Amɔse 3
3
1Izilayɛle nuɓusɛiti, wa ʋe, pɛlɛyeɠei wɔi kpein Ɠɔoɠɔ GALAGI wo ɠulaai Ezipete yooi ʋa, à woilo nii ma, Ɠɔoɠɔ GALAGI bosu wo ma:
2«Eteai zu ʋɛlɛyeɠeiti kpein saama,
wa ɠila kpe ka gè yiimazeɠeni ga woye.
Naa ɠa é ba, nà wo lolisu,
wo ɠonabo ga wa-vaaɠaaza golaiti.»
3Zunu felegɔa ta ɗa siɛi ɓɔ,
ni ti la zolooni ma dɛ mɔunpa ɓaa?
4Zalai ɠa ɗa zikɔ nɛi fuun dɔɓɔi zu,
ni é la ɠɔnɔ kaani, é pɔ ga é so?
Zala yiʋoi wooi ɠa ɗa ɠula nɛi ná-zeɠei zu,
ni é la dɛ ani zoni ɓaa?
5Wɔnii ɠa ɗa lɔ nɛi wɔni zo tumɔi ɠa,
ni é la zeini tuɠɔ ga balii?
Wɔni zo tumɔi maa ɠa ɗa ɓili nɔ, ni é la ani zoni ɓaa?
6Koolei ɠa ɗa vɛ nɛi taazuʋɛ,
ni nuɓusɛiti ti la ɠɛɛni unga wuulee?
Faaɓa ka ɗa zeeli nɛi taai ma,
ni Ɠɔoɠɔ GALAGI la vaani bu?
7Zenɔ ɠana é la, Maliɠii Ɠɔoɠɔ GALAGI la ɗa ga faa nɔpɛ kɛ,
ni é la ná-kisiɛi lɛɛni ga ná-botiɠɛ nuiti, GALA goo wo nuiti.
8Zalai zikɔa, ɓɛ ɠa é la lua?
Maliɠii Ɠɔoɠɔ GALAGI ɓɔɛa,
ɓɛ ɠa é la GALA gooi laazeelia?
Samali laalɔɠɔma
9À zeze Asadɔde ta Ezipete ti-ʋoluzeizuʋɛti,
wo ɠɛ ma: «À ɠaalɛ ba Samali ɠizeiti ma,
wo pɛtɛ ʋelei faa wuuleegi mɔinɗai la ti zaama,
naa ʋɛɛ nimizai ʋa dɔai ná.»
10«Ti la zooni telebodai ziɛzu.
Ta ɠaalɛɛzu ba ti-ʋoluzeizuʋɛti,
niiti ti zɔlɔɔsu faa zuɠoloɠologi ta toomai zu,»
Ɠɔoɠɔ GALAGI wooi ɠana.
11Naa ɠa é ba, Maliɠii Ɠɔoɠɔ GALAGI wooi ɠaa:
«È zili nui ɠa ʋa, é zooi maaɠaku, é è-zɛbɛi ɠula è ya,
tama ta è-ʋoluzeizuʋɛti ma zɔɔlaiti seɠe toomai zu.»
12Ɠɔoɠɔ GALAGI wooi ɠaa:
«Ʋelei baala makɛ nui a ɗa baalagi ɠɔɠɔ felegɔi ɓaa goi ɠilagi ɠula la zalai la,
ʋele ɠana Izilayɛle nui niiti ti Samali ta ɠula la ti zili nui ya,
kpɔkpɔ kpuɠa go ɓaa bete ɠɔɠɔ ɓuɠa nɔ ɠa a yɛ ná.»
13«À woilo, wo nii laazeeli Zakɔɓe ná-pɛlɛyeɠei ma,»
Ɠɔoɠɔ GALAGI, Fai-Pɛ-Maliɠii wooi ɠana.
14«Voloi gè wuzeɠezu la Izilayɛle loɠa vai ma,
tɔɔzei ná-tɔ koloɠologiti ba,
nà wuzeɠe Ɓetɛle zalaɠa ɠula adaʋɛti daalɔɠɔma,
zalaɠa ɠulazuʋɛ ma minɛiti ta loo ya zooi ma.
15Nà sama ʋɛlɛi wolo, ta foɠo ʋɛlɛiti,
ta ná-pɛlɛi niiti ti ti ʋɔnɛai ga see ɲiigaiti, naati ta ɠoloɠolo.
Pɛlɛ mɔinmɔingi naati ta ʋaazu ɲɛɛlɛzu,»
Ɠɔoɠɔ GALAGI wooi ɠana.
Currently Selected:
Amɔse 3: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
