Ezekiyɛle 14
14
Woovele nuiti ta-vai
1Foloi ta, Izilayɛle ɠɛwolai tanigaa ti ʋaani pɔ̀ bɛ, ti ʋu kàkala. 2Ɠɔoɠɔ GALAGI ɓɔɛni pɔ̀, é ɠɛ mà: 3«Ɗa ʋe, zunui, nui niiti ta-ɠɔɔɠɔ gani nɔɠɔiti ta ti ya ti-yiimaʋɛ, ti ɠaazulogɛ naa nɔ, nii é ti loozu kotoi zu. Nà va bu nɛi ga ti gàazaɠa ɓaa? 4Naa ɠa é ba, ɓɔɛ ti ʋɔ, è ɠɛ ti ma: ‹Maliɠii Ɠɔoɠɔ GALAGI wooi ɠaa: Ni Izilayɛle nui ta a ɠɛna ná, ná-kɔɔɠɔ gani nɔɠɔiti ti ziimaʋɛ, gaazulogai naa ʋa, nii é toozu kotoi zu, é ʋa é GALA goo wo nui ɠaazaɠa, nà, Ɠɔoɠɔ GALAGI, nà ɠa nà gooɠaaʋotegi ve zea, é zoloo ná-kɔɔɠɔ gani nɔɠɔ mɔinmɔingiti tosuʋɛ ma. 5Naa maaʋele ma, nà Izilayɛle nuɓusɛiti pɛ kigi maazɔlɔɔ ʋolu, tɛiti ti ʋoluavegai bà, ti ɠaaʋote ta-ɠɔɔɠɔ gani nɔɠɔiti ma.›
6«Naa ɠa é ba, ɠɛ Izilayɛle nuiti ma: ‹Maliɠii Ɠɔoɠɔ GALAGI wooi ɠaa: À ʋa pɔ̀ ʋolu, wo ɠɛlɛ wa-ɠɔɔɠɔ gani nɔɠɔiti ba, à zeɠe kɔzɔba vaiti polu, wo ti ɠɛɛzu!› 7Ni Izilayɛle nui ta ɓaa seikɔɠɔma nui ta a ɠɛna ná, ná-kɔɔɠɔ gani nɔɠɔiti ti ziimaʋɛ, gaazulogai naa ʋa, nii é toozu kotoi zu, é ʋa é GALA goo wo nui ta ɠaazaɠa, nà, Ɠɔoɠɔ GALAGI, nà ɠa nà gooɠaaʋotegi ve zea. 8Nà wuzeɠe naama nui laalɔɠɔma, nà kɛ ga poogi, é ɗa wo faalaalii zu, nà kpeteʋe nà-nuɓusɛiti ba. Wa suɠwɛɛ naazu ga nà ɠa gè ga Ɠɔoɠɔ GALAGI.
9«Ni GALA goo wo nui a ɓena ɓɔɠɔ ʋa é ɠaka, é ɗa ɓɔɠɔ ɓɔɛi wo, nà, Ɠɔoɠɔ GALAGI, nà ɠa gè diai kakagi ma. Nà nà-zobogi lɛɛ la, gè teʋe ga, gè kula nà-nuɓusɛiti saama, Izilayɛle nuiti. 10Ti felegɔ pɛ ta-vaaɠaazagi ma ɠasɔi ɠa la ti unma, GALA goo wo nui, ta zɔi é ʋaazu é gaazaɠa, 11naa ɠa a kɛ, Izilayɛle nuiti ti mina loo ya, ti ʋa maaɠooza bà, ti ʋa ɓɔɠɔ ɠɔzɔ ga ta-lɔ koloɠologiti, ti ɠɛ ga nà-nuɓusɛiti, gè ɠɛ ga ta-ƓALAGI,» Maliɠii Ɠɔoɠɔ GALAGI wooi ɠana.
