Ezekiyɛle 6
6
GALA gooi é woni Izilayɛle yooi laalɔɠɔma
1Ɠɔoɠɔ GALAGI ɓɔɛni pɔ̀, é ɠɛ mà: 2«Ɗa ʋe, zunui, ɠaaʋote Izilayɛle ɠizeiti ma, è GALA gooi wo ti laalɔɠɔma. 3Ɠɛ ti ma: ‹Izilayɛle ɠizeiti, à woilo Maliɠii Ɠɔoɠɔ GALAGI wooi ma. Maliɠii Ɠɔoɠɔ GALAGI wooi ɠaa gizeiti ma, ta gize nɛmɛiti, naa ʋɛɛ pɛtugiti ba, ta nɛmɛiti: Nà ʋaazu ga kɔɔi wo laalɔɠɔma, é wa-zalaɠa ɠula adaʋɛti koloɠolo. 4Wa-zalaɠa ɠulazuʋɛti daa ɠa loo, wa-ansansegiti ma zalaɠa ɠalazuʋɛti ti wolowolo, wo zaama ma mɔinmɔin ka loo, ti za wa-ɠɔɔɠɔ gani nɔɠɔiti kakalaʋɛ. 5Nà Izilayɛle nuiti ma ʋoomaiti suvaza ta-ɠɔɔɠɔ gani nɔɠɔiti kakalaʋɛti, gè wo-ma ɠaeiti suvaza ta-zalaɠa ɠulazuʋɛti maaɠooliiti su. 6Wa-yooi ɠɔlɔkɔlɔma ná pɛ, taa wolaiti ta ɠolo, zalaɠa ɠulazuʋɛti daaloo, nii a kɛ wa-zalaɠa ɠula adaʋɛti ti ɠoloɠolo, wa-ɠɔɔɠɔ gani nɔɠɔiti suɠaleɠale, gaaʋala ti ʋa, wa-ansanse gala aniɲakaiti ti ɠolo, ta nii dɔin wo kpɛtɛni, tanɔpɛ ge la yɛga ná. 7Ma mɔinmɔin ka za wo zaama. Wa suɠwɛɛ naazu ga nà ɠa gè ga Ɠɔoɠɔ GALAGI.
8« ‹Anɛɛ naa ʋe, nà tanigaani zɛ ná wo zaama, kɔɔi la ti ʋaa, mɔta goi naati ta vaza zou ɠiligiti su. 9Kula zou ʋa nui mɔtai naati ta yɛ zou ɠiligiti su, ti ɠisiɛ nɔ̀un su. Ti-ɠigi ɠa loo sù, ʋelei gè ta-wooʋalada yii ɠoloɠoloni da, tɔɔzei ta-ɠoloɠolo kisiɛiti ti zeɠeni nɔ̀un ba, ti ɠaazulo kpaan kɔɔɠɔ gani nɔɠɔiti ba. Naazu ti wɔin ɠa zeɠe ɓɔɠɔ ma tiya ɓɔɠɔi, tɔɔzei tuʋa ʋele ɲɔiti ba ti ti ɠɛɛni, ti ga kɔzɔba vaiti. 10Ta suɠwɛɛ naazu ga nà ɠa gè ga Ɠɔoɠɔ GALAGI, gè la ɠɛni ɓɔɛni ti ʋɔ wafuun, siɛgi zu gè ɓaazaɠani la ti ma, ga nà nimizai zeizu ti ma.› »
11Maliɠii Ɠɔoɠɔ GALAGI wooi ɠaa: «À yee loo ɓɛtɛaga ga kiteʋei, wo ɠɔɠɔa loɠa, wo kpeei loo, tɔɔzei Izilayɛle ná-kɔzɔba vaa ɲɔiti ba é ti ʋolu. Ti-ma zuwu ɠaa ɠa ʋaazu leʋezu ga kɔɔi, ta pului, naa ʋɛɛ ɗɔfɔ zeeɓɛi ʋa. 12Zɔi a ɠɛ ɠoozama, naa ɠa za ga ɗɔfɔ zeeɓɛi, zɔi maaɓuɠaai, naa za kɔɔi zu, zɔi a yɛ ʋoluzu, naa ɠa zei kɛlɛ su, é za ga pului. Nà zeeli nà-ziiɠulagi ɠwɛgi ma ti laalɔɠɔma. 13Ta-nu ʋoomaiti ta vaza zooi ma ta-ɠɔɔɠɔ gani nɔɠɔiti saama, ta-zalaɠa ɠulazuʋɛti maaɠooliiti su, gize wolaiti ta gize goiti ma, naa ʋɛɛ gulu wolaiti bu ʋa, niiti ti ɠaa ɓiiliai, ta adaʋɛti pɛ ʋɛti ti ɠɛni zalaɠaiti kulazu ná ta-ɠɔɔɠɔ gani nɔɠɔiti bɛ. Wa suɠwɛɛ naazu ga nà ɠa gè ga Ɠɔoɠɔ GALAGI. 14Nà yeewuzeɠe ti laalɔɠɔma. Nà ta-yooi zuwo, ná ɠaalɛi eɠɛʋelei Liɓila teʋebai zu la, ʋɛ pɛ ti zeini ná. Ta suɠwɛɛ naazu ga nà ɠa gè ga Ɠɔoɠɔ GALAGI.»
Currently Selected:
Ezekiyɛle 6: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
