Proberbs 6

Adim Ihapit Nan E Munggawat

1Imbabale', hi'on inabulutmun he''ay mangihapit i ha gumawat 2ta niluh an inatmu ya ay'a nahablut te mabalin an he"ay hingilonda. 3Mu hay maphod hi atom ya e'a mumpahpahmo' hinan gimmawat ta adina ibahhon bayadan ta wan bokon he''ay pumbagaanda. 4Ot adi'a madmadinnol an malo' onu mun'ible 5ta ingganah umaan'a i diyen em nahablutan ta ay'a hamuti onu ulha an nihwang hinan mun'anup.

Hay Tugun Hinan Ma'ahiggan Tagu

6Nan ma'ahiggan tagu ya maphod on itigonah nan pangat nadan gulom 7te dida ya ta'on hi ma''id ha mummandal i dida an muntamu 8ya ma"ugo'e ya inniladan mangidadaan hi anonda. 9Mu nan ma'ahiggan tagu ya palpaliwanan malmallo'. 10Ya alyona eh'ay malo' ni' i ha na'omtang onu op'opona ni' di ta'lena ta mun'ible 11ya pinalpaliwanaot ya ma'ma"idan an namin di mahapulnah nan nunhituwana an ay nahod'ap.

Nan Adi Maphod An A'at Di Tatagu

12Nan adi ahan maphod di nomnomnan tagu ya amod on nan layah di ena hapihapiton 13ya amod on mungkodyat ya dakol di udum hi atonan bumalih tatagu 14te hay nonomnomona ya hay ena punlayahan ta hiya nan an namin di umayana on wadan waday atonan bumahbah. 15Athidiy amodna e ato'aton ta alinah on ay kimmaynit ya dimmatong ha nunhiglan punligatana ya ma''id mo ha ena pumhodan.

16Waday pitun a'at di tatagun nunhiglan umipabungot i Apu Dios

17an umat hinan mumbaktun tagu ya nan agge immannung di hapitonan tagu ya nan pumapateh ibbanan tagu an ta'on on ma"id ha bahulna

18ya nan numanomnom hi adi maphod hi atona ya nan hi kittang on mangat hi adi maphod ya

19nan layah di puntistiguna.

Ya athidi boh nan tagun bumahbah hinan maphod an punhahayyupan di tatagu.

Hay Adi Punluktapan

20Imbabale', unudom nan tugun amam ya atbohdin adim linglingon nadan intanuddun inam 21ta iha''admuh nomnommu an aymu ibabanggol. 22Ta dadiyen intugunday ay mangipappapto' i he''a hinan kumpulnan umayam ya ta'on on nan mahdom. Ya ta'on on hinan bumangonam ya datuwey nomnomnomom. 23Te nan tugundan he''a ya umat hinan mumbinang an dilag an ituddunay pummaphodam. Ya atbohdih nan panitilogdan he''a an hidiyey panginnilaam hi a'at di maphod an itaguwam 24ta miyadawwi'ah nadan adi maphod di pangatdan binabai ya ta'on on nadan ay ma''aphod di hapitonan nun'alahin an binabai. 25Ot hanat adi'a maha'ul hinan amaphod di tigon di adolna onu hinan matana. 26Te nan mi'ilala'in babai ya mabalin an mabayadan i ha ipinghan an anon ya mabalin bon hiyay lummuh atayan nan lala'in nangiluktapana i ahawana. 27Te nipaddung hinan bala an undan mabalin an ikabuy ya adi maghob di lubung. 28Ya atbohdi an adi mabalin hi igoppa' hinan bimmalan apuy ya adi ma'atungan di dapan. 29Ot athidih nan lala'in e mi'ilo' i ha nalahin an babai te umannung an waday dusana.

30Te ta'on on nan mangakoh anona an gapuh inagangna 31ya onha ma'akhupan ot ihaliwda ta hay pumbayadna ya mumpipitu hinan balol di inakona ta hinuddum ya mahapul mon ibayadnan namin nan wadan hiya. 32Mu namamah nan umiluktap an lala'i an paddungnay agge nanomnoman te hiya ya dinadagnay nitaguwana. 33Te mi'patte nan ahawanan hiya ya pihulon mon di tatagu ta mipada''ul hi inggana. 34Te gapuh annel nan lala'in inluktapda ya nunhiglay bungotna. Ta hiya nan ma"id ha homo'nah pangiballohana. 35Ta ta'on hi atnay idatdah punhaliwana ya adina abuluton te adi ma'aan di bungotna.

Currently Selected:

Proberbs 6: ifa

Highlight

Copy

Compare