Romã 13

“Jõvijã kõ ayvu kõ rupi tapeiko ipi”, e'i mã'ẽ

1Ãmõ, kee a'e pejẽ. Yvy pewarà rõvijã kõ ayvu rupi ikõ tijaiko ipi nẽ. Ãmõ, taa rõvijã kõ ayvu rupi teve. Janejare'e tè wayvumokasioka kõ ipi. Ajawyi ijayvu kõ rupi tijaiko ipi, a'e pejẽ. 2Ava mõ ojimokasi jõvijã kõ pè ijayvu renu tare'ã remẽ, ãwĩvo ve Janejare'e pè ojimokasi, ijayvu rupi tè ojimojõvijã kupa rewarà mõ. Noayvumokasi kõi sõ remẽ, nijayvukasi'ãi kuwa kupa mijã. Ajawyi a'evo mãe kõ ojiemavookatà ipi. 3Ikatuay ivo mãe kõ nokyjei oõvijã kõ wyi ipi. Ajamã'ẽ oiko teitete mãe kõ okyje oõvijã kõ wyi ipi. Ajawyi nijapotai jakyje janerõvijã kõ wyi ipi remẽ, ivo tijaiko teãmã ipi. Ãmẽ si kee e'ità janeupewarà mõ: “Nimanyvoi ãwĩ”, e'ità ãmẽ janeupewarà mõ kupa ipi. 4Janejare'e ayvu rupi tè jõvijã kõ oposiko janereko moterẽ gatua rè ipi. Ajamã'ẽ nivoi sõ jaiko ipi remẽ, aje janemomorijau kuwa jõvijã kõ ãmẽ ipi. Janejare'e ayvu rupi tè ikasi nivoi mãe kõ mojaiwea rè kupa ipi. Ajawyi tijakyje iwyi kõ nivoi jaiko remẽ. 5Ajawyi tisirovija katu janerõvijã kõ ayvu ipi, a'e pejẽ. Kee tija'e e'ã ajamã'ẽ: “Nivoi aiko sõ remẽ, jõvijã emomorijauvaytà. Ajawyi tè ijayvu rupi aikotà manyvo terereko e'ã”, tapejẽ e'ã. Sikuwa Janejare'e opota janerõvijã kõ ayvu rupi jaiko. Ajawyi janerõvijã kõ tisirovija e'e teãmã, a'e pejẽ.

6Ajawyi teve jõvijã kõ ayvu rupi tekoua repykwerà tijame'ẽ ijupe kõ ipi. Janejare'e posikoa rupi oposiko kupa ipi. Ojimokasi ywete oposikoa rè kupa ipi. 7Ajawyi nijaepyme'ẽive mã'ẽ tijaepyme'ẽma ky'y. Jõvijã kõ pewarà karakuri tijaepyme'ẽ ijupewarà mõ ipi. Simomojy janerõvijã kõ imoe'e kõ ipi. Ãwĩvo tijaiko ipi.#Mat. 22.21; Mak. 12.17; Ruk. 20.25

“Tijajiau katu ojee jaiko ipi”, e'i mã'ẽ

8Janemoma'e kõ simoepypa katu mãe kõ rõmõ tijaiko teãmã. Nijaepyme'ẽive mãe kõ tijaepyme'ẽ gatu ipi ky'y. Tijapi e'ã poroauvay rõmõ jaiko. Ãmõ kõ siauvay remẽ, ivo tekoua rupi katu jaiko teãmã. 9Kee e'i maekwerà rupi katu jaiko teãmã ãmẽ: “Imẽma mãe kõ, omẽnà rè kõrijõ ikõ toiko ipi nẽ. Imẽnà a'evo ve. Werekwarà rè kõrijõ tè ikõ toiko ipi nẽ. Ãmõ kõ rè tomã'ẽ tè.” Ãmõ, “Tapejuka e'ã ikõ mirà kõ ipi nẽ.” Ãmõ, “Tapemona e'ã ikõ koivo kõ moma'e rè ipi nẽ.” Ãmõ, kee e'i maekwerà: “‘Emoma'e rõmõ kuwasi mijã’! tapejẽ e'ã ikõ jomoma'e kõ pè ipi nẽ.”#Jisyry. 20.13-15,17; T.M. 5.17-19,21 Aepo e'i maekwerà rupi katu peikotà teãmã, kee e'i maekwerà rupi peiko remẽ: “Ãmõ kõ ikõ tapeauvay ipi nẽ. Ãwitõ pejiauvay, tãwĩvo ve ikõ peiko ipi nẽ”, e'i maekwerà.#Tek. 19.18 10Kee a'e aepo jaa pè. Jane kõ jaauvay ipi remẽ, nijamoai kõ'ãi ãmẽ ipi. Ivo tekoua rupi katu jaikotà teãmã ãmẽ ipi. Nijajavy ekojẽ'ãi ivo tekoua ãmẽ ipi.

“Ivo tapeiko Kiristu vãea rã moa'ua rè”, e'i mã'ẽ

11Tapejimotekokuwavay jẽ peiko ipi. Aje, sikuwa Jesu ovãe tarà mijẽ. Pemoa'u jẽ peiko remẽ, tapejiauvay ojee peiko ipi. Oke mã'ẽ vo 'ejẽ tapeiko e'ã. Pejirovija ypy Jesu rè remẽ pe wyi karamoe tè ky'y. Ajamã'ẽ aã age'e pe wyi nikuipei ivãea ky'y. Ajawyi tapetekokuwavay jẽ peiko, a'e pejẽ. 12Jesu vãea kee e'ità rõnõ. Ãwitõ pya kõ'ẽ taray remẽ, aryvo ojisa, a'evo ve. Ke'ĩ Janerõvijã ovãetà. Ajawyi tapeposiko e'ã peaiwererà rè ky'y. Janejare'e ayvu rupi kõrijõ tapeiko ky'y.

Ãmõ, tapejimokasi ivo e'ãa wyi pejireko katu ipi. Ãwitõ sota kõ irapa rapa tè iko ojipijarĩ mõ, ãwĩvo ve tapejipijarĩ ivo katuay mã'ẽ pupe peiko ipi. Janerõvijã ywete kasia rupi kõrijõ tè tapeiko ky'y, a'e pejẽ. 13Ivo tekoua rupi kõrijõ tapeiko teãmã. Ãmẽ tè napejimosĩoka'ãi ãmõ kõ rovake peiko. Pemãrãkuwaa tapemoyvypyoka e'ã ka'ua pè ipi. Ãmẽ ywesõ nivoi peiko ipi. Ãmõ, tapeayvu teitete e'ã ikenẽ. Tapejikõ'õ e'ã ikõ ãmõ kõ rè ipi nẽ. Ãmõ, tapejimomy'a e'ã ikõ ipi nẽ. Ãmõ, tapejimõarõ e'ã teve ikõ ãmõ kõ rè peiko nẽ. Wãisõ iteetejẽ tapeiko e'ã. 14Tapejimoane'e jẽ e'ã ikõ pejipy'amogeta aiwerà rã rè peiko ipi nẽ. Janerõvijã Jesu Kiristu pè ikõ tapejimokasioka wete ta'evo e'ã peiko ipi nẽ. Eko rupi tè peikotà ãmẽ. Ãmẽ tè pepy'a aiwerà napemokasioka'ãi, ãwisõ penemimota aiwerà rupi rõwã peikotà ãmẽ ky'y.

Currently Selected:

Romã 13: oymDBL

Highlight

Compare

Copy