Lïtuwë 1
1
Luka ayöru zi Tïyöpïyölö
1Mï dagba buku 'bama, ma yöru zi yï Tïyöfïla biya wa mati Yësu o'dɔ yandi mo aba, tëmï kadra mati mo ayeto lɔɔ 'bënï, 2le mï ko'do mati oba mo komorïyë, tapëtï mo ï'dï kö'du ku kpuru Lawo Koro aba zi vo lïtu'ë mati mo inzi. 3Tapëtï koli 'bɔmo, mo ayada rë nï zi zë mo ëdï na dïdï. Mo ayada rë nï zi zë ndra ta da ko'do 'butësowɔ, mo ame'donnï zë ëtï kö'du Damöku 'ba Wïrï. 4Mati mo gba zë ëtï mo iya zi zë henye, “Ile Yerusalema dë, isiye kinye bi Lawo Koro zi 'Bu kï'dï kaa mati ma yada zi 'e mo alömu zi ko'dɔ. 5Yowani ï'dï bapatisi wini aba, ko'do tisi aba akï'dïyë bapatisi Lawo Koro aba.”
Oba Yësu komorïyë
6Mati vo lïtu'ë gba Yësu aba, ako'jonnï hɔ mo iyannï henye, “Yere, yaanya aba omba kï'dï damöku zi Yiserele hulëhu löhu?” 7Yësu iya zi zë henye, “Omba dë zi 'e yɔlɔ kadra 'ba kö'du mati o'dɔ rë nï nani, nje 'Bu ra ayɔlɔ. 8Mora Lawo Koro atayi de ehe akï'dï kyigɔ zi 'e. Here, akayade kö'du ma zi vïdï mï Yerusalema, mï Yudiya biya, mï Samariya, ehe mï damöku ne biya.”
9Tapëtï kö'du kiya 'ba Yësu nenye, ehe mati zë ëdïnnï bi kongɔ, oba mo rïyë mï fɔli. Zë ɔ'bɔnnï dekpe mo kongɔ. 10Mora mati mo ëdï tï'bë ku rïyë, zë nduwë bi kongɔ komorïyë. Kandi kora rïyö usunnï bɔngɔ kanyi ëdï tɔrɔnnï dakapa zë. 11Zë iyannï henye, “Kö'du a'di kora 'ba Galilaya ëdï tɔre kinye bi kongɔ komorïyë? Oba Yësu ku komorïyë. Mora mo ata'ba hulëhu tëmï gërï kölö mati ongɔ'e mo tï'bë.”
Vïdï maako zi kïrï pëtï Yudasi
12Vo lïtu a'bannï ta Döku 'ba Olivo zi Yerusalema. Döku 'ba Olivo ëdï lasi 'ba wiṛi kölö ta ra Yerusalema. Vo lïtu mati ï'bënnï ani ne, 13zë ra Petero, Yowani, Yemisi, Anderiya, Pilipo, Toma, Baratolomoya, Matayo, Yemisi wisi 'ba Alipayo, Simona mati o'dɔ lɔvɔ dakaŋo 'bënï, ehe Yudasi wisi 'ba Yemisi. Mati vo lïtu'ë a'bannï ku gawo, zë ï'bënnï rïyë mï loko tɔrɔ ma ëdïnnï 'dɔmo. 14Vo lïtu'ë 'duwï rë nnï tɔtɔ amötu na radrɔko, vïdï mbara'e, ehe Mariya ma 'ba Yësu, öndu mo ëtï. 15Kadra nani'e aba, vo lö'bö 'ba Yere ëdïnnï biya lamikölö 'butërïyö mï ratɔtɔ bi kölö, ehe Petero ënyï rïyë ame'do zi zë. 16Mo iya henye, “Aboka me, kyigɔ 'ba Lawo Koro, Dawidi iya kö'du 'ba Yudasi, mora kö'du mati mo iya ne o'dɔ rë nï ku. 17Yudasi mo kölö tëmï ze o'dɔ lɔɔ ze aba, mora mo ika vïdï'ë zi Yësu kïrï. 18Here, Yudasi ogo kaŋo kɔhi ma ï'dï zi mo ga kö'du kyënyë ko'dɔ 'bɔmo ne. Mati mo alëpï ta rïyë kaŋo mï yaka, ida rɔ mo api. 19Mati vïdï 'ba Yerusalema ayɔlɔnnï kö'du nenye, zë ako'jonnï yaka nani Akeledama, kö'du ya'ba aba mï ha 'bëzë, ‘Yaka 'ba Yama.’ 20Mï buku Wayeto 'ba Dawidi iya henye,
‘Mila loko 'bɔmo na mbiya,
ehe mila vïdï maako dë lima ani.’
Iya kpa henye,
‘Vïdï maako mïrï lɔɔ 'bɔmo ne.’
21-22“Here, domba vïdï maako kpa zi kɔnyi ze yada zi vïdï maako'e henye, Yësu ënyï ku tëmï koli. Mo mëdï tëmï vïdï kora kölö ma ëdï ze aba tëmï biyeto. Mo mëdï ze aba tëmï kadra mati Yowani abapatisi Yere Yësu, le ko'do ma oba mo komorïyë.”
23Zë inzinnï vïdï kora rïyö. Ma kölö tëmï zë Yosepa, ako'jo Barasaba, ako'jo kpa Jusitusu, ehe agamo Matiyasi. 24Here, zë biya amötunnï, iyannï henye, “Yere, ayɔlɔ kö'du sösu mï di'di 'ba vïdï biya. Ayada zi ze ma kölö ma inzi ku 25zi tëdï na vo lïtu ehe zi lɔɔ pëtï Yudasi ko'dɔ.” 26Zë u'dunnï födö, ehe inzi Matiyasi zi drɔko mï gboko 'ba vo lïtu'ë 'butë dɔmokölö ne.
Currently Selected:
Lïtuwë 1: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/