Ibraaninkoo'en 2

Kisndam mawɗam

1Gam ma'ajum en kaani waɗgo hakkiilo meeɗen fuu dow ɗuum ko nanɗen, gam to' en cel laawol goonga. 2Lilal Allah ngal malaa'ika'en ngaddi goonɗii.#2.2 Woɓɓe Yahuudu'en mbi'ii malaa'ika'en kokki Muusa Tawreeta. Huultuɓe ngal e saliiɓe tokkugo ngal keɓii elto haandanngo ɗum'en. 3To noon, noye enen kisreten to en ngeebake ɗa'am kisndam mawɗam ? Jawmiraawo e hoore muuɗum aarti volvugo haala ma'ajam, ɓeen nanɓe mo boo tabbitinanii en haala kaan ka goonga. 4Kadimaa Allah semmbiɗinii caaydaaku maɓɓe, gada e alaamaaji e kuuɗe kaayniiɗe feere-feere, o senndanii ɓe kokke#2.4 Kokke ngoni dokke. *Ruhu Ceniiɗo, noon no o yiɗiri.

Jaharoowo yimɓe to kisndam

5Wanaa malaa'ika'en ɓeen, Allah hokki laamanoo duuniyaaru wareyndu, ndu mbolveten dow muuɗum. 6Ammaa raa ko *Deftere Seniinde saaydini dow mo o hokki laamu, nde vi'i :

« Yaa Allah, neɗɗo no moye faa nyumataa dow muuɗum ?

Ɗume ɓii-aadama laatii faa eɗa reena ɗum ?

7A leestinii mo lees malaa'ika'en wakkaci seɗɗa.

A yiifii mo giifol darajja e manngu,

8a waɗii koo ɗume fuu lees laamu ma'ako. »#2.6-8 Jabuura 8.5-7

To Allah waɗii koo ɗume fuu lees laamu ma'ako, ndeen e ɗum holla walaa goɗɗum ko o laamanaaki. Ammaa to goonga kam, en ngi'aay koo ɗume fuu lees baawɗe ma'ako tawo. 9Jo'oni en ngi'ii Yeesu yiifaama giifol darajja e manngu, gam torraa maayde ka o yari. O leestinaama lees malaa'ika'en wakkaci seɗɗa, gam gada e yiɗde Allah o maayana yimɓe fuu. 10Allah tagɗo koo ɗume, mo koo ɗume laatii gam muuɗum, anniyake waddugo yimɓe ɗuuɗɓe nder darajja muuɗum. Gam ma'ajum, o yi'i e haani o laatina Yeesu aardiiɗo keeɓɗo, gada e yargo torraa, potɗo omtango yimɓe laawol kisndam.

11Gam Yeesu cenoowo yimɓe gada e hakkeeji mu''en, oon, e ɓeen ɓe o seni fuu, ɓe siibiiru wo'oru. Kanjum waɗi o semtaay noddirgo ɓe rimdaaɓe ma'ako. 12O vi'i Allah :

« Mi yeccoto rimdaaɓe am a moye,

mi maaltete nder kawtal maɓɓe. »#2.12 Jabuura 22.22

13Kadimaa o vi'i :

« Mi resey goonɗinki am e Allah. »#2.13a Ecaaya 8.17

Ndeen o ɓesdi vi'igo :

« Rammi ɗo'o, miin e ɓiɓɓe ɓe Allah hokki yam. »#2.13b Ecaaya 8.18

14Nde laatii ɓiɓɓe ɓeen e ngoodi teewu e ƴiiƴam, Yeesu e hoore muuɗum hawtii e maɓɓe tagaadi. O waɗii ɗum gam gada e maayde ma'ako o halka oon jogiiɗo baawɗe maayde, waato *Ceyɗaan. 15Noon o rimɗiniri yimɓe ɓe kulol maayde haɓɓi keerol foofaango mu''en fuu. 16Ɗum laaɓɗum, wanaa malaa'ika'en o wari vallugo, ammaa o warii vallugo taaniraaɓe *Ibraahim. 17Gam ma'ajum o laatinaa nannduɗo e banndiraaɓe ma'ako ɓeen nder koo ɗume fuu, gam faa o laatanoo ɓe *aardiiɗo diina mawɗo mo yurmeende, koolniiɗo nder kuugal Allah. O waɗii ɗum gam hakkeeji yimɓe nja'afee. 18Kanko e hoore ma'ako o godoraama torraaji, gam ma'ajum emo waawi vallugo ɓeen godorteeɓe torraaji.

Currently Selected:

Ibraaninkoo'en 2: fuq

Highlight

Copy

Compare