Lïtuwë 5
5
Ananiya mbara 'bënï Safira aba
1Kora maako ru mo Ananiya, mbara 'bënï Safira aba, ogonnï kaŋo 'bënnï yaga. 2Mora idannï da kö'du zi sesi kya 'ba kɔhi ne, na 'bënnï. Here mati Ananiya oba kɔsɔ kɔhi ne zi vo lïtu'ë, 3Petero iya zi mo henye, “Ananiya, kö'du a'di ï'dï Satani yï ko'ba, zi sesi kya 'ba kɔhi mati i'ja ta da kaŋo ma ogo ne? Kö'du a'di iga ndɔndɔ zi Lawo Koro? 4Wa ne 'bëyï ra mati gba ogo dë, ehe kpa tapëtï kogo mo, kɔhi mo gba zɔ na 'bëyï. A'di ra o'dɔ yï zi kö'du ma here ne ko'dɔ? Iga ndɔndɔ ne dë zi vïdï, iga ndɔndɔ ne zi Wïrï.”
5Kandi mati Ananiya owo kö'du ne, mo alëpï kaŋo brua na yöku. Vïdï biya mati owonnï ne, biya na tere. 6Gisi kora ɔbi ayinnï loko, ehe olonnï ida rɔ mo. Here zë ïnjënnï yaga, usunnï. 7Kadra wota aba yaa, mbara 'bɔmo Safira ayi loko, mora ayɔlɔ kö'du mati o'dɔ rë nï zi kora 'bënï ne dë. 8Petero ako'jo hɔ mo iya henye, “Ayada zi ma, ogowe kaŋo ne da kɔhi nenye?” Mo alëzë iya henye, “Ɔɔ, kɔhi ne mo ra biya ne.” 9Petero iya zi mo henye, “Kö'du a'di yï kora 'bëyï aba rïyö, ide me'do zi yɔnzɔ Lawo Koro? Kora mati usunnï Ananiya, ëdïnnï ha loko, ehe akumbënnï yï yaga.” 10Kandi mo alëpï burutu Petero oli. Mati gisi kora ɔbi nee, ayinnï hulëhu loko, i'jannï Safira ako'do ani na yöku. Here zë ïnjënnï mo yaga ehe usunnï mo dakapa kora 'bɔmo. 11Kanisa na tere, ehe vïdï biya mati owonnï kö'du ma o'dɔ rë nï ne.
Kö'du koro rakaga aba
12Vo lïtu'ë o'dɔnnï kö'du koro rakaga aba kyɔ mï kutë vïdï. Vo kusu ga Yere biya 'duwï rë nnï tɔtɔ mï kapa 'ba yëkëlu ako'jo loko sënjë 'ba Solomono. 13Vïdï maako'e yaga tëmï gboko 'bëzë omba dë zi rë nï drɔko zë aba, mora vïdï biya ombannï zë le ndra. 14Vïdï kora kyɔ ehe mbara ayetonnï koma mï Yere. 15Here vïdï rakɔ'e ika zë yaga da gërï o'ba da agburuku. Asösunnï ëzë Petero alasi ta dakapa, ehe galïlï mo akalëpï dë zë, akakɔ'jɔ zë. 16Vïdï kayo ma ëdïnnï alima mï gawo'e kara Yerusalema, ikannï zë mati rakɔɔ aba mandere zë mati dakyikyi aba mï nnï, akɔ'jɔ zë biya.
Yaza 'ba vo lïtu'ë
17Kyedre 'ba vo karasa'e ehe Sadeke biya osonnï ndɔ na mïkumbë. 18Zë ïrïnnï vo lïtu'ë, ï'dïnnï zë mï kamba ta da komo vïdï biya. 19Mora mï yɔndɔ nani malayika kazi Yere ayëhu ha loko 'ba kamba, ayasi vo lïtu'ë yaga. Malayika iya henye, 20“Ï'bëë mï yëkëlu, ehe ayada'e zi vïdï me'do 'ba dïdï nenye biya.” 21Here zë ï'bënnï kadra asi ku nzere, ehe ayetonnï kö'du yandi mï yëkëlu.
