Matayo 27
27
Oba Yësu komo Pilato
1'Do mï damïndö, biya kyedre 'ba vo karasa, kyedree 'ba vïdï ombannï da kö'du zi kï'dï Yësu zi koli. 2Zë idannï mo, ikannï mo, ï'dïnnï mo zi gɔvona Pilato.
Yuda ove gu nï
3Yuda mati ogo mo ne, ongɔ ikye vurë ku ra Yësu, mo ayasi kö'du lïtë 'bënï aya'ba 'butë wota kɔhi mbamba ŋbiriṛi ne zi kyedre 'ba vo karasa kyedree ëtï. 4Mo iya henye, “Mo'dɔ kö'du kyënyë ku, kö'du yasi yama 'ba vo kazi kö'du.”
Zë aya'bannï henye, “Anza kö'du 'beze? Ne kö'du 'bëyï ra.”
5Here Yuda u'du kɔhi ne mï yëkëlu ï'bë wënï. Neene mo ï'bë ove gu nï.
6Kyedre 'ba vo karasa akö'du kɔhi ŋbiṛi ne iya henye, “Ëdï mï kö'dukï'dï anza zi kï'dï nenye mï söndu 'ba wa sesi, kö'du ëdï kɔhi yama.” 7Here zë ombannï da kö'du zi kogo yaka 'ba vo tele ko'ba kɔhi ne aba na bi 'ba kusu yöku vo lezee. 8Kö'du nere ra ako'jo Yaka 'ba Yama le zi ko'do nenye. 9Neene wa mati nëbï Yeremaya iya ne inde rë nï ku. “Zë obannï kɔhi mbamba ŋbiriṛi 'butë wota ne, kɔhi mati Vïdï 'ba Yiserele ra ombannï dɔ mo zi kopi kö'du mo, 10zë o'dɔnnï zë zi kogo yaka 'ba vo tele ko'ba'e, kaa mati Yere ï'dï kö'du mo zi ma.”
Yësu komo Pilato
11Mati Yësu ɔrɔ komo gɔvona, gɔvona ako'jo hɔ mo, “Yï ra vo damöku 'ba Yuda'e?”
Yësu aya'ba henye, “Ɔɔ, mo ra kaa iya ne.”
12Mati vo da karasa kyedree ëtï asusunnï mo, mo aya'ba dɔ mo dë. 13Neene Pilato ako'jo hɔ mo, “Owo dë kö'du mati zë ëdïnnï kiya rë yï ne?” 14Mora Yësu aya'ba dë, gbï le zi kö'du kikye ma kölö zi rakaga kyedre 'ba gɔvona.
Ikye vurë ra Yësu zi kofo
15Yaanya aba ëdï dalëtï 'ba gavona mï karama zi kinga vo kamba mati vïdï kayo inzinnï. 16Mï kadra nani ëdïnnï vo kamba vo kö'du kyënyë ko'dɔ maako aba, ako'jo Barabasi. 17Here mati vïdï kayo atɔtɔ rë nnï, Pilato ako'jo hë zë, “Ma vala ra omba 'e ma zi kinga zi ye: Barabasi, mandere Yësu mati ako'jo Kurïsïtö?” 18Kö'du mo ayɔlɔ ëdï kö'du 'ba wakiyi ra zë ï'dïnnï Yësu zi nï.
19Mati Pilato ëdï lima da kyïtï 'ba vurë, mbara 'bɔmo utu zi mo kö'du kise nenye: “O'dɔ wa maako dë zi kora vo kazi kö'du yaŋa ne, kö'du mëdï rayaza kyedre aba ndenye mï wïrï kisi ga kö'du 'bɔmo.”
20Mora kyedre 'ba vo karasa kyedree ëtï alëlunnï da vïdï kayo zi ko'jo kö'du ga kö'du Barabasi, zi kofo Yësu.
21Gɔvona Pilato ako'jo henye, “Ma vala ra tëmï vïdï rïyö mati omba 'e ma zi kinga zi ye?” Zë aya'bannï henye “Barabasi.” 22Pilato ako'jo henye, “A'di ra mo'dɔ zi Yësu ma ako'jo Kurïsïtö ne?”
