2 Corintios 10

Pabluha rekabie ge ka nu rigu'u ni'akani sina runieha

1Kwinaga neti Pablo, ttiba ben Cristuha, len tisa besiba lhe len elha si'i lasiba aníha‑ba rulisaa le, meskiba ganna rákana deki neti ttu nu rasibani ankaa tti dua arlole, ttaka tti rea idittu nna rákana deki yalhá idisa rinnea. 2Rinnabaa lole bittu uinle kini ka inne disaa ganna chi bisiaya ata se'ele‑na, kini abittu unia attiba chi rulaba lasia udhakaa ka nu rákana deki ri'itu ruinbatu attiba ruin ka benne se'e yiesi lo yu‑ni. 3Gwalí galá, meskiba ankatu ge yiesi lo yu‑ni, ttaka labí ruintu tti ruin ka nu se'e yiesi lo yu‑ni. 4Ri'itu tti ritilhatu len nu xxegwiha, labí rixuintu luesi nu rixúni ka soldadu se'e yiesi lo yu‑ni tti ritilhakana, sinuki ri'itu rixúlintu nu tsitsi ra le Tata Do Yebáha kini rutse'e lootu iyába nu ra tsitsi leni, 5delába rutse'e lootu iyába ka tisa rotsi'inu le ka benne tti rinneke lhe anágaba rutse'e loogabatu elha ttaba ruin ka nu rusunakana ki abittu uinbia ka benne Tata Do Yebáha lhe ruintu kini otsea ka benne nu rulaba leke nna udoke tisa ge Cristuha. 6Lebi'i ganna chi rudole tisa ge iyá tte, la'ania nna ri'itu chigaba se'e tsetu kini ugwetu elha disa iyá ka nu abittu rudokana tisa gebie.

7Lebi'i bittu ulannile ttixa anka ka benne lo lia, gwalulannila ke attiba ankaba geni. Ganna nuxa ttúle chi xen tsitsi lele deki chi ankale ge Cristuha, anágaba nna tegaba ki okinni ikile deki ri'itu chigaba ankatu ge benneha. 8Neti labí rettuti meskiba ganna ritebiaya de ra xxeni lasia tti ria: “Tata Xisiha‑ba betebie lo neda getu ki use'e tsitsitu le lo neda gebie, laa betege lo neda getu kini unnittitu le.” 9Bittu akinle deki runia uniasinia le len nu rinnea lo ka yetsi ridhelhaa ata se'ele‑na. 10Kumu se'e ka nu rákana: “Yalhá idisa rinnena lo ka yetsi ridhelhana, ttaka atti duna arlori'i, ttu benne terissiba ankana lhe labí ru'u leri'i tti anka ixtisa‑ni.” 11Ka nu rinne aní, raka letu kixxi'entu kana deki atti tteba rinnetu lo yetsi‑ni se'etu idittu, anágaba innetu ganna chi se'etu len lebi'i.

12Ri'itu labí eyaxintu ku'u luesitu prueba len ttu chupa ka nu se'e naa, ka nu rákana deki yalhaba tse ruinkana. Bi ge ka nuná. Runi nu a re itá lebani ruin ka nuná, kumu la labakana rigu'u luesikani prueba kini rule'e nuxakana rakaru gekani. 13Ri'itu labí ritebiatu inná xxeni letu ge nu ruintu, sinuki rekibatu rigixxi'atu ka tisa ge Tata Do Yebáha debá ataba chi bedha'ane tsekitu kixxi'atu ke, de nuha nna bisiatu ata se'ele‑na. 14Ri'itu labí ritebiatu tti ratu: “Chiba bitatu ata se'ele‑na”, kumu gwalíba ri'ilatu lade'a tte bisiatu ata se'ele‑na ki utixxi'entu le ge Cristuha. Ttebia galátu innetu ganna ttixka abíba chi bitatu ata se'ele‑na. 15Ri'itu labí ra xxeni letu ge sina ben attu benne subi, labí innátu deki ri'ilatu bentu sinaha. Ri'itu nu ruinlatu, xenba letu gele kua tsiaba lele ge Cristuha, aníha‑gaba nna tsani chiettirugaba sina getu daka ata se'ele‑na, 16kini isilarutu tsiatu kixxi'atu ka tisa geeha len ka benne se'e iditturu. Aníha uintu ki abittu satta'atu lo yu ata chi utixxi'a attu benne subi nna inná xxeni letu ge sina nu ben benneha. 17Laxkala nu raka leni inná xxeni leni ge nu ruinna, inná xxenila leni ge Tata Xisiha, kumu benneha nuha raka lenie na. 18Kumu nu titúbana ra xxeni leni ge nu ruinnaha, labí lana nuha eya'an tsena arlo Tata Xisiha. ¡Ko'o! Sinuki benne innála Tata Xisiha deki tseba runie, benneha‑la nuha eya'an tsebie arlo Tata Xisiha.

Currently Selected:

2 Corintios 10: zae

Highlight

Copy

Compare