Psalm 144

144

Psalm 144

Hay Dasal Nan Patul An Hi David

1Madayaw hi Apu Dios an paddungnay doplah an ihi''ugan te hiyay nangdat hi bikah'u ya nuntuddun ha"on an mi'gubat.

2Ongal di pamhodnan ha"on ya hiyay bumoddang ya mangihwang i ha"on.

Te pangabakona' hinan e' pi'gubatan on numbalinona' hi ap'apun dadiyen boble.

3Ot nomnomnomo"e Apu Dios ya undan nganne ami nin an tatagu ta e da'mi pa'annomnomon i he''a.

4Ya na'omtang ya abuh han pi'taguwanmi an umat amih nan a''o onu dibdib an hin'omtang ya nama"id.

5Daan mo bahan Apu Dios ta iluwatmuh ad abunyan ta duma"ul'a ta dapaom nadan billid ta umahukda.#Psalm 104:32

6Ya hanat ipa'alim di kilat#Psalm 18:14 an ay papan di panam ta pun'ipto'muh nadan binuhulmu ta wan ahibubuttikanda ta miwakatda.

7Ya daan mo bahan ta ta'on on nee'ahnah nan awadam ya guyudona' ta ihwanga' hinadan binuhul'u an malpuh udum hi boble te paddungna tayyay mun'altinga'.

8Dadiyen binuhul'u ya ma'layyahda te ta'on on agge immannung on isapatada.

9Mu ha"on'e ya ikantaan da'a Apu Dios hi balun kanta an idihhan'un ipagangoh nan lira ta pundayaw'un he"a.

10Te he"ay uggan bumoddang hinadan udum an patul ta nangabakdah gubat.

Ya ta'on on ha"on an hi David an baalmu ya he''ay mangih'ihwang i ha"on.

11Ot ad uwani ya hanat ihwanga' bo hinadan ma'layyah nimpen binuhul'u an nalpuh udum hi boble te ta'on on layah on isapatadan alyonday immannung.

12Ya hanat hanadan mumpangilog an linala'in imbabalemi ya umatdah nadan nitanom hinan malumong an luta ya atbohdih nadan binabai ta a'apgohanda ta umatdah nadan nun'a'alkusan an tu"ud hinan palasyu.

13Ya hanat mamapnuy alangmih nadan apitonmi ya hanat mun'a'ahlag nadan kalneromi ta dumakkodakkolda ta ma'apnalan nadan pumpastolanmi.

14Ya hanat ma''id ha maballuh nadan inlum di bakami.

Ya hanat ibaliw da'mih nadan mi'buhul i da'mi ta adi ami bo mumbalin hi balud hi udum hi boble ya ta ma"id mo ha atatakut hi ma'ma'at hitun boblemi hi lummuh emi umukayungan.

15Ot mipa'amlong nan himpamoble an pangatam i danaen namin te he"a Apu Dios di dayawonda.

Currently Selected:

Psalm 144: ifa

Highlight

Copy

Compare