Zë ti'de aya'bannï henye, “Matötö mo!”
23Pilato ako'jo henye, “Kö'du a'di? A'di ra na kyënyë mati mo o'dɔ?”
Mora zë biya agbögbönnï gu kyembe aba henye, “'Batötö mo!”
24Mati Pilato ongɔ wa mati zi nï ko'dɔ anza, mora tagɔmo vïdï ayetonnï tënyï köyö na kamo, mo oba wini akaka kala nï ta da komo vïdï kayo. Mo iya henye, “Ma kazi kö'du mï yama 'ba kora nenye.” “Ne ëdï kö'du 'bee!”
25Vïdï biya aya'bannï henye, “'Bï'dï yama 'bɔmo 'bëdï de ze gisi 'beze ëtï!”
26Neene mo inga Barabasi zi zë. Mora mo u'bö hu Yësu ï'dï mo gbɔ zi tötö.
Vo kanya o'dɔnnï 'dölö ra Yësu
27Neene vo kanya'e 'ba gavona obannï Yësu mï loko 'ba gavona atɔtɔ gboko 'ba vo kanya kayo toko rɔ mo. 28Zë otɔnnï bɔngɔ 'bɔmo usunnï bɔngɔ laka kyïnë mo na kahi rɔ mo, 29akökunnï safo 'ba kono ayöfunnï dɔ mo. Zë ï'dïnnï linga mï kala mo ma tïrï alɔmvɔnnï domo nnï aba komo mo o'dɔnnï 'dölö rɔ mo. Zë iyannï henye, “Lima konda vo damöku 'ba Yuda'e!” 30Zë o'binnï oro rɔ mo, obannï linga u'bönnï dɔ mo löhu, löhu. 31Tapëtï zë o'dɔnnï 'dölö rɔ mo, zë otɔnnï bɔngɔ konda ne usunnï bɔngɔ 'bɔmo rɔ mo. Neene zë agagannï mo zi tötö mo.
Atötö Yësu
32Mati zë ëdïnnï tï'bë yaga, zë andɔsi dë nnï kora maako aba tëmï Sirënë ru mo Simona, zë o'dɔnnï mo na kamo zi kïnjë taka. 33Zë ayinnï bi mati ako'jo Gɔlɔgɔta, mï me'do nenye “Bi 'ba Yingɔ da.” 34Ani zë ï'dïnnï zi Yësu a'ji zi kuwë, asusë wa kata aba, mora tapëtï nene mo, mo omba dë zi kuwë mo. 35Mati zë atötönnï mo, zë ayanyannï bɔngɔ 'bɔmo födö ku'du aba. 36Zë alimannï kaŋo kongɔ mo.
37Dɔ mo rïyë zë ï'dïnnï wayöru 'ba wasusu rɔ mo iya henye: “Nenye Ëdï Yësu, Vo damöku 'ba Yuda'e.” 38Vo wakolɔ rïyö atötö mo aba, ma kölö da kala mo ma tïrï ma kölö da kala mo ma gali. 39Zë mati lagannï ta dakapa alidinnï mo, dë nnï njili aba 40iyannï henye, “Yï mati ëdï tï'bë zi yaŋa yëkëlu ne kuvö mï ko'do wota aba ne, ayɔmɔ rë yï! Asi kaŋo ta da taka, ëzë ëdï Wisi 'ba Wïrï!”
41Mï gërï kölö ne kyedre 'ba vo karasa, vo komoyandi 'ba kö'dukï'dï, kyedree o'dɔnnï 'dölö rɔ mo. 42Zë iyannï henye, “Mo ayɔmɔ oka'e, mora mo ɔ'bɔ dë yɔmɔ rë nï! Mo ra ëdï vo damöku 'ba Yiserele! Mo 'basi kaŋo yaanya aba ta da taka da koma mï mo. 43Mo oma mï Wïrï. 'Bï'dï Wïrï ma yɔmɔ mo yaanya aba ëzë mo omba mo, kö'du mo iya henye, ‘Ma Wisi 'ba Wïrï.’” 44Mï gërï kölö ne vo wakolɔ mati atötö zë mo aba alidi mo kpa.
