Lïtuwë 3
3
Petero Yowani aba akɔ'jɔnnï kora vo keŋe
1Kadra 'ba mötu ëdï kaa kadra wota 'ba hutaga, Petero ehe Yowani aba ëdï tï'bënnï mï yëkëlu. 2Kora mati o'jo na keŋe ne ïnjë ha loko 'ba yëkëlu. Ta ga ko'do biya ï'dï mo dakapa ha loko nenye, ako'jo Ha Resi Teme. Mo alima ani ehe wa lenze kazi vïdï mati ëdï tï'bënnï loko. 3Kora ne ongɔ Petero ehe Yowani ëdï tödunnï mï yëkëlu, ehe mo ako'jo hë zë kö'du kɔhi. 4Mora zë ongɔnnï bi mbïyï dɔ mo ehe iyannï henye, “Ongɔ bi rïyë de ze.” 5Kora ne ongɔ bi dë zë asösu 'bënï na ki'ja wa maako kazi zë.
6Mora Petero iya zi mo henye, “Manza dë kɔhi aba, mandere daabo, mora ma kï'dï zi yï wa mati mëdï mo aba. Mï ru 'ba Yësu Kurïsïtö 'ba Nazereta, miya zi yï ënyï rïyë ayeto lasi.” 7Petero ïrï mo kala ma tïrï aba akɔnyi mo rïyë. Kandi ndï kora ne gbɔnzɔ mo aba, ayi na kyigɔ, 8ehe mo öfu rïyë, ayeto lasi. Mo ï'bë ga ndï Petero Yowani aba mï yëkëlu, lasi, töfu ehe Wïrï yeto aba. 9Vïdï biya ongɔnnï mo lasi toko ehe Wïrï yeto aba. 10Zë ayɔlɔnnï mo kora vo lenze mati ëdï alima ha Resi Teme 'ba yëkëlu ne, zë na rakaga. Zë ɔ'bɔnnï dë yɔlɔ kö'du a'di ra o'dɔ rë nï zi kora ne.
Me'do 'ba Petero mï yëkëlu
11Mati kora ne zɔ ga ndï Petero Yowani aba, vïdï biya ahonnï zi zë bi mati ako'jo loko sënjë 'ba Solomono. 12Petero ongɔ vïdï kayo ma atɔtɔ rë nnï ne ehe mo iya henye, “Vïdï 'ba Yiserelee, kö'du a'di 'e na rakaga ga kö'du mati o'dɔ rë nï ne? Asösu'ë dëdï ze kyigɔ maako aba? Asösu'ë da tɔ'bɔ ze kora nenye ko'dɔ zi lasi ga kö'du ze na laka? 13Wïrï 'ba Abarayama, Yisika, Yakoba, ehe zutu 'bezee, ï'dï ru kyedre zi vo Lïtu 'bënï Yësu. Mora ombe mo dë, ï'dïyë mo zi Pilato zi kofo, mati Pilato omba zi mo kinga na dangölö. 14Ombe Yësu dë mo le na laka ehe tïnyö ne. Ako'jowe kö'du kora ma ofo vïdï zi kinga na dangölö, 15ehe ofowe mo ma ï'dï dïdï zi vïdï. Mora Wïrï ïnjë mo tëmï koli, ehe ze biya da tɔ'bɔ yada zi 'e wa mati mo o'dɔ. 16Ongɔ'e kora nenye, ehe ayɔlɔ'e mo. Koma mï ru 'ba Yësu ra o'dɔ mo kyigɔ. Koma mï Yësu ra o'dɔ kora nenye ti'de na laka.
17“Aboka me, ma yɔle ehe vo dagba 'be ayɔlɔnnï dë wa mati zë o'dɔnnï. 18Wïrï iya kpuru kazi nëbï ënïyë henye, Kurïsïtö ënï aki'ja riti, ehe yaanya aba ne mo asesi lömu ënï ku. 19Here, ote de zi Wïrï, here akila kö'du kyënyë 'be, 20here kadra akatayi mati Yere akï'dï kyigɔ zi 'e, here mo akutu Yësu Kurïsïtö, mati mo inzi zi 'e. 21Mora Yësu akalima komorïyë le ëzë Wïrï o'dɔ wasisi ku biya na kyïyï, kaa mati mo iya kyere kpuru nëbï laka 'bɔmo'e aba. 22Mosa iya henye, ‘Yere Wïrï 'be akinzi vïdï tëmï yë kölö zi tëdï nëbï kpa kaa mo inzi ma. Owo'e kö'du mati mo ayada zi 'e. 23Vïdï maako mati oro nëbï nenye dë, atanza dë na vïdï 'ba Wïrï löhu.’
24“Nëbï Samowele ehe biya nëbï maako'e mati ayinnï ta gɔ mo, zë ame'donnï ga kö'du wa ma ëdï rë nï ko'dɔ yaanya aba ne. 25'E gisi 'ba nëbï'ë ehe ïrïyë lömu 'ba Wïrï ku, mati Wïrï o'dɔ zutu 'be ëtï. Kaa mo iya zi Abarayama henye, ‘Tëmï kozo 'bëyï'ë, ma kï'dï ya'da zi vïdï biya 'ba dakaŋo ne.’ 26Wïrï inzi vo lïtu ënï, ehe utu mo dagba zi 'e, zi kï'dï ya'da zi 'e, here otɔ de tëmï kö'du kyënyë 'be ne.”
Currently Selected:
Lïtuwë 3: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/