Yosuwa 2
2
Raba vo kore ëtï
1Mora Yosuwa wisi 'ba Nuna mo utu vo kore 'bënï rïyö liwo ta mï gawo 'ba Sitimi. Mo iya henye; “Ï'bëë kïrï kö'du 'ba kaŋo 'ba Yerikö.” Neene zë ï'bë ödunnï mï loko 'ba vo rönyï maako ru mo Raba, zë alimannï ani.
2Iya kö'du mo zi vo damöku 'ba Yerikö, “Ongɔ te! Vïdï 'ba Yiserele maako'e ayinnï ku yɔndɔ ne aba kinye zi kïrï kö'du 'ba kaŋo.” 3Mora vo damöku 'ba Yerikö mo utu lïtu nenye zi Raba iya henye, “Ayasi vïdï kora rïyö nee yaga mati ayinnï zi yï, ödunnï loko 'bëyï ne, ga kö'du zë ayinnï kïrï kö'du 'ba kaŋo ne ti'de.”
4Mora mbara ne ïrï vïdï kora rïyö nee mo oho zë ku. Mo iya henye, “Tïnyö vïdï kora nee ayinnï ndö zi ma, mora mayɔlɔ dë zë ayi ta kila. 5Hutaga nani aba, mati kadra 'ba kisi ha resi 'ba gawo ɔkɔ ku ene, vïdï kora nee ï'bënnï ku. Mayɔlɔ dë zë ï'bënnï ka gërï ma vala. Ï'bëë gë zë kandi, mandere aki'ja'e gë zë.” 6Mora mo ï'dï zë ëkyï ku rïyë komo lapiri 'ba loko, neene mo oho zë ku rïyë ani hu loma. 7Mï kadra nani, vïdï mati vo damöku utu zë ne zë asi ku ene, isi ha resi kyedre 'ba gawo ku. Zë ika ku koma vo kore nee le ka gërï mati ëdï kumu da Ranga 'ba Yeredene nani.
8Gba kazi vo kore nee ko'do, Raba ëkyï zi vo kore nee rïyë komo lapiri 'ba loko. 9Mo iya zi zë henye, “Mayɔlɔ ku Yekova ï'dï kaŋo nenye ku zi 'e, vïdï ti'de mï gawo ne zë ku kazi kyigɔ, tere kyedre aba kazi 'e. 10Dowo ku hala Yekova ï'dï wini 'ba Ranga Kahi Kyedre nani zi löku ta da komo 'e, mï kadra mati asi'e tëmï Ezipeto, neene wa ma o'dɔ'e mï Siyɔna, Ɔgo aba, vo damöku rïyö 'ba Amora hu mïrë, ha Ranga 'ba Yeredene zë ma inzi ku zi kofo mo. 11Mati dowo kö'du mo ku ene, tere ïrï ze ku, mora kö'du da kora 'ba vïdï ti'de ölu ku kazi 'e, ga kö'du Yekova Wïrï 'bee mo ra Wïrï mati ëdï komorïyë da wa ti'de mï kaŋo kinye. 12Mora yaanya, ma la'ba ra ma zi 'e alömu ree zi ma mï ru Yekova, neene akayada watɔwɔ 'bee dakota 'bama, ga kö'du ma yada watɔwɔ 'bama ku zi 'e, ayada'e zi ma kyïnë mo ma tïnyö. 13Iya akayɔmɔ dïdï 'ba 'Bu ma 'dö dïdï 'ba maa ma aba, öndu ma'e 'dö ëmï ma'e ti, vïdï 'ba dakota 'bëzë ëtï ti'de! Iya akayɔmɔ'e ze tëmï koli.”
14Mora vïdï kora nani'e iyannï zi mo henye, “Dïdï ze ga kö'du dïdï yï! Ëzë iya wa ma dëdï ko'dɔ mo ne dë, tïnyö da kongɔ gë yï watɔwɔ ëzë Yekova 'bï'dï kaŋo ne ku zi ze.”
15Raba mo ëdï lima mï loko mati o'ba nï da resi 'ba ra gawo, mora mo ayasi zë ku loli aba kaŋo ka bi huwërë 'ba loko. 16Mora mo iya ku zi zë henye, “Ï'bëë kaa da lutu ga kö'du kazi vïdï mati vo damöku utu ne kazi 'bi'ja 'e. Oho ree ani ko'do dawota aba le ëzë zë 'ba'ba ku hulëhu, mora alima 'ja tï'bë gërï 'bee.”
17Mora vïdï kora nani'e iyannï zi mo, “Kö'du kida nenye ma ï'dï ze lömu re ze mo aba ne dë zi kida mo deze, 18le ëzë da ödu ku mï dakaŋo, ma ida loli kahi konda ka mï bi huwërë 'ba loko ï'dï da asi ku kaŋo ka gɔ mo, mora le ëzë ika 'Bu yï ku 'dö Maa yï aba, öndu yï'e ehe vïdï ti'de 'ba dakota 'bëyï mï loko 'bëyï. 19Ëzë vïdï maako 'basi ku yaga tëmï loko 'bëyï zi tï'bë lima da gërï, yama mo atëdï gbï dɔmo, da tanza dë na vo kyeti mo. Zi vïdï ti'de mati ëdï yï aba mï loko kinye, yama mo atëdï deze ëzë dïnjë kala ku dɔmo. 20Mora ëzë iya wa mati dëdï ko'dɔ mo ne ku, akayasi ze tëmï kö'du kida mati ï'dï ze zi lömu re ze mo aba.”
21Mo aya'ba dɔmo iya henye, “Momba dɔmo ku. 'Bëdï kaa ma iya ne.” Neene mo utu zë yaga zë ï'bë ku. Mo ida loli bi huwërë 'ba loko.
22Mati zë ï'bënnï ku ene, zë ï'bënnï ku da lutu, neene zë alima ku ani ko'do wota aba, le vïdï mati vo damöku utu zë zi koma zë ka da gërï ti'de nani'e, a'ba nï ku hulëhu kazi ki'ja zë. 23Neene vïdï rïyö nee zë asi ku kaŋo ta da lutu rïyë zë umu da ranga, zë a'ba ku hulëhu zi Yosuwa wisi 'ba Nuna, mora zë iya wa ti'de mati o'dɔ rënï zi ze ne ku zi mo, 24Zë iya henye zi Yosuwa, “Tïnyö Yekova ï'dï kaŋo nenye ku ti'de kala ze; vïdï ti'de ku kazi kyigɔ neene tere kyedre aba kazi ze.”
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/