Hechos 4

Pedro Juan ome judiorã poroorã kꞌĩrapite

1Atꞌãri Pedro Juan ome pedeemaa pꞌanɨ misa, judiorã pꞌaareerã pachejida Akꞌõre te waibɨa jɨ̃apataarã poro ome. Ichiaba ãchi ome chejida saduceorã.#4.1 Saduceorãpa ijãadakꞌaa paji eperã piupꞌeda waya chokꞌai pꞌirabai. 2Kꞌĩrau pꞌanajida Pedropa mãikꞌaapa Juanpa jaratee pꞌanadapꞌedaa perã eperãarã piudapꞌeda chokꞌai pꞌirabaidai, Jesús pꞌirabaidakꞌa. 3Mapa jita atadachida. Kꞌewara bada perã, carcelde tꞌɨtꞌaanajida, aɨ norema ma nepɨra akꞌɨdaitꞌee. 4Mãga oojida mĩda, eperãarã chokꞌaraarãpa Cristode ijãajida, ãrapa jarateedapꞌedaa kꞌaurepa. Ijãapataarã jõmaweda ɨmɨkꞌĩraarã aupai cinco mil paji.

5Aɨ norema Jerusalende abaamaa see nɨ̃baji judiorã poro waibɨarã, ãchi chonaarã mãikꞌaapa Moisepa pꞌãda jarateepataarã. 6Mama baji ichiaba Anás, judiorã pꞌaareerã poro waibɨa pada. Ichiaba baji pꞌaareerã poro waibɨa Caifás, Juan, Alejandro mãikꞌaapa Anás ëreerã awaraarã. 7Pedro Juan ome atapijida mãikꞌaapa ãchi kꞌĩrapite bainɨ̃ beepidapꞌeda, iidijida:

—¿Kꞌai juapa parãpa jãgee netꞌaa oo pꞌanɨma? maa–e pɨrã ¿kꞌaipa jãgá oopi bɨma? ajida.

8Akꞌõre Jaure Pedro ome bada perã, pia pꞌanauji:

—Judiorã poro waibɨarã mãikꞌaapa chonaarã, 9parãpa taimaa iidiruta, sãga nãgɨ́ kꞌayaa bada kꞌaripajida mãikꞌaapa sãga jɨpa beeji. ¿Mãga–ekꞌã? aji. 10Pia bɨ. Taipa parã kꞌĩrapite jaradaitꞌee, jõmaweda Israel pidaarãpa kꞌawaadamerã. Nãgɨ́ eperã parã jõmaarã kꞌĩrapite bainɨ̃ bɨ, jɨpa beeji Jesucristo Nazaretdepema juapa, parãpa kurusode peepidapꞌedaa mãikꞌaapa Tachi Akꞌõrepa chokꞌai pꞌirabai atada. 11Tachi Akꞌõre Ũraa pꞌãdade jara bɨ:

‘Te oopataarãpa mãu kꞌiniada–e padapꞌedaa pipɨara padachi.’ (Salmos 118.22)

12Mapa Jesucristodepai ijãa pꞌanɨ pɨrã, ɨtꞌaa wãdaitꞌee, maarepida awaraa eperã wẽ–e perã irukꞌa na pꞌekꞌau eujãde, tachi o kꞌachiadeepa kꞌaripa ataitꞌee.

13Judiorã poroorã arii pꞌanadapꞌedaarãpa unudakꞌãri Pedro mãikꞌaapa Juan jĩpꞌa pedeemaa pꞌanɨ waaweeda–ee, mãikꞌaapa kꞌawaadakꞌãri ãchi eperã jĩpꞌaarã, makꞌɨara kꞌartꞌa tau kꞌawada–ee, akꞌɨtrua para beeji. Kꞌawaajida Jesús ome nipapatapꞌedaa perã, mãga pedeejida. 14Ma awara chiwa bada ãchia jɨpadapꞌedaa arii baji. Mapa judiorã poroorãpa pꞌoyaa pꞌanaudakꞌaa paji. 15Mãpai ãchia Juan, Pedro, ma chiwa bada ome taawaa uchiapijida. Maapꞌeda pedee para beeji ãchi pitapai:

16—¿Kꞌãata oodaitꞌeema ajida, jã eperãarã ome? Jõmaweda Jerusalendepemaarãpa kꞌawa pꞌanɨ ãrapa ne–inaa pia oodapꞌedaa, eperãarãpa pꞌoyaa oodakꞌaa ãchi juadoopa. Tachia pꞌoyaa merada–e. 17Mamĩda ɨ̃rá jaradáma ajida, ma eperãarãmaa jarateenaadamerã Jesupa ne–inaa oopata, mãga–e pɨrã miapidai.

18Mãpai waya tꞌɨ̃ pꞌe atajida mãikꞌaapa jarajida waa jarateenaadamerã Jesupa ne–inaa oopata. 19Mamĩda Pedropa Juan ome pꞌanaujida:

—Pia kꞌĩsíatɨ parãpa. ¿Kꞌãare piata bayama ajida, Akꞌõrepa jara bɨ ooda–e paitꞌee, parã pedee ũri kꞌiniapa? 20Taipa unudapꞌedaa mãikꞌaapa ũridapꞌedaa pꞌoyaa nepɨrɨ amaada–eda ajida.

