Amɔse 6
6
Tukpɔɠaaleʋei é lo kpɛtɛ nuiti ta-ani zuɠoloɠologi ʋa
1Maanɔɠɔi ɠa wo luɠɔ,
wɔiti wo zɛnvui wosu ziilɛigi zu Siyɔn,
wa kaazu ga wa kpaamaazui zaama Samali ɠizei ma.
Ungo, wa ʋe, wɔigiti wo ga zii mɔungi ma nu wolaiti,
wɔiti Izilayɛle nuiti ti ɓizɛzu, ti ɗa ʋa wo ʋɔ bɛ.
2«À li Kalené, wo naa ɠaa, nii kɛai ná.
Wa zeɠena miná, wo li Ɠamate taa wolai zu.
Naa ʋoluma, à yei Filisiti nuiti ta-laazuʋɛ Gate.
Wa pɛtɛ ni taai naati fizɔgɛ wa-masa taai niiti ba,
ɓaa ni ta-you zɛʋɛi wɔɔlɔʋɛ wɔnɔi ʋa.»
3Wa ɠisiɛzu ga wo maanɔɠɔ voloi maaɠooza ɓɔɠɔ ʋa,
kɛlɛ tɔun tooma masadai ɠa wo tolisu ɓɔɠɔ ma.
4Wɛlɛ wo ʋa, wo laani bete ʋagɔiti su,
ti ʋɔnɛai ga see ɲiigai,
wo zakpamaalɛgai wa-ʋeteiti su,
wo ɗa baala ziʋoiti mi,
ta nikɛ yiʋoi niiti ti wulɔai.
5Wa guyei loozu nɔ lein kɔnigi bu,
wo ɗa Davide laaʋokɔɠɔ
ga wa ɓɔɠɔi wa-ɠɛingɛin ganiiti.
6Wa dɔɔi ɓɔlezu gɔwɔ wolaiti su,
wo ɗa gulɔ maku nɛɛnɛgiti siɛ wɔungiti su.
Kɛlɛ wo la yiizoolɛzu ga maanɔɠɔi naa,
nii é ʋaazu Zozɛfe ná-bolodamaiti pɔ.
7Naa ɠa é ba, nii ɠa gè bosu niina,
wa ɠa wo ɠɛɛzu ʋelelaʋɛ,
ti ɗa li ga woye duɔlai zu.
Ɲaka nuiti ti laani ta-ʋeteiti su, ta-vɛtii ɠa ɓe!
Samali taa wolai ɠa ɠoloɠolo
8Maliɠii Ɠɔoɠɔ GALAGI ɠonaʋɛ ɓɔɠɔ ma, é ɠɛ ma:
«Nà Samali taai veezu sili nuiti zea, ta nii kpein é su,
mazɔlɔɔ Zakɔɓe mavofodaiti ta-wasogi ʋɛlɛ la bɛ̀,
ti-ʋoluzeizuʋɛti wɔinzeɠea mà,»
Ɠɔoɠɔ GALAGI, Fai-Pɛ-Maliɠii wooi ɠana.
9Ni zunu puugɔ a ɠɛna pɛlɛyeɠe ɠila bu, ti pɛ ta za. 10Ni poomai ta ná-nui ta a ʋaana ga é kula pɛlɛi wu, é gala, toɠa naama nui ɠaazaɠa, nii é pɛlɛ ʋoluʋɛ, é ɠɛ ma: «Nu ɠili ka dɛ è ɠoba ɓaa?» Naa ɠa gooɠaaʋote, é ɠɛ ma: «Nu nɔpɛ ge la mɔ ʋɛ.» Zɔi ɠa ɠɛ bɔɔlai ma: «Maaɠɛ kpɔ! Mazɔlɔɔ é la vizɔni ga nu Ɠɔoɠɔ GALAGI loli niima ziɛgi zu.»
11Mazɔlɔɔ Ɠɔoɠɔ GALAGI ɠa devei veezu,
pɛlɛ wolaiti ta ɠolo,
ma goiti ti ʋaliʋali.
12Kaipa wo mɛniga ga sooi ɠa ɗa ɓizɛ fasai ma?
Ɓaa nu ɠa wozai woli kpoloɗɛi ɠa ga nikɛiti?
Kɛlɛ wɔun, wa telebodai valibosu ga anivebɛi,
wo sɔledai valibo ga ani wanai.
13Wa ɠoozunɛɛzu Lodeɓaal zo fai zu wo ʋɛ,
wo ɗa ɠɛ ma: «Gi ɓɔɠɔ zɛbɛi maaʋele lɛi
gi ʋa Kaalenayime taa wolai zo da ɓaa?»
14«Ee, Izilayɛle nuɓusɛiti, nà zii ɠila buzeɠezu wo laalɔɠɔma,
nii a zei wo ɠa, é zo Leɓo-Ɠamate,
é zeeli Zuludɛn ma ʋɛtu nɛmɛi zu ɠɔtuɗɛi ma,»
Ɠɔoɠɔ GALAGI, Fai-Pɛ-Maliɠii wooi ɠana.
Currently Selected:
Amɔse 6: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
