Matayo 17
17
Yësu ofɔ rë nï
1Tapëtï ko'do modaka Yësu obanï aba Petero, Yakoba, Yowani öndu 'ba Yakoba, agaga zë rïyë da döku konda na bi dë nnï. 2Ani mo ofɔ rë nï da komo zë. Komo mo alaaka kaa kadra, bɔngɔ 'bɔmo ayi na kanyi kaa bikanyi. 3Ani alaya komo zë Mosa, Eliya, me'donnï Yësu ëtï.
4Petero iya zi Yësu henye, “Yere, ëdï na laka zi ze tëdï kinye. Ëzë omba, ma kuvö gövö wota, kölö kö'du yï, kölö kö'du Mosa, kölö kö'du Eliya.” 5Mati mo ëdï gba me'do, maro'ba laaka ayi rïyë dë zë, gu tëmï maro'ba iya henye, “Nenye Wisi 'bama, mati mɔwɔ, mo aba ma na rakyenyi. Owo 'e kö'du 'bɔmo!” 6Mati vo lö'bö owonnï nenye, zë alëpïnnï na komo kaŋo zi dakaŋo kazi tere. 7Mora Yësu ayi ise rë zë. Mo iya henye, “Ënyï 'e rïyë. Eree dë.” 8Mati zë ongɔnnï bi rïyë, zë ongɔnnï vïdï maako dë nje Yësu.
9Mati zë ëdï tayinnï kaŋo ta da döku, Yësu ï'dï kö'du zi zë henye, “Ayada'e dë zi vïdï maako wa mati ongɔ'e ne, le ëzë Wisi 'ba Vïdï ïnjë ku tëmï koli.” 10Vo lö'bö ako'jonnï hɔ mo henye, “Kö'du a'di vo komoyandi 'ba kö'dukï'dï iyannï henye, ‘Eliya ra atayi dagba?’”
11Yësu aya'ba henye, “Zi tëdï tïnyö, Eliya ayi akakɔ'jɔ wa biya. 12Mora ma yada zi ye, Eliya ayi ku nzɔ, zë ayɔlɔnnï mo dë, mora o'dɔnnï zi mo biya wa mati zë ombannï. Mï gërï kölö ne Wisi 'ba Vïdï ëdï tï'bë zi ki'ja riti mï kala zë.” 13Neene vo lö'bö ayɔlɔnnï mo ëdï ame'do zi nnï kö'du 'ba Yowani Bapatisi.
Kɔ'jɔ 'ba wisi kora dayimona aba
14Mati zë ayinnï zi vïdï kayo ne, kora maako ayi zi Yësu alɔmvɔ domo nï aba komo mo. 15Mo iya henye, “Yere, ëdï mïkyëyï aba ra wisi 'bama. Mo ëdï kɔɔ wakotɔ aba ëdï riti kyedre aba. Mo ëdï 'duwï lëpï mï wa'do, mandere mï wini. 16Mika mo zi vo lö'bö 'bëyï 'e, mora zë ɔ'bɔnnï dë kɔ'jɔ mo.”
17Yësu aya'ba henye, “Akɔ vo kazi koma kofo vïdï mati omba 'e kö'du sösu 'ba vïdï maako dë, hala na konda ma kalima 'e aba? Hala na konda ma tëdï 'e aba? Ika 'e wisi ne kinye zi ma.” 18Yësu amo dayimona aba, asi yaga ta ra wisi ne, akɔ'jɔ mo mï kadra nani.
19Neene vo lö'bö ayinnï zi Yësu na liwo ako'jonnï henye, “Kö'du a'di dɔ'bɔ ze dë kore yaga?” 20-21Mo aya'ba henye, “Ga kö'du ëdï 'e koma tisi aba. Ma yada zi 'e tïnyö, ëzë ëdï 'e koma aba tisiwa kaa kofo masatada, atɔ'bɔ 'e kiya zi döku nenye, 'Ehe ta kinye nani' akatehe. Wa maako ohe dee dë.”
Yësu ame'do löhu kö'du koli 'bënï
22Mati zë ayinnï bi kölö mï Galilaya, mo iya zi zë henye, “Wisi 'ba Vïdï ëdï tï'bë zi kogo mï kala 'ba vïdï. 23Zë akofonnï mo, mï ko'do wota akïnjë mo zi dïdï.” Vo lö'bö osonnï ndɔ kö'du sösu aba.
'Be'bele 'ba yëkëlu
24Tapëtï Yësu vo lö'bö 'bënï ëtï ɔkɔnnï mï Kaparanamo, vo kose 'be'bele rïyö 'ba yëkëlu ayinnï zi Petero ako'jonnï henye, “Vo komoyandi 'bee opi 'be'bele 'ba yëkëlu dë?” 25Mo aya'ba henye, “Ɔɔ, mo o'dɔ here.”
Mati Petero ayi loko, Yësu ra ame'do dagba. Mo ako'jo henye, “A'di ra asösu, Simona? Kazi ëyï vo damöku 'ba dakaŋo ëdï kose 'be'bele, kazi gisi kora 'bënnï mandere kazi agamo'e?” 26Petero aya'ba henye, “Kazi agamo'e.” Yësu iya zi mo henye, “Kazi gisi kora akose dë. 27Mora do'dɔ zë dë na wehe, ï'bë zi föfö u'du yaga mongɔ 'bëyï. Oba dagba kyenze mati ïrï, ayëhu hɔ mo aki'ja kɔhi ŋbiriṛi sowɔ. Oba ï'dï zi zë kö'du 'be'bele 'bama 'bëyï aba.”
Currently Selected:
Matayo 17: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/