2 Korontu'en 1

1Miin Bulus *lilaaɗo Yeesu *Almasiifu gada e nyumo Allah, e banndii en Timote mbinndani on ngo'ol ɗereewol. Emin kinna *ikiliisiya Allah ngonka Korontu e seniiɓe wonɓe nder lesdi Aakaya fuu. 2Allah *Baaba meeɗen e Jawmiraawo meeɗen Yeesu Almasiifu mbarkiɗin on, kokka on jam nder ɓerɗe mooɗon.

Bulus yettii Allah

3Maaltemma Allah Baaba Jawmiraawo meeɗen Yeesu *Almasiifu. Kanko woni *Baabiraawo keeɓɗo yurmeende, Allah de''itinoowo ɓerɗe dum. 4Kanko semmbiɗinta ɓerɗe meeɗen nder torraaji meeɗen fuu, gam enen boo mbaawen semmbiɗingo ɓerɗe wonɓe nder torraaji feere-feere, noon no Allah semmbiɗiniri ɓerɗe meeɗen. 5Noon no min njardi torraaji ɗuuɗɗi iri ɗi Almasiifu yari, noon boo Almasiifu de''itinirta ɓerɗe amin ɗuuɗɗum. 6To min torraama minon, ɗum gam ɓerɗe mooɗon nde''itinee kisneeɗon. To Allah de''itinii ɓerɗe amin minon, ɗum laatoto gam ɓerɗe mooɗon cemmbiɗa, mbaawon munyango torraaji iri ɗi min njarata. 7Emin koolii on korey, gam emin anndi noon no kawtirɗon e amin nder torraaji, noon kadimaa kawtirton e amin nder de''itineeki ki min keɓi.

8Banndiraaɓe, emin ngiɗi anndingo on torraaji ɗi min njari nder lesdi Aasiya.#1.8 Nder jaamaniiru Roomankoo'en, lesdi Turkiya ndi hannde kam vi'eteno Aasiya. Torraaji ɗiin teddanii min korey, ɗi ɓadake ɓurgo semmbee amin, faa min ittii tammunde yonkiiji amin. 9Min nanii nder ɓerɗe amin kama min taƴanaaɓe ceri'a maayde. Kanjum ɗum laatake gam min ekkitoo hoolaago Allah ummitinoowo maayɓe, naa hoolaago baawɗe ko'e amin. 10Min ngoonɗinii kanko kisnuɗo min nde'e maayde hulniinde, o hisney min ɗo'o yeeso boo. Goonga, emin ngoonɗini o ɓesdey hisnugo min. 11Onon, do'aaje mooɗon e mballa min. Noon boo yimɓe ɗuuɗɓe e ndo''oo gam amin. Allah boo no jaɓey do'aaje maɓɓe. Ndeen yimɓe ɗuuɗɓe no ngettey Allah sabu barkaaji ɗi min keɓi gada e toontol do'aaje ɗeen.

Bulus paasitake yi'itoygo Korontu'en

12Raa ko min mantorto : *nyumooji ɓerɗe amin boo e caaydanoo min, jo'onde amin nder duuniyaaru, ɓurna muuɗum nder mooɗon, e nde laatii laaɓnde, goongaare iɓnde to Allah. Min tokkaay anndal yimɓe duuniyaaru, ammaa yiɗde Allah tan ɗowi min. 13-14Nder ɗereeji amin min mbinndantaa on goɗɗum, to naa ko mbaawɗon janngugo e fahamugo. Jo'oni eɗon pahama ɗum seɗɗa tan, ammaa yeeso ɗo'o emi yiɗi pahamon ɗum booɗɗum. Ndeen on mbaawey mantoraago min, noon no minon boo min mantortoo on nyannde bittoyki Yeesu Jawmiraawo meeɗen.

15Mi tabbitinii dow ma'ajum, kanjum waɗi ngiɗnoomi wargo to mooɗon, gam keɓon barkaa nde ɗiɗi. 16Emi yiɗnoo yaalgo to mooɗon, ndeen mi wutoroo lesdi Makedooniya. To mi vittoyii gada Makedooniya boo, mi yaalta to mooɗon, gam mballon yam nder jahaangal am yahago lesdi *Yahuudiya. 17Nde mbi'inoomi mi warey to mooɗon, on tammii ɓerɗe ɗiɗi mbi'irumi ka naa ? Nakay on tammii mi vi'a « ee », ndeen kadimaa mi vi'a « a'aa », kama baɗoowo ko yiɗi ? 18Daahir Allah saaydanii min, ko min mbi'i on laataaki « ee » e « a'aa » fuu nde wo'ore. 19Gam Yeesu *Almasiifu *Ɓiɗɗo Allah, mo miin e Siilas e Timote min nga'ajini on habaru muuɗum, naa ɗum mo « ee » e « a'aa ». « Ee » tan woni nder ma'ako dum. 20Daahir alkawalji Allah fuu laatake « ee » nder Yeesu Almasiifu. Kanjum waɗi enen boo mbi'ireten « Aamiin »#1.20 Nder aayaare ndeen ma'ana « aamiin » woni « ee »., faa Allah teddinee. 21Kanko tabbitini en nder kawtal e Almasiifu, minon e mooɗon fuu. Kanko boo suɓi en. 22O waɗanii en lammba, gam hollugo enen ɗum ɓe ma'ako. O waɗii *Ruhu ma'ako nder ɓerɗe meeɗen kama nannguru ko o siryii hokkugo en ɗo'o yeeso.

23Allah woni caayduujo am, mi maaya to mi fevii. Mi yiɗaa mettinango on ɓerɗe, kanjum haɗi yam so''oyaago Korontu. 24Wanaa darvango goonɗinki mooɗon min ngiɗi, gam on ɗoon tabbiti nder ma'aki. Ammaa emin ngiɗi huudugo e mooɗon gam velvelo mooɗon ɓesdoo.

Currently Selected:

2 Korontu'en 1: fuq

Highlight

Copy

Compare