Mateo 1
1
Jesucristo ëreerã tꞌɨ̃ pꞌãda
(Lucas 3.23-38)
1Jesucristo uchiaji chonaarãwedapema Rey Daviddeepa mãikꞌaapa Abrahamdeepa. Chonaarãwedapemaarãpa iru ëreerã tꞌɨ̃ pꞌãjida ichi tꞌẽepemaarãpa kꞌawaadamerã kꞌairãdeepa uchiaji.
2Abraham Isaac akꞌõre paji. Isaac Jacob akꞌõre paji. Jacob Judá akꞌõre paji mãikꞌaapa Judá ɨ̃pemaarãde ichiaba.
3Judá Fares mãikꞌaapa Zara akꞌõre paji. Ãchi nawe Tamar paji. Fares Hesrón akꞌõre paji. Hesrón Aram akꞌõre paji.
4Aram Aminadab akꞌõre paji. Aminadab Nahasón akꞌõre paji. Nahasón Salmón akꞌõre paji.
5Salmón Booz akꞌõre paji mãikꞌaapa Rahab Booz nawe paji. Booz Obed akꞌõre paji mãikꞌaapa Rut Obed nawe paji. Obed Jesé akꞌõre paji.
6Jesé Rey David akꞌõre paji. Rey David Salomón akꞌõre paji mãikꞌaapa Urías wẽra pada Salomón nawe paji.
7Salomón Roboam akꞌõre paji. Roboam Abías akꞌõre paji. Abías Asá akꞌõre paji.
8Asá Josafat akꞌõre paji. Josafat Joram akꞌõre paji. Joram Ozías akꞌõre paji.
9Ozías Jotam akꞌõre paji. Jotam Acaz akꞌõre paji. Acaz Ezequías akꞌõre paji.
10Ezequías Manasés akꞌõre paji. Manasés Amón akꞌõre paji. Amón Josías akꞌõre paji.
11Josías Jeconías, chi ɨ̃pemaarã ome akꞌõre paji. Mãɨrã pꞌanapachida Babilónia pꞌuurudepemaarãpa Israel pidaarã pꞌoyaadapꞌeda, presokꞌa ateedakꞌãri ãchi eujãdee.
12Ma Babilónia pꞌuurudee wãdapꞌedaa, Jeconías Salatiel akꞌõre paji. Salatiel Zorobabel akꞌõre paji.
13Zorobabel Abihud akꞌõre paji. Abihud Eliaquim akꞌõre paji. Eliaquim Azor akꞌõre paji.
14Azor Sadoc akꞌõre paji. Sadoc Aquim akꞌõre paji. Aquim Eliud akꞌõre paji.
15Eliud Eleazar akꞌõre paji. Eleazar Matán akꞌõre paji. Matán Jacob akꞌõre paji.
16Jacob José akꞌõre paji. José María ɨmɨkꞌĩra paji. María Jesús nawe paji. Ma Jesús ichiaba tꞌɨ̃jarapachida Cristo; jara kꞌinia bɨ Tachi Akꞌõrepa pëida eperãarã rey pamerã.
17Abrahamdeepa uchiada catorce uchiadapꞌedaarã uchiajida Rey David parumaa. Daviddeepa ichiaba uchiada catorce uchiadapꞌedaarã uchiajida Israel pidaarã ateerutamaa Babilónia pꞌuurudee. Ichiaba madeepa uchiada catorce uchiadapꞌedaarã uchiajida Jesucristo tꞌorumaa.
Jesucristo tꞌoda
(Lucas 2.1-7)
18Jesucristo tꞌoda nãga paji. Iru nawe, María, pedeetee baji José ome miakꞌãidaitꞌee. Mamĩda araa padai naaweda, Tachi Akꞌõre Jaurepa biakꞌoopiji. 19Josepa biakꞌoo bɨ unukꞌãri, miakꞌãi–e paitꞌee paji iru ome. Mamĩda José tꞌãri pia bada perã, María kꞌĩra nejasiapiamaapa kꞌĩupꞌee amaatꞌaaitꞌee paji, awaraarãpa kꞌawaanaadamerã. 20Mãga kꞌĩsia bɨde, kꞌãimokꞌaraaji ɨtꞌaripema ángel ome. Mãgɨpa mãgaji:
—José, Rey Daviddeepa uchiada, waaweenáaji María ome miakꞌãiitꞌee, Akꞌõre Jaurepata ma warra oopida perã. 21Mariapa ɨmɨkꞌĩra warra tꞌoitꞌee. Tꞌɨ̃ bɨitꞌeeda aji, Jesús, irua eperãarã kꞌaripaitꞌee perã atuanaadamerã ãchia pꞌekꞌau kꞌachia oopata kꞌaurepa.
22Mãga paji Tachi Akꞌõrepa jarapidakꞌa chonaarãweda ichi pedee jarapari itꞌaideepa:
23‘Awẽra ɨmɨkꞌĩra ome kꞌãi–ee bɨta biakꞌooitꞌee mãikꞌaapa ɨmɨkꞌĩra warra tꞌoitꞌee. Iru tꞌɨ̃jaradaitꞌee Emanuel.’ (Isaías 7.14)
Mãgɨ́ tꞌɨ̃ jara kꞌinia bɨ: “Tachi Akꞌõre tachi ome bapari.”
24José ɨ̃rɨmakꞌãri, ooji ma angelpa jaradakꞌa. María ataji ichi wẽra pamerã. 25Mamĩda miakꞌãida–e paji, chi warra tꞌoru misa. Tꞌokꞌãri, Josepa tꞌɨ̃ bɨji Jesús.
Currently Selected:
Mateo 1: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.