Psalm 119
119
Psalm 119
Hay Ma'at Hinadan Mangun'unud Hinadan Tugun Apu Dios
1Mipa'amlong nadan nipto' di pangatda an un'unudonda nadan tugun Apu Dios.
2Ya mipa'amlong nadan tatagu an hay eda pangun'unudan i dadiyen tugun di minonomnom i dida.
3Ot nipto' hidiyen atonda te hanadan pinhod Apu Dios di at'attonda.
4Imbagam Apu Dios an hanadan tugunmuy halipodpodonmin unudon hi inggana.
5Ta hiya nan ha"on'e ya datuwey pohpohdo' hi unudon.
6Te onha unudo' an namin nadan tugunmu ya innila' an ma''id ha gumalat hi e' ibabainan.
7Ot ongal di punhanaa' i he"a te nipto' nadan ada'adalo' an tugunmu.
8Dadiyey pohdo' hi unudo' ot hanat adiya' inganuy.
9Hanan mangilog ya mihwang hi pumbahulan hi'on unudona nadan tugunmu.
10Ot ta'on on ha"on ya ato' di abalina' an mangat hinadan pohdom Apu Dios.
Ot hanat boddangana' ta inaynayun'un unudon nadan tugunmu.
11Ta hanadan tugunmuy pun'onano' hi nomnom'u ta wan adiya' mumbahul.
12Ya he"ay dayawo' Apu Dios ot hanat minaynayun an itudduwana' hinadan tugunmu.
13Ta dadiyey ibagabaga'
14te ongal di naminhod'un mangunud hinadan tugunmu mu hay naminhod'u hinadan mikadangyan.
15Ta hiya nan ada'adalo' dadiyen tugunmu ya dadiyey minonomnom i ha"on.
16Ot ongal di amlong'u an mangunud hinadan tugunmu.
Ta hiya nan adi' linglingon dadiyen tugunmu.
Hay E Pun'amlongan Hinan Tugun Apu Dios
17Wagahana' bahan an baalmu Apu Dios ta wan mi'taguwa' ta wan unudo' nimpe nadan tugunmu.
18Ya hanat boddangana' ta wan ma'awata' di aphod dadiyen tugunmu.
19Ha"on ya adi madney pi'taguwa' hitun luta ot hanat boddangana' ta ma'awata' nadan tugunmu.
20Te ongal ahan di naminhod'un manginaynayun an mangadal ya mangat hinadan tugunmu.
21Te dusaom nadan munlattuwag ya mungngoheh nadan tugunmu.
22Ot hanat adim iyabulut an pihulona' i dida hinan e' pangun'unudan hinadan tugunmu.
23Ya ta'on on nunhahapit nadan ap'apu ta dadagona' mu hiyah diyen adi' iwalong an mangada'adal hinadan tugunmu.
24Te nadan tugunmuy pun'amlonga' ya datuwey manugun i ha''on.
Hay Pangun'unudan Hinadan Tugun Apu Dios
25Mun'atte'atteya' tee Apu Dios ot hanat pabikahona' bahan te hidiyey imbagam.
26Imba''ag'un namin di a'at'un he"a ya dingngola' ot boddangana'.
Ot itudduwana' bahan hinadan pohdom hi ato'.
27Hanat boddangana' nimpe ta wan ma'awata' nadan maphod an tugunmu ta wan datuwey mipapanomnom hi ato'.
28Nunhigla tayyay inomnoma' ot daan mo bahan ta pabikahona' te hiyay imbagam hi atom.
29Ya boddangana' bahan ta ma"id ha e' kulukon.
Ya hom'ona' ta wan ma'awata' nadan tugunmu.
30Pohdo' an he"ay unudo' ta hiya nan iyohha' di punnomnom'u hinadan tugunmu.
31Inunud'u nadan tugunmu Apu Dios ot hanat adim bahan iyabulut an mibabaina'.
32Te nunhiglay naminhod'un mangunud hinadan tugunmu ot innila' an boddangana' ta ma'ud'udman di pun'awat'uh nadan tugunmu.
