Matayo 26
26
Mala ko'dɔ ra Yësu
1Mati Yësu inde kiya biya kö'du nenyee, mo iya zi vo lö'bö 'bënï 'e henye, 2“Ayɔlɔ 'e karama Laga 'ba koli ëdï ko'do rïyö dagba, Wisi 'ba Vïdï akï'dï zi tötö.”
3Neene kyedre 'ba vo karasa vo dagba'e 'ba vïdï atɔtɔ rë nnï mï liŋɔ 'ba kyedre 'ba vo karasa, ru mo Kayifa, 4zë o'dɔnnï mala zi kïrï Yësu na liwo zi kofo mo. 5Zë iyannï henye, “Mora 'banza dë mï kadra 'ba Karama, kazi wehe ënyï mï kutë vïdï.”
Alömu Yësu yënï aba mï Beteniya
6Mati Yësu ëdï mï Beteniya mï liŋɔ 'ba kora maako ru mo Simona, vo Mönyu ne, 7mbara maako ayi zi mo maṛanji 'ba yënï këzïngutru ogo kɔhi kyedre aba, mo ope dɔ mo mati mo ëdï wakonyo da tarabiza.
8Mati vo lö'bö ongɔnnï nenye, zë na kamo. Zë ako'jonnï henye, “Kö'du a'di ayaŋa nenye gɔ mo? 9Yënï këzïngutru nenye atɔ'bɔ kogo yaga da kɔhi kyedre kï'dï kɔhi mo zi vo leri.”
10Yësu ayɔlɔ kö'du nenye iya zi zë henye, “Kö'du a'di ëdï 'e yaza mbara nenye? Mo o'dɔ wa teme ra zi ma. 11Atëdï 'e 'duwï vo leri ëtï, mora atanza 'e dë 'duwï ma aba. 12Mati mo ope yënï këzïngutru nenye da ida ra ma, mo o'dɔ zi kɔ'jɔ ma zi kusu. 13Ma yada zi 'e tïnyö, bi mati kö'du yöyo laka nenye ayëtï kpuru yaga mï damöku ne, wa mati mo o'dɔ akayada kpa mï kö'du sösu ga kö'du mo.”
Yuda ida kö'du zi kogo Yësu
14Neene ma kölö 'ba vo lö'bö 'butë dɔmo rïyö ako'jo Yuda Sikereto ï'bë zi vo da karasa'e 15ako'jo hɔ mo henye, “A'di ra akï'dï 'e zi ma ëzë mï'dï mo zi ye?” Here zë itinnï kɔhi ŋbirïṛi mbamba 'butëwota ï'dïnnï zi mo. 16Tapëtï mo Yuda oma gërï ma laka zi kï'dï mo.
Wakonyo 'ba Yere
17Mï dagba ko'do 'ba karama 'ba mangɔlɔ'bɔ kazi langa, vo lö'bö ayinnï zi Yësu ako'jonnï henye, “Kila omba zi ze kɔ'jɔ kö'du yï zi konyo karama Laga 'ba koli?”
18Mo aya'ba henye, “Ï'bë 'e mï gawokyedre zi kora maako ayada 'e zi mo henye, ‘'Vo komoyandi iya henye: Kadra 'bama ëdï kara. Mëdï tï'bë ko'dɔ karama Laga 'ba koli vo lö'bö 'bama ëtï liŋɔ 'bëyï.’” 19Here vo lö'bö o'dɔnnï kaa mati Yësu ayada zi zë kɔ'jɔ wakonyo 'ba karama Laga 'ba koli.
20Mati hutaga ayi, Yësu ëdï lima kaŋo da tarabiza vo lö'bö 'butë dɔmo rïyö ëtï. 21Mati zë ëdïnnï wakonyo, mo iya henye, “Ma yada tïnyö zi ye, vïdï ma kölö tëmï 'e akogo ma zi vo wehe.”
22Zë na rasösu ayetonnï kiya zi mo, ma kölö tapëtï agamo, “Tïnyö anza ma ra dë Yere?” 23Yësu aya'ba henye, “Mo mati usu kala nï mï gbenje ma aba ne akogo ma zi vo wehe. 24Wisi 'ba Vïdï akatï'bë te kaa ëdï na yöru kö'du mo. Mora bu'bu zi kora mati ogo Wisi 'ba Vïdï zi vo wehe! Atëdï na laka kö'du mo ëzë o'jo mo dë.”
25Yuda, mo mati ogo mo zi vo wehe ne iya henye, “Tïnyö anza ma ra dë, vo komoyandi?”
Yësu aya'ba henye, “Ɔɔ, ëdï yï ra.”
26Mati zë ëdïnnï wakonyo, Yësu oba mangɔlɔ'bɔ, ï'dï öwö'dï owe, ï'dï zi vo lö'bö 'bënï 'e, iya henye, “Oba onyo, nenye ida ra ma.”