Koli 'ba Yësu
45Mï kadra modaka le kadra madɔmosowɔ mandölu ayi biya mï dakaŋo. 46Kaa kadra madɔmosowɔ Yësu udu yaga gu kyembe aba, “Elɔyi, Elɔyi, lema sabakatani?” Mï kö'du ya'ba aba iya henye, “Wïrï ama, Wïrï ama, kö'du a'di ila ma?” 47Mati kya 'ba vïdï ma ëdï tɔrɔnnï ani owonnï kö'du nenye, zë iyannï henye, “Mo ëdï ko'jo Eliya.”
48Kandi ma kölö tëmï zë aho oba lifa. Mo oso ndɔ a'ji lara aba, ï'dï da njili mɔvɔ, ï'dï zi Yësu kuwë. 49Kɔsɔ mo iyannï henye, “Yaanya aba ila 'e mo kölö. Ï'dï dongɔ 'e te, ëzë Eliya ayi zi yɔmɔ mo.”
50Mati Yësu udu löhu mï gu kyembe, mo ila lawo nï.
51Mï kadra nani bɔngɔ 'ba yëkëlu aliza mï mo rïyö ta rïyë le hu mo. Dakaŋo akɔhɔ rë nï döku aliha. 52Dawogo ayëhu rë nï huwë, ida ra 'ba vïdï koro kayo mati olinnï ne ënjï na dïdï. 53Zë asinnï yaga tëmï dawogo, tapëtï tënyï 'ba Yësu tëmï koli, zë ï'bënnï mï gawokyedre koro ne alayannï zi vïdï kayo.
54Mati vo kyëlu 'ba vo kanya zë mati mo aba ëdïnnï kongɔ ga Yësu, ongɔnnï kinzikinzi ne biya wa mati o'dɔ rë nï aba, zë na tere iyannï henye, “Tïnyö mo Wisi 'ba Wïrï!”
55Mbara kayo ëdïnnï ani, kongɔ ta bi kɔwɔ. Zë usunnï ga Yësu ta Galilaya zi kongɔ gɔ mo kö'du wa mati mo omba. 56Mï kutë zë ra Mariya Magadala, Mariya ma 'ba Yakoba, Yose nnï ma 'ba gisi 'ba Zebedeyo aba.
Kusu 'ba Yësu
57Mati hutaga kara, kora vo wadakayo maako ayi tëmï Arimataya, ru mo Yosepa, mo na bi dë nï ayi na vo lö'bö 'ba Yësu. 58Ï'bë zi Pilato, mo ako'jo kö'du 'ba ida ra Yësu, Pilato ï'dï kö'du zi kï'dï zi mo. 59Yosepa oba ida ra ne, olo mï bɔngɔ ŋbala, 60ï'dï mï wogo kyïyï 'bënï mati mo iga yaga tëmï döku. Mo alulu yïtö kyedre komo bi tödu zi wogo ne ï'bë gbɔ. 61Mariya Magadala, Mariya agamo ëdïnnï lima ani na dabërëkyë zi dawogo.
Vo kanya 'ba dawogo
62Mï ko'do vere, mati tapëtï Ko'do 'ba Rakɔ'jɔ, kyedre 'ba vo karasa, Farasi'e ï'bënnï zi Pilato. 63Zë iyannï henye, “Kyedre, da sösu mati mo ëdï gba na dïdï vo wako'ba nani iya henye, ‘Tapëtï ko'do wota ma tënyï löhu.’ 64Here ï'dï kö'du zi ga wogo ne kongɔ na laka le mï ko'do wota. Kazi vo lö'bö 'bɔmo ayi alogonnï ida ra ne akayadannï zi vïdï henye, mo ënyï ku tëmï koli. Ndundu 'ba wako'ba nenye atëdï ndra na kyënyë ta da ma dagba.”
65Pilato aya'ba henye, “Oba 'e vo kanya tï'bë ga wogo ne kongɔ na laka kaa ayɔlɔ 'e.” 66Zë ï'bënnï anda'bannï ga yïtö 'ba ha wogo ne ŋbïrï, ï'dï vo kanya ani.
Currently Selected:
Matayo 27: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/