Juan 13
13
Jesupa chi kꞌõpꞌãyoorã bɨɨrɨ sɨɨda
1Pascua fiesta ewate pai naaweda, Jesupa kꞌawa baji ewari awara bɨda ichi na pꞌekꞌau eujãdeepa uchiaitꞌee mãikꞌaapa ichi Akꞌõremaa wãitꞌee; mãgɨ́ ewari paru. Ichia chi kꞌõpꞌãyoorã na pꞌekꞌau eujãde pꞌanɨ kꞌinia iru bapachi. Mãgá ãchi kꞌinia iru bapachi ichi piurumaa.
2Aɨ kꞌewara Pascuadepema chikꞌo jedei naaweda, Netuara Poro Waibɨapa kꞌĩsia kꞌachia kꞌĩsiapiji Judas, Simón Iscariote warramaa, ichia Jesús traicionaamerã. 3Mamĩda Jesupa kꞌawa baji ichi Tachi Akꞌõredeepa cheda mãikꞌaapa Akꞌõremaa wãitꞌee. Ichiaba kꞌawa baji Tachi Akꞌõrepa ne–inaa jõmaweda bɨji ichi jua ekꞌari. 4Mapa nekꞌomaa pꞌanɨde Jesús bainɨ̃ beeji mãikꞌaapa ichi ɨ̃rɨpema pꞌaru jɨ̃ bada ẽratꞌaapꞌeda, ãyaa bɨji. Maapꞌeda toalla jɨ̃ nɨ̃bɨji ichi kꞌɨrrɨde, mimiapataarãpa oopatakꞌa chĩara bɨɨrɨ sɨɨdaitꞌee pakꞌãri. 5Mãpai jarrade pania wee atapꞌeda, chi kꞌõpꞌãyoorã bɨɨrɨ sɨɨmaa beeji. Maapꞌeda ma toallapa pꞌookꞌooji.
6Mamĩda Simón Pedro bɨɨrɨ sɨɨnaitꞌee pakꞌãri, irua mãgaji:
—Tachi Waibɨa, ¿mɨ bɨɨrɨ paara sɨɨitꞌeekꞌã? aji.
7Jesupa pꞌanauji:
—Ɨ̃rá pɨa kꞌawa–e bɨda aji, mɨa oomaa bɨ. Mamĩda tꞌẽepai kꞌawayada aji.
8Mãpai Pedropa mãgaji:
—¡Mɨ bɨɨrɨ sɨɨpi–eda! aji.
Jesupa pꞌanauji:
—Pɨ bɨɨrɨ sɨɨpi kꞌinia–e bɨ pɨrã, mãgara waa nipanaapáde aji, mɨ ome.
9Mãpai Simón Pedropa mãgaji:
—¡Tachi Waibɨa, mãgara mɨ bɨɨrɨ aupai sɨɨnaapáde aji. Ichiaba mɨ jua mãikꞌaapa poro paara sɨɨpáde! aji.
10Mamĩda Jesupa pꞌanauji:
—Eperã ewaa kꞌuipꞌeda mãikꞌaapa taawaa uchiapꞌeda, waya kꞌui–eda aji. Chi bɨɨrɨ aupaita sɨɨpari, kꞌapꞌɨa jõma tꞌãu–ee bairã. Mãga pɨkꞌa parã tꞌãu–ee pɨkꞌa pꞌanɨ pꞌekꞌau kꞌachiapa. Mamĩda parã jõmaweda mãga pꞌanɨ–eda aji.
11Jesupa mãga jaraji kꞌawa bada perã kꞌaipa ichi traicionaaitꞌee bɨ.
12Chi kꞌõpꞌãyoorã bɨɨrɨ sɨɨpꞌeda, waya ichi ɨ̃rɨpema pꞌaru jɨ̃ beeji. Maapꞌeda mesade su–akꞌɨ beeji mãikꞌaapa mãgaji:
—¿Parãpa kꞌawa pꞌanɨkꞌã aji, kꞌãata jara kꞌinia bɨ mɨa etꞌewa ooda? 13Parãpa mɨmaa “Jarateepari” mãikꞌaapa “Tachi Waibɨa” apata. Mãga jaradakꞌãri, wãarata jara pꞌanɨ. 14Mɨ parã Waibɨa mãikꞌaapa parã Jarateepari bɨ mĩda, parã bɨɨrɨ sɨɨji. Mapa parãpa pida pãchi kꞌõpꞌãyoorã bɨɨrɨ sɨɨdaipia bɨ. 15Mɨa mãga ooji parãpa aukꞌa oodamerã. 16Mɨa wãarata jararu. Mimiapari ichi poro waibɨa kꞌãyaara waibɨara bɨ–e. Ichiaba chokꞌa pëida iru pëida kꞌãyaara waibɨara bɨ–eda aji. 17Parãpa mɨa etꞌewa jarada ũrijida. Ma jaradakꞌa ooruta pɨrã, tꞌãri o–ĩa pꞌanadaitꞌee.