Kyedre 'ba vo karasa'e vïdï 'bënï ëtï ako'jonnï ga bi kölö magalesi mati zë kyedree 'ba Yiserele. Ï'dïnnï kö'du zi vo lïtu'ë kika zi nnï tëmï kamba. 22Vo kanya 'ba yëkëlu mati utu zë mï kamba, i'jannï vo lïtu'ë dë. Zë a'bannï, iyannï henye, 23“Di'ja ze kamba na kisi ŋbïrï, ehe vo kanya'e ëdï tɔrɔnnï ha loko. Mora mati da yëhu ha loko, ehe dödu mï mo, di'ja vïdï maako dë ani.” 24Kyedre vo kanya'e 'ba yëkëlu ehe kyedree 'ba vo karasa'e owonnï kö'du kiya 'bëzë ne, mora ayɔlɔnnï dë a'di ra sösunnï atëdï. 25Vïdï maako ayi ödu loko iya henye, “Yaanya aba kora nani'e, mati ï'dïyë mï kamba ëdïnnï mï yëkëlu vïdï yandi.” 26Kyedre vo kanya 'ba yëkëlu ï'bënnï vo kanya'e ëtï ehe ikannï vo lïtu'ë hulëhu, mora o'dɔnnï zë dë na kamo, ga kö'du zë na tere kazi vïdï ayetonnï zë ku'du yïtö aba.
27Mati ika vo lïtu'ë ku komo magalesi, kyedre 'ba vo karasa'e iya henye, 28“Da yada ku huwë zi 'e, ayandiye kö'du dë mï ru 'ba Yësu. Mora ongɔ'e wa mati o'dɔ'e ne te. Ëdï yandiye vïdï biya mï Yerusalema, ehe ëdï ayɔnze zi kö'du koli 'bɔmo ya'ba gu ze.” 29Petero vo lïtu maako'e ëtï aya'bannï dɔ mo iyannï henye, “Doro ze Wïrï ndra ta da vïdï. 30Ofowe Yësu mo tötö aba da taka, mora Wïrï 'ba zutu 'beze ïnjë mo na dïdï. 31Wïrï o'dɔ mo na vo dagba 'beze ehe na vo wayɔmɔ. Wïrï ï'dï bi zi mo da kala nï ma tïrï, ehe vïdï 'ba Yiserelee ata'bannï hulëhu zi mo ehe akila kö'du kyënyë 'bëzë. 32Ze kinye zi yada kö'du nenye biya zi 'e, ehe Lawo Koro zi yada kpa zi 'e, mo wakï'dï 'ba Wïrï zi vïdï biya ma oro Wïrï.”
33Mati vïdï 'ba vurëë owonnï kö'du nenye, zë ayinnï na kamo, ombannï zi kofo vo lïtu'ë. 34Mora ma kölö maako tëmï zë, Farasi ru mo Gamalili, mo vo komoyandi 'ba kö'du kï'dï ma oro mo ndra. Mo ï'dï kö'du zi vo lïtu'ë koba dero tisi yaa yaga. 35Here mo iya zi vïdï'ë 'ba mï vurëë henye, “Kora 'ba Yiserele, komo'e mandi re kö'du wa mati ëdï ko'dɔ'e zi kora nenyee. 36Tadura alaya kadra ma alaga nani aba, o'dɔ rë nï na vïdï kyedre maako, ehe vïdï kora kaa lamisowɔ adrɔko rë nnï mo aba. Mora mati ofo mo, vo ga ndï mo apere rë nnï biya, kö'du 'bɔmo ne inde rë nï. 37Yaa mati iti ga vïdï 'ba dakaŋo 'beze, Yudasi tëmï Galilaya alaya kpa. Vïdï kayo alö'bönnï ga ndï mo, mora ofo mo, ehe vo lö'bö ga ndï mo apere rë nnï biya. 38Here miya zi 'e tëdïyë na kɔwɔ ta ra kora nenyee. Ile zë na bi dë nnï. Ëzë kö'du ko'dɔ 'bëzë ne 'ba vïdï köndu, akinde rë nï. 39Mora ëzë ayi kazi Wïrï, ɔ'be dë yata, nje ëzë ombe zi wehe ko'dɔ Wïrï aba.” Vo vurëë ombannï da me'do 'bɔmo. 40Zë ako'jonnï vo lïtu'ë hulëhu loko, u'bönnï zë, ehe ï'dï kö'du zi zë, ma me'donnï dekpe löhu mï ru 'ba Yësu. Ilannï zë tï'bë.
41Vo lïtu'ë ilannï magalesi rakyenyi aba, ga kö'du Wïrï o'dɔ zë zi riti ki'ja ga kö'du 'ba Yësu. 42'Duwï ayaŋa kadra 'bënnï mï yëkëlu, ehe mï liŋɔ kölö maako ta ga agamo ɔrɔnnï dë ta bi kö'du yandi, ehe yada kö'du yöyö laka Yësu ra Kurïsïtö.
Currently Selected:
Lïtuwë 5: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/