Proberbs 5

Hay Adi Punluktapan

1Imbabale', igongaham tun tugun'u ta hiyay nomnomnomom 2ta wan innilam an mamilih maphod hi atom ya hapitom.

3Hanan babain mi'ilala'i ya huma'ul te maphod di panapitna an ay malumiih an danum di iyukan ya ay lanan di olibo. 4Mu hay umudi ya han ligat ya hakit di nomnom di angangonah nadan linala'in nabaliyan. 5Ya nan lala'in miyun'unud hi athidin babai ya hidiyey lummuh atayana. 6Ya nan athidin babai ya ma"id hi nomnomna nan lummuh pi'taguwan te nan nibahhoy at'atona mu aggena innilay pumbalinan nan at'atona.

7Ot he"an imbabale' ya igongaham hituwen tugun'u ta adim linglingon. 8Hay maphod ya adi'a e miyun'unud hinan athidiy a'atnan babai ya ta'on on hinan balena ya adi'a e mihaghaggon hidi. 9Te undan pohdom an ipatigoy pamhodmuh nan athidin babai ta lummuh ma''id ha pamiyal di tatagu i he"a ya pinaligat da'ah nan mabungot an ahawana. 10Ya inalan di udum an tatagu nan kinadangyanmu ya an namin an nablayam. 11Ta hay umudi ya ma'ulat'a ta ingganah on ammunay tungalmuh mabati ta nunhiglay em umukayungan. 12Ya ahim mohpe alyon di, Athituy na'at te agge' pinhod an patugun. 13Onha inunud'u nadan nun'anomnoman an nuntudtudu 14ot wan adi nunhiglay e' nipada''ulan hi ad uwani.

15Ta hiya nan hay maphod ya adim tuwali iluktap nan ahawam ta hiyay nanongnah pohpohdom. 16Te undan pohdom an wadaday imbabalem hi kumpulnan binabai? 17Hanan nun'ahawa ya dida ya ammuna ta ma"id ha udum hi em iyun'unudan.

18Ot hanat nan ahawam tuwali di nanongnah pun'amlongam. 19Te mapmaphod nan ahawam. Ot hanat nanongnan umamlong'ah nan pamhodna. 20Ot he''an imbabale' ya adim ipatnan omnawan nan babain mi'ilala'i ta adi'a mi'mi'yeh nan babain waday ahawana.

21Te hi Apu Dios ya tigtiggonan namin nan at'aton di ohan tagu ta hiya nan innilanan namin di pangapangayana. 22Ot nan pumbahbahulan di ohan tagu ya hidiyey ayna aknaan ta ay talin mamobod i hiya. 23Ta hay iyatena ya gapuh adina dumngolan ta hidiyey mangipiyen hiyah nan lubu'.

Currently Selected:

Proberbs 5: ifa

Highlight

Copy

Compare