Hechos 19
19
Pablo Éfeso pꞌuurude
1Apolo Corinto pꞌuurude bɨ misa, Pablo wãyaaji Galacia mãikꞌaapa Frigia eujãde Éfeso pꞌuurude parumaa. Mama Cristode ijãapataarã ununaji. 2Mãpai Pablopa iidiji:
—Parãpa Cristode ijãadakꞌãri, ¿Tachi Akꞌõre Jaure parã kꞌapꞌɨade ba chejikꞌã? aji.
Pꞌanaujida:
—Taipa kꞌawada–eda ajida, Tachi Akꞌõre Jaure ba chepari ijãapataarã kꞌapꞌɨade.
3Mãpai Pablopa iidiji:
—Parãpa poro choopidakꞌãri, ¿kꞌãare–itꞌee poro choopijidama? aji.
Pꞌanaujida:
—Juanpa jaradakꞌa poro choopijida akꞌɨpidaitꞌee pꞌekꞌau kꞌachia oo amaa kꞌinia pꞌanɨ.
4Mãpai Pablopa mãgaji:
—Juanpa wãara poro choojida aji, waa pꞌekꞌau kꞌachia oo kꞌiniada–e pꞌanadapꞌedaarã. Mamĩda Juanpa ichiaba jarapachi ijãadamerã ichi tꞌẽe cheru eperãde. Mãgɨ́ eperã Jesucristo.
5Ma eperãarãpa mãga ũridakꞌãri, aramata ãchi poro choopijida Tachi Waibɨa Jesús tꞌɨ̃de akꞌɨpidaitꞌee irude ijãa pꞌanɨ. 6Maapꞌeda Pablopa jua bɨji ma poro choodapꞌedaarã ɨ̃rɨ. Mãgá bɨkꞌãri, Tachi Akꞌõrepa ichi Jaure ãra kꞌapꞌɨade ba chepiji. Mãgɨpa ãramaa pedeepipachi kꞌawada–e pꞌanɨ pedeede. Mãgá jarajida Tachi Akꞌõrepa jarapidakꞌa. 7Chi mãgá poro choodapꞌedaa eperãarã doce paji.
8Maapꞌeda Pablo wãji Tachi Akꞌõre Ũraa jarateepata tedee. Mama ɨ̃ipata ewari chaa atane õpee Tachi Akꞌõre Ũraa waawee–ee jarateeji. Jaraji Tachi Akꞌõrepa pia ooda Jesucristo pëikꞌãri, judiorãpa irude ijãadamerã. 9Mamĩda ũkꞌuruurãpa ijãa kꞌiniada–e paji Pablopa jaratee bada mãikꞌaapa waapɨara pedee kꞌachia jarajida Tachi Akꞌõre Ode Pꞌanɨɨrã ãpɨte. Maperã Pablo mamãikꞌaapa ãyaa wãji ijãapataarã ome. Jaratee banaji eperã tꞌɨ̃jarapatapꞌedaa Tirano escuelade. Mama ewari chaa jarateepachi. 10Irua Tachi Akꞌõre Ũraa jarateeji año omé. Mãgá judiorã mãikꞌaapa judio–eerã Ásia eujãde pꞌanapatapꞌedaarãpa ũrijida Tachi Akꞌõrepa jara pëida Jesude. 11Ichiaba Tachi Akꞌõrepa Pablomaa oopipachi ne–inaa eperãarãpa pꞌoyaa oodakꞌaa ãchi juadoopa. 12Pablo kꞌapꞌɨade pꞌaru tꞌõbaidapapai, kꞌayaa beerã jɨpapachida. Ichiaba netuara eperãarã kꞌapꞌɨade merãtɨa bee uchiapachida.
Netuarapa Esceva warrarãmaa ooda
13-14Mãpema judiorã ũkꞌuru Cristode ijãada–e pꞌanadapꞌedaarãpa netuara merãtɨa bee eperãarã kꞌapꞌɨadeepa uchiapikꞌoopachida. Mãga oo nipajida judiorã pꞌaareerã poro Esceva warrarã. Ãra siete paji. Mãɨrãpa kꞌawaadakꞌãri netuaraarã uchia pꞌanɨ Pablo kꞌaurepa ichia Tachi Waibɨa Jesús tꞌɨ̃ jarakꞌãri, aukꞌa oo kꞌinia pꞌaneejida. Mapa jarajida netuara merãtɨa bɨmaa:
—¡Pablopa jara bɨ Jesús tꞌɨ̃de uchíatɨ!