27Mo oba sikɔ, ï'dï öwö'dï, ï'dï zi zë iya henye, “Uwë 'e tëmï mo, gee biya. 28Nenye ëdï yama 'bama 'ba lömukida, mati ope yaga kö'du vïdï kayo ga kö'du kila 'ba kö'du kyënyë. 29Ma yada zi ye, ma kuwë dë a'ji 'ba lɔgɔ nenye tëmï yaanya aba dagba ani le mï ko'do nani ma kuwë na kyïyï 'e aba mï damöku 'ba 'Bu ma.” 30Mati zë aya'binnï ngala, zë ï'bënnï yaga zi Döku 'ba Olivo.
Yësu ame'do kö'du ha kiga 'ba Petero
31Yësu ayada zi zë, “Yɔndɔ nenye aba ataho 'e biya ta ra ma, kö'du ëdï na yöru henye: ‘Ma kofo vo tïmëlë yako, gɔli 'ba tïmëlë akapere rë nï.’ 32Mora tapëtï mënyï ku, ma tï'bë dagba komo 'e mï Galilaya.”
33Petero aya'ba henye, “Gbï le ëzë ti'de ilannï yï, mila yï dë.”
34Yësu aya'ba henye, “Ma yada zi yï tïnyö, yɔndɔ nenye aba, gba kazi zanga yapa, akiga hë yï ta ra ma da wota.”
35Mora Petero iya huwë henye, “Gbï le ëzë zi ma koli yï aba, miga ha ma dë ta rë yï.” Vo lö'bö agamo'e ti'de iyannï kpa here.
Yësu amötu mï Getesemina
36Yësu ï'bë vo lö'bö 'bënï ëtï zi bi mati ako'jo Getesemina, mo iya zi zë, “Alima 'e kinye mëdï tï'bë nani mötu.” 37Mo oba Petero gisi rïyö 'ba Zebedeyo nï aba, mo ayeto tëdï na rasösu riti aba. 38Mo iya zi zë, “Di'di ma ayöfu ku kö'du sösu kyedre 'ba koli aba. Alima 'e kinye asesi 'e kida bi ma aba.”
39Ï'bë tisi kɔwɔ, mo alëpï komo nï aba zi dakaŋo amötu henye, “'Bu ma, ëzë atɔ'bɔ, 'bï'dï sikɔ nenye 'boba kazi ma. Anza dë gba kaa momba, mora kaa yï ra omba.”
40Mo a'ba zi vo lö'bö 'bënï 'e i'ja zë bi ko'do. Mo ako'jo ha Petero henye, “Ɔ'bɔ 'e dë kida bi ma aba mï kadra kölö? 41Ida 'e bi, amötu 'e kazi alëpï 'e mï kö'du yɔnzɔ. Lawo ra omba, mora ida ra ëdï kazi kyigɔ.”
42Mo ï'bë mï kadra ma rïyö amötu henye, “'Bu ma, ëzë ɔ'bɔ dë kö'du sikɔ nenye koba, nje ëzë muwë, kö'du 'bëyï 'bo'dɔ rë nï.”
43Mati mo ayi hulëhu, mo i'ja zë löhu ko'do, ga kö'du zë na komo ko'do. 44Here mo ila zë ï'bë löhu amötu ma da wota mo, iya kpa kö'du kölö.
45Neene mo a'ba zi vo lö'bö'e iya zi zë henye, “Ëdï 'e gba ko'do ree lawo? Ongɔ 'e te, kadra ëdï kara, Wisi 'ba Vïdï ogo ku mï kala 'ba vo kö'du kyënyëë. 46Ënyï dï'bë 'e! Kinye vo kogo 'bama ayi ku!”
Ïrï Yësu
47Mati mo ëdï gba me'do, Yuda mo kölö tëmï vo lö'bö 'butë dɔmo rïyö, ɔkɔ. Mo aba ëdï vïdï kyedre kayo kulu mɔvɔ aba kala nnï, utu zë kazi kyedre 'ba vo karasa vo dagba 'ba vïdï ëtï. 48Yaanya aba vo wakogo o'dɔ kyïnë maako zë aba, “Mo mati ma nzunzu ne kora ne ra, ïrï 'e mo.” 49Yuda ï'bë kandi zi Yësu, iya henye, “Wamëtë zi yï, vo komoyandi,” anzunzu mo.
50Yësu aya'ba henye, “Aboka, o'dɔ wa mati ayi kö'du mo.” Vïdï ne ï'bënnï dagba, ïrïnnï Yësu anda'dannï mo. 51Ma kölö tëmï aboka 'ba Yësu iza kala nï kö'du kulu 'bënï, otɔ yaga tëmï siṛikpa otra vo ko'dɔ lɔɔ 'ba kyedre vo karasa, iga mbili mo kyiko.