21Judiorã poroorã arii pꞌanadapꞌedaarãpa ãchi juade iru pꞌanajida mĩda miapidaitꞌee, arajãgaa pëijida eperãarã waidoopa. Jõmaweda eperãarã o–ĩa ɨtꞌaa tꞌɨ̃maa pꞌanapachida Tachi Akꞌõremaa, 22Jesús Jaurepa ma eperã jɨpatꞌaada perã, cuarenta años audú iru bɨta.

Ijãapataarãpa Tachi Akꞌõremaa kꞌaripa iididapꞌedaa

23Kꞌena pëidapꞌeda, Pedro Juan ome chejida ãchi kꞌõpꞌãyoorã pꞌanadapꞌedaamaa. Nepɨrɨjida judiorã pꞌaareerã poroorãpa mãikꞌaapa awaraa judiorã poro waibɨarãpa ãchimaa jaradapꞌedaa. 24Mãgɨ́ pedee ũridapꞌeda, jõmaweda aukꞌa ɨtꞌaa tꞌɨ̃jida:

—Tachi Waibɨa, pɨa pajã, na eujã, pꞌusa mãikꞌaapa ne–inaa jõmaweda aɨde nɨ̃bɨ ooji. 25Pɨ Jaurepa tachi chonaa Davidmaa nãga pedeepiji irua pɨde ijãa bada perã:

‘¿Kꞌãare–itꞌee awaraa eujãdepemaarã kꞌĩrau pꞌanapatama? Mɨchi eperãarã paara pariatua kꞌĩsiapata. 26Na pꞌekꞌau eujãdepema reyrã mãikꞌaapa poro waibɨarã audua pꞌanadairã, pedeeteepata kꞌachia oodaitꞌee. Pedee kꞌachia jarapata Tachi Akꞌõre ãpɨte mãikꞌaapa ichia rey pëida ãpɨte.’ (Salmos 2.1-2)

27ʼTachi Waibɨa, pɨa jaradakꞌa David itꞌaideepa, mãga uchiaji. Rey Herodes, Poncio Pilato mãikꞌaapa awaraarã judio–eerã na pꞌuurude pedeeteejida Israel pidaarã ome kꞌachia oodaitꞌee Jesús, pɨa pëida oo chemerã pɨa oopi kꞌinia bɨ. 28Mãga oojida pɨa naaweda kꞌĩsia iru badakꞌa. 29Ɨ̃rá Tachi Waibɨa, akꞌɨ́ji pɨ ãpɨte kꞌachia pedee pꞌanɨɨrã mãikꞌaapa taimaa waapɨara pɨ ũraa waawee–ee jarateepíji, taipa oo kꞌinia pꞌanadairã pɨa oopi bɨkꞌa. 30Ichiaba tai kꞌaripáji kꞌayaa beerã jɨpapataadamerã mãikꞌaapa ne–inaa eperãarãpa pꞌoyaa oodakꞌaa ãchi juadoopa oopataadamerã Jesús tꞌɨ̃de. Iruata pɨchia oopi bɨkꞌa ichita oopari.

31Ɨtꞌaa tꞌɨ̃ aupadakꞌãri, ãchi pꞌanadapꞌedaamãi wɨrrɨwɨrrɨa nɨ̃beeji. Mãpai jõmaweda Akꞌõre Jaurepa oopi bɨkꞌa oo kꞌinia pꞌaneejida mãikꞌaapa Tachi Akꞌõrepa ooda Jesús piuda kꞌaurepa waawee–ee jarateepachida.

Ijãapataarãpa ãchi netꞌaa jedepatapꞌedaa

32Maapai ijãapataarã jõmaweda aukꞌa kꞌĩsiapachida mãikꞌaapa chikꞌaripa pꞌanapachida. Apidaapa ãchi netꞌaa iru pꞌanɨ ãchi–itꞌee aupaida adakꞌaa paji. Jĩpꞌa jõmaarã–itꞌee paji. 33Mapa Akꞌõrepa ãchi pia oopachi. Kꞌaripaji Cristopa jɨrɨtꞌeradaarãpa jarateedamerã Jesús chokꞌai pꞌirabaida mãikꞌaapa oodamerã ne–inaa eperãarãpa pꞌoyaa oodakꞌaa ãchi juadoopa. 34Ãchi chupɨria pꞌanadakꞌaa paji. Chi eujã iru beerãpa mãikꞌaapa ne–inaa awaraa iru beerãpa netotꞌaapachida. 35Mãpai ma pꞌaratꞌa Cristopa jɨrɨtꞌeradaarãmaa teepachida, jedenadamerã wẽe beerãmaa. 36Mãga ooji Leví ëreerãdepema Josepa. Mãgɨ́ eperã Chipre isladepema paji. Mãgɨmaa Cristopa jɨrɨtꞌeradaarãpa pedida tꞌɨ̃ bɨjida Bernabé (jara kꞌinia bɨ “Tꞌãri O–ĩapipari”). 37Mãgɨ́ eperãpa eujã iru bada netotꞌaaji mãikꞌaapa ma pꞌaratꞌa Cristopa jɨrɨtꞌeradaarãmaa teeji.

Currently Selected:

Hechos 4: sjaB

Highlight

Copy