15Mamĩda mãga oodakꞌãri, ma netuara eperã kꞌapꞌɨade merãtɨa badapa mãgaji:
—Mɨa kꞌawa bɨda aji, Jesús. Ichiaba kꞌawa bɨ kꞌaita Pablo. Mamĩda parã ¿kꞌairã́ma? aji.
16Mãpai ma netuara kꞌapꞌɨade merãtɨa bada eperãpa ãchi ɨ̃rɨ cheji mãikꞌaapa ãchi jõmaweda sĩkꞌooji. Mãgá pꞌu oopꞌeda, chi netuara uchiapi chedapꞌedaarã mamãikꞌaapa ãkꞌadaa pꞌira uchiakꞌoodachida. 17Éfeso pꞌuurude pꞌanapataarã, judiorã mãikꞌaapa judio–eerãpa mãga ũridakꞌãri, jõmaarãta pꞌerajida mãikꞌaapa Tachi Waibɨa Jesús tꞌɨ̃ pia tꞌo pꞌanajida.
18Mãpemaarã ũkꞌuru Cristode ijãa pꞌaneejida. Maapꞌeda Pablomaa jara chepachida ãchia kꞌachia oopatapꞌedaa, aɨ naaweda ijãa pꞌanadapꞌedaa perã petau tau kꞌawaa beerãpa oo pꞌanadapꞌedaade. 19Ichiaba ũkꞌuru petau tau kꞌawaa beerãpa aneepachida ãchi libro jõmaarã taide paakꞌoodaitꞌee. Mãgɨ́ libro valor pꞌaratꞌade juasiadakꞌãri, uchiaji pꞌaratꞌa tau cincuenta mil. 20Ma jõma oo pꞌanadapꞌedaa kꞌaurepa ma eujãdepemaarãpa waapɨara ijãapachida Tachi Akꞌõrepa jarapidade.
21Ma tꞌẽepai, Tachi Akꞌõre Jaurepa Pablomaa kꞌĩsiapiji wãitꞌee Jerusalendee, wãyaapꞌeda Macedonia eujãde mãikꞌaapa Acaya eujãde. Ichiaba Jerusalendeepa Pablo wã kꞌinia baji Romadee. 22Mãga kꞌĩsiapꞌeda, Pablopa chi kꞌõpꞌãyoorã Timoteo Erasto ome naa pëiji Macedonia eujãdee. Jõdee ichi Ásia eujãde jarateemaa beeji. Maapꞌeda wãji ãra tꞌẽe.
Éfeso pꞌuurudepemaarã kꞌĩraudaidapꞌedaa
23Maapai Tachi Akꞌõre Ode Pꞌanɨɨrã kꞌaurepa, Éfeso pꞌuurudepemaarã jõma kꞌĩraupikꞌa para baji 24ne–inaa pꞌaratꞌadee oopari Demetrio apatapꞌedaapa ãra ãpɨte pedee kꞌachia jarada perã. Mãgɨ́ eperãpa ne–inaa ma–ãri santokꞌa pꞌaratꞌadee oopachi, ãchi ɨtꞌaa tꞌɨ̃pata nawe Artemisa te waibɨa kꞌirãpapataadamerã. Mãga oo bɨpa ichia mãikꞌaapa apemaarã ne–inaa oo kꞌawaa beerãpa pꞌaratꞌa waibɨa jitapachida. 25Maperãpɨ Demetriopa mãgɨɨrã mãikꞌaapa awaraa ne–inaa oo kꞌawaa beerã tꞌɨ̃ pꞌe atapꞌeda, mãgaji:
—Kꞌõpꞌãyoorã, parãpa kꞌawa pꞌanɨda aji, nãgɨ́ mimia oo pꞌanɨpa tachi pꞌaratꞌa jitapata. 26Ma awara parãpa unu pꞌanɨ mãikꞌaapa ũri pꞌanɨ Pablopa jaratee bɨ, ne–inaa ooda eperãarãpa aɨ kꞌĩrapite ɨtꞌaa tꞌɨ̃pata akꞌõre waibɨarã–e. Mãga jara bɨpa eperãarã chokꞌara ichi eere ũraa pꞌe iru bɨ. Mãga jara–e bɨ nama Éfeso pꞌuurudepai. Ichiaba mãga jara bɨ jõma Ásia eujãde. 27Iru pedee ijãaruta pɨrã, tachia ooda neto amaadai mãikꞌaapa tachia pꞌaratꞌa waa jitada–e pai. Ma awara tachi nawe Artemisade ijãada–e pai mãikