Matayo 28
28
Tënyï tëmï koli
1Tapëtï ko'do 'ba Sabata, mï kano bi kezi mï dagba ko'do 'ba gima, Mariya Magadala, Mariya agamo aba ï'bënnï kongɔ dawogo.
2Ani kinzikinzi kyigɔ ëdï, kö'du malayika 'ba Yere ayi kaŋo ta komorïyë ï'bë dawogo, alulu hulëhu yïtö ne alima dɔ mo. 3Laya 'bɔmo kaa laka 'ba bikanyi, bɔngɔ 'bɔmo na kanyi kaa ṛï'dï mïrë. 4Vo kanya'e na tere kazi mo, zë esennï ayinnï kaa yöku vïdï.
5Malayika iya zi mbara nee henye, “Eree dë, ga kö'du ma yɔlɔ ëdï 'e koma bi kö'du Yësu, mati atötö. 6Mo anza dë kinye, mo ënyï ku, kaa mati mo iya. Ayi ongɔ 'e bi mati mo o'do 'dɔmo. 7Neene ï'bë 'e kandi ayada 'e zi vo lö'bö 'bɔmo'e: ‘Mo ënyï ku tëmï koli, ëdï tï'bë dagba komo 'e mï Galilaya. Ani akongɔ 'e mo.’ Yaanya aba ma yada ku zi ye.”
8Here mbara ne ahonnï ta dawogo, tere aba kpa ndɔ na rakyenyi, ahonnï zi yada zi vo lö'bö 'bɔmo'e. 9Truku'du Yësu i'ja zë. Mo iya henye, “Wamëtë zi ye.” Zë ayinnï zi mo, ïrïnnï ndï mo amötunnï mo. 10Neene Yësu iya zi zë henye, “Eree dë. Ï'bë 'e ayada 'e zi öndu ma'e zi tï'bë mï Galilaya, ani zë akongɔnnï ma.”
Kö'du yada 'ba vo kanya
11Mati mbara nee da gërï 'bënnï, kya 'ba vo kanya'e ï'bënnï mï gawokyedre ayadannï zi kyedre 'ba vo karasa biya wa mati o'dɔ rë nï. 12Mati kyedre 'ba vo karasa i'ja rë nnï vïdï kyedree ëtï o'dɔnnï mala, zë ï'dïnnï zi vo kanya'e kɔhi kyedre 13ayada 'e zi zë, “Iya 'e henye, ‘Vo lö'bö 'bɔmo ayinnï yɔndɔ aba alogonnï mo mati dëdï ko'do.’ 14Ëzë kö'du kise nenye ɔkɔ zi gɔvona, da kalëlu ze dɔ mo akoba riti ne yaga ta dee.” 15Here vo kanya obannï kɔhi ne o'dɔnnï kaa mati ayada zi zë. Komo nenye asësï rë nï mï kutë Yuda'e le zi ko'do nenye.
Yësu alaya zi vo lö'bö 'bënï'e
16Neene vo lö'bö 'butë dɔmo kölö ne ï'bënnï Galilaya, zi döku mati Yësu ayada zi zë tï'bë. 17Mati zë ongɔnnï mo, zë amötunnï mo, mora maako'e da jirijiri aba. 18Neene Yësu ayi zi zë iya henye, “Biya kalakonda mï komorïyë mï dakaŋo aba ï'dï ku zi ma. 19Hereene ï'bë 'e o'dɔ 'e vo lö'bö ti'de tëmï vïdï, abapatisi 'e zë mï ru 'ba 'Bu, 'ba Wisi 'ba Lawo Kölö Laka, 20ayandi zë zi koro wa biya mati mï'dï kö'du mo zi ye. Tïnyö mëdï 'e aba 'duwï 'duwï le zi ndundu 'ba kɔɔ.”
Currently Selected:
Matayo 28: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/