Faa nɔpɛ ge la GALA ná-tukpɔi zeɠea daazu
12Ɠɔoɠɔ GALAGI ɓɔɛni pɔ̀, é ɠɛ mà: 13«Ɗa ʋe, zunui, ni zou a kotoi ɠɛɛna dàalɔɠɔma, é la ɠɛɛni bɛ̀ ga wooɠɛɠila nu, nà nà-zobogi ɠula kɛlɛma daalɔɠɔma. Nà daamianigi zɔlɔɔ pelei ɠoloɠolo ti ma, gè pului leʋe ti ma, gè nuɓusɛiti ta suaiti suwuɠaaleʋe zooi ɠa. 14Anɛɛ ni zunu saʋagɔi niiti ta la ɠɛ ti zaama, Nowe, Daniyɛle ta Zɔɓe, naati ta-lelebodai a la tiya ɓɔɠɔi nɔ ti-yɛnvui ɠizo,» Maliɠii Ɠɔoɠɔ GALAGI wooi ɠana.
15«Ɓaa mu ni nà sua ɲɔiti puuna ma yooi zu, ti ná zuwo, nuɓusɛi ɠula ná ʋa, zooi zu ɠɛ ga teʋebai, mazɔlɔɔ suaiti ta ná nuiti pɛ paa, nu nɔpɛ ge la mɔ zooga é ʋa zei ná, duai maaʋele ma, 16zunu saʋagɔiti ti-laaseigi wogai, anɛɛ ni naati ta la ɠɛ ná, tiya ɠila nɔ ɠa ti-yɛnvui a la ɠizo. Eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu, zooi a la ɠɛ nɔ ga teʋebai zu,» Maliɠii Ɠɔoɠɔ GALAGI wooi ɠana.
17«Ɓaa mu gè ʋa ga kɔɔi niima nuɓusɛiti daalɔɠɔma, gè deve ve ga kɔɔi laalɛ zooi wu, é koloɠolo, ti nuiti ma zuwu ɠaaleʋe ta suaiti, 18zunu saʋagɔiti ti-laaseigi wogai, anɛɛ ni naati ta la ɠɛ ná, eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu, tiya ɠila nɔ ɠa ta ɠizo,» Maliɠii Ɠɔoɠɔ GALAGI wooi ɠana.
19«Ɓaa mu ni nà ɗɔfɔ zeeɓɛi leʋena nuɓusɛiti saama zooi zu, gè nà-ziiɠaawanai yei ti ma ga saai, é nuɓusɛiti ma zuwu ɠaaleʋe ta suaiti zooi ɠa, 20anɛɛ ni Nowe, ta Daniyɛle ta Zɔɓeni ka ta la ɠɛ ná, naati ta-lelebodai a la tiya ɓɔɠɔi nɔ ti-yɛnvui ɠizo. Eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu,» Maliɠii Ɠɔoɠɔ GALAGI wooi ɠana.
21«Mazɔlɔɔ Maliɠii Ɠɔoɠɔ GALAGI wooi ɠaa: ‹Gè faa ɓɔi naanigɔ zeini Zeluzalɛme ma, kɔɔi, ta pului, ta sua ɲɔiti, naa ʋɛɛ ɗɔfɔ zeeɓɛi ʋa, ga é nuiti ma zuwu ɠaaleʋe ta suaiti. 22Anɛɛ naa ʋe tanigaa nɔ ɠa ta yɛ vulua zunuiti su ta anzanuiti. Ta ti ɠulana taai ʋa, ta ʋa wo ʋɔ bɛ. Siɛgi zu wo ti-ziɛ ʋelei ɲɔi ʋɛtɛsu da, ta ti luʋa ʋelei ɲɔi, wa ɓɔɠɔ ɠaanɛɛnɛ é ʋilɛ maanɔɠɔi ʋa, nii gè seini Zeluzalɛme ma, ta fai nii kpein gè daani ma. 23Wo-yii ɠa la názu, siɛgi zu wa ti-ziɛ ʋelei ta ti luʋa ʋelei ɠaana la, wa suɠwɛɛ naazu ga nii kpein gè kɛɛni ga taai tɛi, gè la ɠɛni kɛɛni wafuun,› » Maliɠii Ɠɔoɠɔ GALAGI wooi ɠana.
Currently Selected:
Ezekiyɛle 14: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