Hay Aton Ta Ma'innilaan Nan Nipto' An Pangat
33Hanat itudduwana' Apu Dios hinadan tugunmu ta dadiyey unudo' hi inggana.
34Mu mahapul an boddangana' nimpe ta ma'awata' ta ihamad'un mangunud i dadiye.
35Te hanan e' pangunudan i dadiye ya umipa'amlong i ha"on.
36Ot hanat boddangana' bahan nimpe ta bokon hay e' kumadangyanan di e' gagamgaman ta hanaot an e' pangun'unudan hinadan tugunmu
37ta bokon bo hanadan ma''id ha hilbinay gamgama'.
Ya hanat idattana' hi nahamad an pi'taguwa' an umat hinan imbagam.
38Ta ipa'annungmun ha''on an baalmu nan imbagam hi atom hinadan mangun'unud i he"a.
39Te hanadan tugunmuy mangihwang i ha"on hinan itakut'un e' ibabainan.
40Ongal di naminhod'un mangunud hinadan tugunmu ot hanat gapuh anahamad di a'atmu ya ipaphodmuy pangat'u.
41Ya hanat ipatigom nan munnananong an pamhodmun ha''on Apu Dios ta ihwanga' hi adadaga' an miyunnudan hinan imbagam hi atom.
42Ta waha pambal'uh nadan mama'bain i ha"on te waday dinol'uh nan hapitmu.
43Ya boddangana' ta nadan immannung di hapito' te mundinola' hinadan imbagam hi atom.
44Ot ituwen itaguwa' ya inaynayun'un unudon nadan tugunmu.
45Ta malinggopa' an mi'it'ittagu te un'unudo' nimpe nadan tugunmu.
46Ya adiya' bumain an e mangipa'in'innila hinadan tugunmu hi apatupatul.
47Te ongal di naminhod'uh nadan tugunmu ta hiya nan nunhiglay amlong'u an mangunud i dadiye.
48Ot ada'adalo' te ongal di naminhod'uh nadan tugunmu ta nomnomnomo' di niyatanah nan nitaguwa'.
Hay E Pundinolan Hinan Tugun Apu Dios
49Hanat adim bahan linglingon nan imbagam i ha"on Apu Dios te hidiyey mangipadinol i ha"on an baalmu.
50Ot ta'on on hinan punholholtapa' ya adiya' minomnoman te imbagam an taguwona'.
51Ya ta'on on nunhiglay pamihul nadan munlattuwag an tatagu i ha"on ya adi' damdama iwalong an mangunud hinadan tugunmu.
52Te wa'et nomnomnomo' nadan tugunmuh din kanaman ya ma'al'alubyaga'.
53Ta hiya nan nomnomnomo"e nadan adi maphod di pangatda an ngohayonda nadan tugunmu ya nunhiglay bohol'un dida.
54Ot tun na'omtang pibo an pi'taguwa' hitun luta ya nanongnan ikankanta' nadan tugunmu.
55Ya ta'on on hinan mahdom ya nanongnan he"ay nonomnomo' ya nadan tugunmuy minonomnom hi unudo'.
56Ot un'unudo' nadan tugunmu te datuwey pun'amlonga'.
Hay E Pangun'unudan Hinan Tugun Apu Dios
57He"a Apu Dios ya abuh di mahapul'u.
Ta hiya nan ibaga' tee an unudo' nadan tugunmu.
58Ot mumpahmo'a' i he''a ta hom'ona' bahan an miyunnudan hinan imbagam.
59Te hidin nomnomnomo' hi'on nganney maphod hi ato' ya impa'dul'un unudon nadan tugunmu.
60Ta nihipun i diye ya ma"id ha alyo' hi indani ni' ta ahi' unudon mu on'uot inhipun an inunud dadiyen tugunmu.
61Ta ta'on ona' a"ulan hinadan adi maphod di pangatda ta ato' nan pumbahulan mu miploh damdama nadan tugunmuh nomnom'u.
62Ya hinan tongan di labi on bumangona' ta dayawon da'a te he"a an Dios ya nipto' di pangatmu.
63Ya an namin nadan waday takutnan adi mangunud i he"a ya diday ibilang'uh gagayyum'u.