52Yësu iya zi mo henye, “Ï'dï kulu 'bëyï hulëhu ga bi mo, ga kö'du biya zë mati otɔnnï kulu akolinnï kulu aba. 53Asösu 'e mɔ'bɔ dë ko'jo 'Bu ma, mo kandi akutu malayika'e ndra ta da kpuluku 'butë dɔmo rïyö 'ba vo wehe? 54Mora hala Wayöru akinde rë nï mati iya ako'dɔ rë nï mï gërï nenye?”
55Mi kadra nani Yësu iya zi vïdï kayo henye, “Ma ra vo gaga 'ba ko'dɔ wehe, ayi 'e kulu aba ehe mɔvɔ zi kïrï ma? 'Duwï ma lima mï yëkëlu bi vurë kö'du yandi, ïrï 'e ma dë. 56Mora nenye biya o'dɔ rë nï zi kö'du yöru 'ba nëbï'e kinde.” Neene biya vo lö'bö ilannï mo ahonnï.
Yësu komo kyedre 'ba vurë
57Zë mati ïrïnnï Yësu ne obannï mo zi Kayafa, kyedre 'ba vo karasa, bi mati vo komoyandi 'ba kö'dukï'dï, kyedree ëtï atɔtɔ rë nnï. 58Mora Petero usu gɔ mo ta bi kɔwɔ, le loko vurë 'ba kyedre vo karasa. Mo ödu alima kaŋo vo kanya ëtï zi kongɔ wa mati ako'dɔ rë nï.
59Vo da karasa biya vïdï 'ba vurë kikye ëtï ëdïnnï koma kö'du ma ndɔndɔ ra Yësu zi zë tɔ'bɔ kï'dï mo zi koli. 60Mora zë i'jannï kö'du maako dë, vo kiya ndɔndɔ kayo ayi le dagba.
Ndundu mo ma rïyö ayinnï dagba 61iyannï huwë henye, “Vere nenye iya henye, ‘Ma tɔ'bɔ yaŋa yëkëlu 'ba Wïrï ne, ko'ba löhu mï ko'do wota.’”
62Neene kyedre 'ba vo karasa ënyï rïyë iya zi Yësu henye, “Anza dë tï'bë zi da kö'du ya'ba?” A'di ra vïdï nenyee ëdïnnï kiya rë yï? 63Mora Yësu alima ti.
Kyedre 'ba vo karasa iya zi mo henye, “Mï'dï yï hu lömu 'ba Wïrï dïdï: Ayada zi ze ëzë ëdï Kurïsïtö, Wisi 'ba Wïrï.”
64Yësu aya'ba henye, “Ɔɔ, ëdï kaa ma iya ne.” “Mora miya biya zi ye: Ndako aba akongɔ 'e Wisi 'ba Vïdï ëdï lima da kala tïrï 'ba Mo ma Kyigɔ gärä tayi mï maro'ba 'ba komorïyë.”
65Neene kyedre 'ba vo karasa iza bɔngɔ 'bɔmo iya henye, “Mo ëdï kiya kö'du sawiya. Kö'du a'di ra domba 'e kya vo kiya? Ongɔ 'e te, yaanya aba owo 'e kö'du sawiya ne ku. 66A'di ra asösu 'e?” Zë aya'bannï henye, “Mo ɔ'bɔ zi koli.” 67Neene zë o'binnï oro mï komo mo otrannï mo kala lulu 'bënnï aba. Agamo'e isannï mo 68iyannï henye, “Umë zi ze, Kurïsïtö. Ëyï ra isa yï?”
Petero iga hë nï ta ra Yësu
69Yaanya aba Petero ëdï lima yaga mï loko 'ba vurë, wu'jë vo ko'dɔ lɔɔ ayi zi mo. Mo iya henye, “Yï kpa Yësu 'ba Galilaya aba.”
70Mora mo andi ta da komo zë ti'de. Mo iya henye, “Ma yɔlɔ dë a'di ra ëdï me'do kö'du mo.”
71Neene mo ï'bë yaga zi ha loko resi, ani wu'jë vo ko'dɔ lɔɔ agamo ongɔ mo iya zi vïdï henye, “Vere nenye ëdï Yësu 'ba Nazereta aba.” 72Mo andi löhu, lömu aba iya henye: “Ma yɔlɔ kora ne dë!”
73Tapëtï mo yaa, zë mati ëdïnnï tɔrɔ ani ne ï'bënnï le zi Petero iyannï henye, “Tïnyö yï kölö tëmï zë, kö'du gërï me'do 'bëyï ra ayada.” 74Neene mo ayeto zi ko'jo wasënë kaŋo dë nï, mo alömu zi zë henye, “Ma yɔlɔ kora ne dë!”
Kandi zanga ayapa. 75Neene Petero asösu me'do mati Yësu iya: “Gba kazi zanga yapa, akiga hë yï ta ra ma da wota.” Mo ï'bë yaga kudu na kyënyë.
Currently Selected:
Matayo 26: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/