Ibraaninkoo'en 1
1
Allah volviranii en e Ɓiyum
1Ndeenno Allah volvanii maamiraaɓe meeɗen nde ɗuuɗɗum gada e konnduɗe annabo'en e laabi feere-feere. 2Ammaa nder ɗe'e balɗe cakitiiɗe, Allah volviranii en e Ɓiyum. E ma'ako o tagiri duuniyaaru, o waɗii mo boo o laatoo donoowo koo ɗume fuu. 3*Ɓiɗɗo oon woni jayngol kolleyngol teddungal Allah, e no Allah va'i e goonga. Emo tiigorii koo ɗume fuu e baawɗe voliinde ma'ako. Ɓaawo o hebbinii kuugal laaɓnugo yimɓe gada e hakkeeji mu''en, o jooɗake toon dow e nyaamo Allah mo Baawɗe.
Yeesu ɓurii malaa'ika'en
4*Ɓiɗɗo Allah oon laatake ɓurɗo malaa'ika'en manngu, noon no innde nde Allah hokki mo ɓurdi inɗe maɓɓe. 5Gam Allah meeɗaay vi'igo malaa'ikaajo koo go'oto :
« Aan a ɓiɗɗo am,
hannde mi laatake Baaba maaɗa. »#1.5a Jabuura 2.7
Koo boo :
« Mi laatanto mo Baaba,
O laatanto yam Ɓiɗɗo. »#1.5b 2 Samaa'iila 7.14
6Ammaa wakkaci nde Allah siryii lilgo Ɓiɗɗo muuɗum afo nder duuniyaaru, o vi'i :
« Sey malaa'ika'en Allah fuu cujjidana mo. »#1.6 Jabuura 97.7
7Raa ko Allah vi'i dow malaa'ika'en :
« Allah waɗii malaa'ika'en muuɗum kama keni,
o waɗii huwooɓe ma'ako boo kama ɗemɗe yiite. »#1.7 Jabuura 104.4
8Ammaa o volvii dow Ɓiyiiko o vi'i :
« Yaa Allah, jooɗorgal laamu maaɗa no tabbitey faa abadaa abadin.
Goonga woni sawru laamu maaɗa.
9A yiɗi aadilaaku, a wanyi ko halli.
Kanjum waɗi aan Allah, Allah maaɗa waɗ maa cuɓaaɗo,
hokku maa velvelo e manngu ɓurngu ngu wonduɓe e maaɗa. »#1.8-9 Jabuura 45.7-8
10Kadimaa o vi'i :
Jawmiraawo, aan jo'ini duuniyaaru ila aran,
asama boo ɗum kuugal juuɗe maaɗa.
11Kanjum ɗum majjey, ammaa aan a tabbitey.
Ɗum fuu ɗum hihiɗey kama kolte,
12a taggey ɗum kama wudere,
ɗum waylitete kama no ɗum waylirta kolte.
Ammaa aan a waylataako,
duuɓi maaɗa nde'ataa faa abadaa.#1.10-12 Jabuura 102.25-27
13Allah meeɗaay vi'igo malaa'ikaajo koo go'oto :
« Jooɗa e junngo am nyaamo
faa mi waɗa wanywanyɓe maaɗa laatoo jaaɓruɗum kosɗe maaɗa. »#1.13 Jabuura 110.1 ; Kuuɗe Lilaaɓe 2.35
14Ɓeye ngoni malaa'ika'en ? Malaa'ika'en fuu ɓe ruhuuji kuwanooji Allah, ɗi o lilata gam mballa ɓeen heɓeyɓe kisndam.
Currently Selected:
Ibraaninkoo'en 1: fuq
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