64Dakol di ma'ma'at hitun luta an atigan nan ongal an pamhodmu Apu Dios i da'min tatagu.
Ot hanat inaynayunmun mangituddu hinadan tugunmu i ha''on.
Nabalol Nan Tugun Apu Dios
65Impa'annungmu Apu Dios nadan imbagam ya impatigom di aphodmun ha''on an baalmu.
66Ta hiya nan mundinola' hinadan tugunmu.
Ot hanat idattana' bahan hi la'ing ta hanadan nipto' di ato'.
67Hidin aggeya' ni' dinusa i he"a ya hanadan adi maphod di ina'inat'u mu ad uwani mo ya hanadan tugunmuy un'unudo'.
68Maphod an namin di atom ya ma'ule'a.
Ot hanat itudduwana' bahan hinadan nipto' an pangat.
69Hanadan munlattuwag ya dakol di layah hi ipabahuldan ha"on mu hay immannung ya hanadan tugunmuy un'unudo'.
70Dadiyen tatagu ya adida ahan ma'awatan nadan tugunmu.
Mu ha''on'e ya pun'amlonga' nadan tugunmu.
71Te hanan inyabulutmun nunligata' ya dakol di inadal'u hinadan tugunmu.
72Te nabalbalol nadan tugunmu mu nadan dakol an balitu' onu silber.
Nan Tugun Apu Dios Ya Mabalin An Pundinolan
73He''a Apu Dios di nunlumun ha''on ot hanat boddangana' ta ma'innilaa' di a'at nadan tugunmu.
74Ta wa'et tigon nadan ibba' an mangun'unud i he"a nan pangipapto'mun ha"on ya mun'am'amlongda te mundinola' hinadan tugunmu.
75Ot innila' an nipto' an namin di atom Apu Dios ya adim ibahhon aton di imbagam an umat hi nundusaam i ha''on.
76Ot hanat gapuh nan munnananong an pamhodmun ha''on ya palinggopona' an miyunnudan hinan imbagam i ha"on an baalmu.
77Ot hanat hom'ona' ta wan minaynayun di pi'taguwa'.
Te pun'amlonga' an mangunud hinadan tugunmu.
78Hanadan tugunmuy nanongnan ada'adalo' mu hanada'en munlattuwag an tatagu ya hanat mibabainda hinan agge immannung an ipabahuldan ha"on.
79Ot hanat hanadan ibba' an mangun'unud i he"a an nanginnilah nadan tugunmu ya mi'hayyupdan ha"on.
80Ya hanat boddangana' ta wan na'unuda' hinadan tugunmu ta wan ma''id ha gumalat hi e' ibabainan.
Hay Dasal Di Ohan Mumpahmo'
81Nadne tayyay nunholholtapa' mu hihimlo' damdamay em pangihwangan i ha"on te ongal di dinol'uh nan hapitmu.
82Mu nableya' mo tayya an mamannod hi em pangipa'annungan hinan hapitmu.
Ta hiya nan alyo' di, Hi anuud nin di pamoddangam i ha"on.
83Te umman tayya mun'atte'atteya' an umata' i ha lalat an ittuwan di bayah an tuwen mapa"ih.
Mu ta'on on athidi ya adi' damdama iwalong nadan tugunmu.
84Ot ona'dan tatawwa munholholtap hi inggana?
Undan anuud ya ahim dusaon hantudan adi umunud i he"a an mamalpaligat i ha"on.
85Ya tee bo udot an ana"ulana' i dida an paddungnay manganiphoddah pumbitudan ha"on.
86Ya dakol nimpey agge immannung hi ipabahuldan ha"on ta pangigadulandan mamalpaligat i ha"on.
Mu mundinola' damdama hinadan tugunmu ot agam bahan ta boddangana'.
87Aya' tayya patapatayon i dida mu agge' damdama inwalong nadan tugunmu.
88Ot gapuh nan ongal an pamhodmu ya hanat ihwanga' hi ate ta way ato' an manginaynayun an mangunud hinadan tugunmu.
