti bu.
7Doɠai ma voloi ʋɛtɛ, é ʋaazu.
Potokula voloiti ti ʋaa.
Kɛni Izilayɛle naa zuɠwɛɛ.
GALA goo wo nui litigɛ,
nui nii zɛnvui ba, toɠa ɓɔɛzu wuulewuule,
tɔɔzei ɗa-ɠotoi wɔɔlɔ ʋelei ʋa,
ta wɔinzeɠema wolai ʋa wo kɛɛzu la.
8Kɛlɛ nɛ̀i gè ga GALA goo wo nui,
Efelayime ná-taa makɛ nui,
nà nà-GALAGI ʋa.
Wa balii lɛɛzu tùɠɔ, nà-pele goi kpein su,
wo ɗa wuzeɠe dàalɔɠɔma, nà-GALAGI ná-zooi zu.
9Ti ɓadɔa kpe kɔzɔba vai ɓomaʋɛ,
eɠɛʋelei mɔungi Giɓea nuiti ti kɛɛni la.
Kɛlɛ Ɠɔoɠɔ GALAGI la yeemani ta-vaaɠaaza golai ma,
toɠa wuzeɠezu ta-ɠotoiti daalɔɠɔma.
Faa ɲɔi ɠwɛmaʋɛ
10Ɠɔoɠɔ GALAGI ɠɛ ma: «Gè Izilayɛle ɠaani teʋebai zu,
kulaai ga leezɛn wulu ʋɔnɔ koi.
Gè wo-mɛmɛwolani kaani
eɠɛ kooleɠoolegi ma waa mɔungiti.
Kɛlɛ ti liiʋɛ Ɓaale-Peyɔɔl, ti ɓɔɠɔ vea unfegi ya,
ti ɠɛ ga ziimaziɛ ganii, ga ti yiima anii ɠɛʋele.
11Efelayime ná-lɛbiyai ɠa ʋaazu ɠoʋesu eɠɛ wɔnii,
ko ge la mɔ zeɠea,
koma nu la mɔ ɠɛa ná,
doun la mɔ zɔlɔɔga.
12Anɛɛ ɓalaa toɠa doin tanigaa ɠulazu su,
naati ti la nu ɠitelai zɔlɔɔga,
eyɛsu gè ti ɠula ti ya.
Tama, nimizai ɠa ti luɠɔ
siɛgi zu gè ʋoluavesu la ti ʋa.
13Gè ɠɛni Efelayime ʋɛtɛsu ga Tiil ɠɛʋele,
siingai tufa lɛnugi zu.
Kɛlɛ Efelayime ɠa ʋaazu ná-dointi teʋesu
naama nui ʋɔ, nii é ti ɠɔdaaleʋezu.»
14Ee, Ɠɔoɠɔ GALAGI, fe ti ʋɛ!
Ɓɛgele ɠa è feezu ti ʋɛ?
Doun zɔlɔɔtala ɠogi ɠɛ ti-anzaiti ma,
ɲiimiɗɛ mina ɠɛ ta-ɲiimiiti su.
15Ɠɔoɠɔ GALAGI ɠɛ ma ʋolu:
«Ti-zɔ ɲɔi kpein kulaʋɛ kɛlɛma Gilegale,
miná ɠa gè tɔɔzeini ná ga ti wɔinzeɠea.
Ti-ɠɛɛwoti ɲɔiti maaʋele ma,
nà ti ɓɛɛzu nà-zooi zu.
Gè la mɔ ti nɛa ʋɛ,
ta-ɠundiɠiiti kpein ta ga kololala nuiti.
16Kpakɔi zeelia Efelayime ma,
ma zapeiti ti vɔa,
ti la mɔ waa woga pɛ.
Ni ɓalaa ti-anzaiti ta doun zɔlɔɔna, nà ti undaaʋili,
ti-ɠoozu ɠaawaai niiti ti nɛai gola ti ʋɛ.»
17Nà-GALAGI ɠa ɠɛlɛzu ti ʋa,
mazɔlɔɔ ti la woiloni goo ma.
Ta ʋilɛ unba, ti ɗa leʋe ziiti saama.
Currently Selected:
Wozé 9: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