18ʼMamĩda mãga–e paitꞌee parã jõmaarã ome. Mɨa kꞌawa bɨ mɨ kꞌõpꞌãyoorã jɨrɨtꞌerada. Mapa ichiaba kꞌawa bɨ wãara pꞌasaitꞌee Tachi Akꞌõre Ũraa pꞌãdade jara bɨkꞌa:
‘Mɨ ome nekꞌorupa mɨ peepitꞌaaitꞌee.’ (Salmos 41.9)
19Ɨ̃rá mɨa mãga jara bɨ mãga pꞌasakꞌãri, parãpa wãara ijãadamerã Mɨta, Tachi Akꞌõrepa pëida eperãarã kꞌaripamerã. 20Mɨa wãarata jararu. Chi mɨa pëida auteebairupa mɨ jida auteebai bɨ. Mãga pɨkꞌa chi mɨ auteebairupa mɨ Akꞌõre, mɨ pëida, aukꞌa auteebai bɨ.
Jesupa jarada kꞌaipa ichi traicionaaitꞌee
(Mateo 26.20-25; Marcos 14.17-21; Lucas 22.21-23)
21Mãga jarapꞌeda, Jesús tꞌãri pꞌua nɨ̃beeji. Mãpai mãgaji:
—Mɨa wãarata jararu. Parãdepema abaapa mɨ traicionaaitꞌeeda aji.
22Jesupa mãga jarakꞌãri, chi kꞌõpꞌãyoorã akꞌɨ trua para beeji, kꞌawada–e pꞌanadapꞌedaa perã kꞌaita jara bɨ. 23Mãɨrãdepema aba, Jesupa audú kꞌinia iru bada, iru ikꞌaawa sĩu–akꞌɨ baji. 24Mapa Simón Pedropa taupa jarapachi mãgɨmaa iidimerã kꞌaipata Jesús traicionaaitꞌee.
25Mãpai mãgɨ́ kꞌõpꞌãyopa kꞌɨɨrɨ ikꞌaawa iidiji Jesumaa:
—Tachi Waibɨa, ¿kꞌaima? aji.
26Jesupa pꞌanauji:
—Nãgɨ́ pan pite sã atakꞌãri, mɨa teeitꞌeeda aji, mãgɨmaa.
Aramata Jesupa ma pan pite sã ataji mãikꞌaapa teeji Judamaa. Mãgɨ́ Judas Simón Iscariote warra paji. 27Judapa mãgɨ́ pan jitakꞌãri, Satanás iru tꞌãride tꞌĩudachi. Mãpai Jesupa mãgaji:
—Pɨchia ooitꞌee bɨ isapai oopáde aji.
28Mamĩda Jesús ome nekꞌomaa pꞌanadapꞌedaarãpa kꞌawada–e paji sãapꞌeda mãga jaraji. 29Judapa ãchi pꞌaratꞌa anipapachi perã, ũkꞌuruurãpa kꞌĩsiajida Jesupa jara baji ne–inaa netonamerã fiesta–itꞌee, maa–e pɨrã chupɨria beerãmaa ne–inaa teenamerã.
30Judapa ma pan jitapꞌeda, uchiadachi taawaa. Pꞌãrikꞌua paji.
Ũraa chiwidi eperãarã–itꞌee
31Judas taawaa uchiada tꞌẽepai, Jesupa mãgaji:
—Ɨ̃rá Tachi Akꞌõrepa ichi kꞌĩra wãree unupiitꞌee, mɨ chi Eperã Akꞌõre Truadepema kꞌapꞌɨa pari. Mɨ kꞌaurepa jõmaarãpa wãara kꞌawaadaitꞌee Tachi Akꞌõre jõmaarã kꞌãyaara waibɨara bɨ. 32Mɨa mãga akꞌɨpikꞌãri, taarã–e nɨde Tachi Akꞌõrepa ichiaba akꞌɨpiitꞌee mɨ wãara irua pëida.
33ʼWarrarã, naapai mɨ taarã–e parã ome. Parãpa mɨ jɨrɨdayada aji. Mamĩda unuda–e paitꞌee. Mɨa judiorã poro waibɨarãmaa jaradakꞌa parãmaa aukꞌa jaraitꞌee; pꞌoyaa wãda–e mɨ wãrumaa. 34Parãmaa ũraa chiwidi jararu. Chikꞌinia pꞌanapatáatɨ. Mɨa parã kꞌinia iru baparikꞌa, mãgá parã jida chikꞌinia pꞌanapatáatɨ. 35Mãgá chikꞌinia pꞌanaruta pɨrã, jõmaarãpa kꞌawadayada aji, parã mɨ kꞌõpꞌãyoorã.
Jesupa jarada Pedropa ichi kꞌawa–e bɨda aitꞌee
(Mateo 26.31-35; Marcos 14.27-31; Lucas 22.31-34)
36Mãpai Simón Pedropa Jesumaa iidiji:
—Tachi Waibɨa, ¿sãmaa wãitꞌeema? aji.
Jesupa pꞌanauji:
—Mɨ wãrumaa waide pɨ pꞌoyaa wã–eda aji. Mamĩda tꞌẽepai wãitꞌeeda aji.
37Pedropa mãgaji:
—Tachi Waibɨa, ¿sãapꞌeda mɨ pɨ tꞌẽe wã–e payama? aji. ¡Pɨ ome wã kꞌinia bɨ, pɨ kꞌaurepa piuru pɨjida!
38Mãpai Jesupa pꞌanauji:
—¿Wãara pɨchi kꞌapꞌɨa peepitꞌaaikꞌã aji, mɨ kꞌaurepa? Mɨa wãarata jararu. Etꞌerre kꞌarii naaweda, jarada õpee pɨa mɨ kꞌawa–e bɨda aitꞌee.
Currently Selected:
Juan 13: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.