Hay Adi Punduwaduwaan Hinan Hapit Apu Dios
89Hanan tugunmu Apu Dios ya nahamad di a'atnah inggana an umat hi ad abunyan.
90Ya atbohdin adi maluman di pangipapto'muh tatagum an ta'on on hanadan mun'atanudan an umat hitun limmum an luta an munnananong hinan nipabunana.
91Ya an namin nadan limmum ya hiyah diyey niyatandah din nunlumuwam i dida te an naminda ya he"ay unudonda.
92Ot onha ma''id nin nan tugunmun mangdat hi amlong ya dinol'u ot wan nanatteya' tuwali an gapuh nadan nunholholtapa'.
93Ta hiya nan adi mabalin hi iwalong'u nadan tugunmu te gapun dadiyen tugunmu ya mataguwa'.
94Ot ato' an namin di abalina' an mangun'unud hinadan tugunmu.
He"ay ud tagun ha"on ot hanat inaynayunmun mangihwang i ha"on.
95Te bobota'ona' hinadan adi maphod di pangatda mu adiya' tumakut te minonomnom i ha"on nadan tugunmu.
96Innila' an namin di nganneh diye ya waday pogpogda mu hanada'en tugunmu ya munnananongdah inggana.
Hay Pamhodan Hinan Hapit Apu Dios
97Nunhiglay naminhod'uh nadan tugunmu ta hiya nan ada'adalo' hi abigabigat.
98Ta nala'la'inga' mu hanadan binuhul'u te nonomnomo' nadan tugunmu.
99Ot gapu ta ada'adalo' nadan tugunmu ya dakdakkol di innila' mu hanadan bihtulu'.
100Ya gapuh e' pangun'unudan i dadiyen tugunmu ya nanomnomana' mu nadan a'amamma.
101Ya adi' pinhod an aton nadan adi maphod te pinhod'u nimpen unudon nadan tugunmu.
102He"ay nuntuddun ha"on ta hiya nan adi mabalin hi iwalong'u nadan tugunmu.
103Te paddungnay munlumiih nadan tugunmu an inlumlumiihda mu hay danum di iyukan.
104Ta gapuh nadan tugunmu ya limma'inga' ta hiya nan nunhiglay agge' naminhodan hinadan adi maphod an pangat.
Nan Hapit Apu Dios Ya Ay Dilag
105Hanan hapitmu Apu Dios ya paddungnay dilag an dilaganay awo'.
106Ta hiya nan pa'annungo' nan imbaga' an unudo' nadan maphod an tugunmu.
107Nunhigla tayya hantun holholtapo' ot hanat boddangana' te hidiyey imbagam.
108Ya hanat abulutom Apu Dios tun punhanaa' i he"a ta wan inaynayunmun mangituddun ha"on hinadan tugunmu.
109Ot ta'on on wa'e on aya' patapatayon ya adi' damdama iwalong an mangunud hinadan tugunmu.
110Ya ta'on on ana''ulana' hinadan adi maphod di pangatda mu agge' damdama imbahho nadan tugunmu.
111Te ibilang'u nadan tugunmu hi nabalol an odon'uh inggana te datuwey mangipa'amlong i ha"on.
112Ot datuwen tugunmu ya mipapanomnom i ha"on hi inggana.
Hay E Luminggopan An Gapuh Pangunudan Hinadan Tugun Apu Dios
113Nunhiglay naminhod'uh nadan tugunmu ta hiya nan ma'ahihhiwoa' hinadan adi mangiyohha hi pangun'unuddan he"a.
114Te madinola' hinadan tugunmu te dadiyey paddungnay ihi"uga' onu hapiyo'.
115Ot da'yun hay pumbahulan di impa'inghayu ya hanat adi ayu mihaghaggon i ha"on.
Te umman ha"on'e ya hanadan tugun Apu Dios di un'unudo'.
116Ot hanat pabikahona' bahan Apu Dios ta wan tumaguwa' te hidiyey imbagam.
Ya hanat adim iyabulut an madismayaa' hi e' pangidinolan i he"a.
117Ot pabikahona' bahan nimpe ta way ato' an manginaynayun an mangunud hinadan tugunmu.
