Matayo 16
16
Ko'jo kö'du 'ba kö'du kyïnë
1Farasi'e Sadeke ëtï ayinnï zi Yësu ayɔnzɔnnï mo, ako'jonnï hɔ mo zi yada zi nnï kyïnë ta komorïyë. 2Mo aya'ba henye, “Ëzë hutaga ayi, iya 'e henye, ‘Atëdï komo bi ma laka, kö'du fɔli ëdï na kahi,’ 3mï damïndö, ‘Ndenye atëdï ṛï'dï aba kö'du fɔli ëdï na kahi na maro'ba.’ Ayɔlɔ 'e hala zi yeri laya 'ba fɔli, mora ɔ'bɔ 'e dë yeri kyïnë 'ba kadra. 4Vo kö'du kyënyë, vo ndoro kofo vïdï omannï bi kö'du kyïnë wakoro, mora ma kölö akï'dï dë nje kyïnë 'ba Yona.” Yësu ila zë ï'bë 'de.
Langa 'ba Farasi'e Sadeke ëtï
5Mati zë ï'bënnï kyëtï föfö, vo lö'bö alëzïnnï kazi koba mangɔlɔ'bɔ. 6Yësu iya zi zë henye, “Andi ree, Ëdï 'e bi kida aba kö'du langa 'ba Farasi'e Sadeke ëtï.” 7Zë ame'donnï nenye mï kutë nnï na ga rë nnï iyannï henye, “Ëdï ga kö'du dika ze mangɔlɔ'bɔ dë.” 8Ayɔlɔ me'do 'bëzë, Yësu ako'jo henye, “'E 'ba koma tisi, kö'du a'di ra ëdï 'e me'do mï kutë 'e na bi dee kö'du tanza 'ba mangɔlɔ'bɔ? 9'E gba ayɔlɔ 'e dë? Asösu 'e kö'du mangɔlɔ'bɔ muyï kö'du kpuluku muyï ne dë, baga ndö ndɔndɔ atɔtɔ 'e? 10Mandere mangɔlɔ'bɔ madɔmorïyö kö'du kpuluku sowɔ, baga ndö ndɔndɔ atɔtɔ 'e? 11Hala ayɔlɔ 'e dë manza dë me'do zi 'e kö'du mangɔlɔ'bɔ? Mora ëdï 'e bi kida aba kö'du langa 'ba Farasi'e Sadeke ëtï.” 12Neene zë ayɔlɔnnï mo anza dë yada zi nnï kida bi kö'du langa ma ëdï ko'dɔ mï mangɔlɔ'bɔ, mora kö'du yandi 'ba Farasi'e Sadeke ëtï.
Hala kodrɔ 'ba Petero kö'du Kurïsïtö
13Mati Yësu ayi dakaŋo 'ba Kasariya Pilipo, mo ako'jo ha vo lö'bö 'bënï 'e, “Ëyï ra vïdï iyannï ëdï Wisi 'ba Vïdï?”
14Zë aya'bannï henye, “Maako'e iyannï Yowani Bapatisi, agamo'e iyannï Eliya, nduwë agamo'e iyannï Yeremaya mandere ma kölö 'ba nëbï'e.” 15Mo ako'jo henye, “Mora 'e 'bee? Ëyï ra iya 'e 'bee ma?”
16Simona Petero aya'ba henye, “Yï Kurïsïtö, Wisi 'ba Wïrï dïdï.”
17Yësu aya'ba henye, “Ya'da ëdï yï, Simona wisi 'ba Yona, kö'du nenye vïdï ra dë ayada zi yï, mora 'bu ma mï komorïyë. 18Ma yada zi yï henye, yï Petero, da ṛï'dï nenye ma kuvö kenisa 'bama, ha resi 'ba Hadesi ohe dɔ mo dë. 19Ma kï'dï zi yï gbalaka'e 'ba Damöku 'ba komorïyë, wa mati ida dakaŋo akida mï komorïyë, wa mati inga dakaŋo akinga mï komorïyë.” 20Neene mo ayada komo vo lö'bö 'bënï 'e, anza dë zi yada zi vïdï maako nï Kurïsïtö.
Yësu ame'do kö'du köli 'bënï
21Tëmï kadra nani dagba ani Yësu ayeto ka'da zi vo lö'bö 'bënï 'e henye, na tï'bë Yerusalema na ki'ja riti kayo da kala 'ba kyedree, kyedre vo karasa'e, vo komoyandi 'ba kö'dukï'dï'e, akofo nï mï ko'do wota akïnjë zi dïdï. 22Petero oba mo dakapa ayeto wasa mo. Mo iya henye, “Anza here dë Yere!” “Nenye o'dɔ rë nï dë zi yï!” 23Yësu ofɔ rë nï iya zi Petero henye, “Ënyï ta ga ma, Satani! Yï ra na wa ndï kotra zi ma, anza dë mo aba mï dë yï wa 'ba Wïrï, mora wa 'ba vïdï.”
24Neene Yësu iya zi vo lö'bö 'bënï 'e henye, “Ëzë vïdï maako ayi ga ma, mo 'biga hë nï kö'du nï na bi dë nï, mïnjë rïyë taka 'bënï 'busu ga ma. 25Kö'du vïdï mati omba zi yɔmɔ dïdï nï akayölu, mora vïdï mati ayölu dïdï nï kö'du ma aki'ja. 26Wa laka a'di ra atëdï kö'du vïdï ëzë mo ïrï damöku ne biya, mora ayölu lawo nï? Mandere wa a'di ra vïdï akï'dï na wakutrë kö'du lawo nï? 27Kö'du Wisi 'ba Vïdï ëdï tï'bë zi tayi mï tëdïkyedre 'ba 'Bu nï malayika 'bënï ëtï, mo akï'dï biriti zi vïdï ma kölö te zi wa mati mo o'dɔ. 28Ma yada zi 'e tïnyö, kyamo mati ëdï tɔrɔnnï kinye akanenennï koli dë gba kazi zë kongɔ Wisi 'ba Vïdï tayi mï damöku 'bënï.”
Currently Selected:
Matayo 16: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/