118Mu hanada'en adi mangunud hinadan tugunmu ya iwalongmu dida ta ma"id ha hilbin nadan nonomnomondan panga''uldah tatagu.
119Te ibilangmu didah ay ginalut ta hiya nan ha"on'e ya un'unudo' nadan tugunmu.
120Te gumayonggonga' hi takut'u hinan atom an mundusa.
Hay Naminhodan An Mangunud Hinadan Tugun Apu Dios
121Hanadan maphod ya nipto' an pangat di ina'inat'u ot hanat adim bahan iyabulut Apu Dios an abakona' hinadan binuhul'u.
122Ta boddangana' bahan an baalmu ta adim iyabulut an paligatona' hinadan mumpunlattuwag an tatagu.
123Nadne tayyay nanannoda' hi pangihwangam i ha"on an miyunnudan hinan imbagam.
124Ot ukod'ah nan pohdom hi atom i ha''on an miyunnudan hinan munnananong an pamhodmu.
Ya itudtuduwana' bahan nimpe hinadan tugunmu.
125He''ay ud baal i ha''on ot hanat idattana' hi abalina' ta wan ma'awata' nadan tugunmu.
126Ya daan mot ad uwaniy pundusaam Apu Dios hinadan adi mangunud hinadan tugunmu.
127Ha"on'e ya ong'ongngal di pamhod'uh nadan tugunmu mu hay pangomno' hinadan namahmah an balitu'.
128Ot gapu ta innila' an nipto' an namin nadan tugunmu ya nunhiglay agge' naminhodan hinadan adi maphod an pangat.
129Hanadan tugunmu ya ma"aphod ya umipa'amlong ta hiya nan pinpinhod'un unudon.
130Te hay e panginnilaan hinadan tugunmu ya paddungnay hidiyey mamatal hi nomnom ta mabalin an mipaphod di punnomnom nadan paddungnay ma"id ha nomnomda.
131Ta hiya nan aya' na''uwoh te nunhiglay naminhod'u an manginnilah nadan tugunmu.
132Ot donglom bahan tun ibaga' ta hom'ona' an umat hi atom hinadan mangun'unud i he"a.
133Ta ipa'annungmu nadan imbagam ta adim iyabulut an hanadan adi maphod an pangat di mun'onan hi nomnom'u.
134Ya ihwanga' hinadan mamalpaligat i ha"on ta way ato' an manginaynayun an mangunud hinadan tugunmu.
135Ya ipatigom di ulem i ha"on an baalmu ta intudduwana' hinadan tugunmu.
136Mu nunhiglan lumuwaa' an gapuh adi pangun'unudan nadan tataguh nan tugunmu.
Hay A'at Nadan Tugun Apu Dios
137Immannung an nahamad di a'atmu Apu Dios ya nipto' nadan tugunmu.
138Ot gapu ta athidiy a'at nadan tugunmu ya mabalin an waday dinol'u an mangunud i dadiye.
139Mu hanadan binuhul'u ya ngohayonda nadan tugunmu ta hiya nan nunhiglay bohol'un dida.
140Mu ha''on an baalmu ya ongal di naminhod'u i dadiyen tugunmu te na'innilaa' an adim ibahhon aton nadan ibagam hi atom.
141Ot ta'on ona' pihulon ya ma"id ha pangibilang di tatagun ha"on ya nanongna damdama an unudo' nadan tugunmu.
142Te hanan nipto' an pangatmu ya adi maluman hi inggana ya atbohdin immannung nadan tugunmu.
143Ot ta'on on dakol di punligata' mu pa'amlongona' hinadan tugunmu.
144Te hiyah diye nimpe an nipto' nadan tugunmu ot hanat boddangana' ta wan ma'awata' nadan pohdom ta way ato' an mi'tagun he"a.
Hay E Pumpahmo'an I Apu Dios
145Adiya' mangmanghop an mumpaboddang i he''a Apu Dios.
Ot hanat donglona' bahan ta wan inaynayun'un mangunud hinadan tugunmu.
146Ta hinan pumpahmo'a' ya ihwanga' bahan hinadan binuhul'u.
147Adi mabigat on bimmangona' ta mumpaboddanga' i he''a te mundinola' hinadan imbagam.
148Ya adi umaliy inlo''uh nan mahdom an munnomnomnom hinadan imbagam hi atom.
149Ot gapuh nan munnananong an pamhodmu ya donglom bahan di dasal'u ta atom nan imbagam an ihwanga' hinadan binuhul'u.
150Te dee aay an mun'ihaggon nadan naminhod an mamalpaligat i ha"on an dida nadan mungngoheh nadan tugunmu.
151Mu madinola' te wada'a an pun'ibba'.
Ya ma''id ha mibahho hinadan imbagam hi atom.
152Ot tee mo an nadney nangada'adala' hinadan tugunmu ya na'innilaa' an dadiyen tugunmu ya adida maluman hi ingga'inggana.
Hay E Pumpaboddangan I Apu Dios
153Hanat ihwanga' bahan Apu Dios hitun holholtapo' ot agge' attog inwalong an mangunud hinadan tugunmu.
154Ot hanat boddangana' bahan nimpe ta mihwanga' an miyunnudan hinan imbagam.
155Hanadan adi maphod di pangatda ya ma"id ha namnamadan mihwang hinadan punligatanda te adida unudon nadan tugunmu.
156Mu he''a Apu Dios ya ongal di homo'mu ot hanat ihwanga' te hidiyey imbagam hinan tugunmu.
157Dakol nadan binuhul'u an mamalpaligat i ha"on mu adi' damdama iwalong nadan tugunmu.
158Nunhiglay bohol'u hi'on tigtiggo' nadan mungngoheh nadan tugunmu.
159Ot hanat ihwanga' bahan Apu Dios an gapuh nan ongal an pamhodmu ot innilam an ongal di naminhod'u an mangunud hinadan tugunmu.
160Te an namin nadan tugunmu ya nipto' ya adida maluman hi ingga'inggana.
Hay E Pangidinolan Hinan Hapit Apu Dios
161Amod ona' paligaton hinadan nabaktuy sa'adda an ta'on on ma"id ha bahul'u mu tumakuta' an adi mangunud hinadan tugunmu.
162Ya nunhiglay amlong'uh nadan imbagam hi atom an umat hi amlong di ohan tagun waday hinama'nah balitu'.
163Mu nunhiglay bohol'uh nadan ma'layyah te ha ahan di popohdo' ya nadan tugunmu.
164Ta hinan ohay algo ya mumpipituwa' an munhana i he"a te nipto' nadan tugunmu.
165Te hanada'en umunud hinadan tugunmu ya malinggop di nitaguwanda te ma"id ha iyaguhda.
166Ot madinola' an manmannod hi em pangihwangan i ha"on.
Ya inaynayun'un unudon nadan tugunmu.
167Pinpinhod'u nadan tugunmu ta hiya nan un'unudo'.
168Ot innilam hituwen pangat'u.
Hay Dasal An Mumpahmo'
169Donglom bahan Apu Dios tun dasal'un mumpahpahmo' i he"a.
Ya boddangana' ta mipa'annung nan imbagam ta wan mabalin an ma'awata' nan hapitmu.
170Ot hanat donglom nimpey dasal'u ta ihwanga' ta miyunnudan hinan imbagam.
171Dayawon da'ah inggana te itanudtuduwana' hinadan tugunmu.
172Ya ikankanta' nadan tugunmu te nipto'dan namin.
173Hanadan tugunmuy pohpohdo' an unudon ot hanat nundadaan'a pibo an mamoddang i ha"on.
174Ot madinola' an ihwanga' i he''a Apu Dios te hay pun'amlonga' ya hay pangunuda' hinadan tugunmu.
175Ot hanat ihwanga' nimpe ta wan dayawon da'a ya hanat boddangana' an mangunud hinadan tugunmu.
176Te umata' tee i ha natala' an kalnero an immadawwi i he"a ot hanat hom'ona' bahan ta mibangngada' an baalmu i he"a.
Te agge' inwalong an mangunud hinadan tugunmu.
Currently Selected:
Psalm 119: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
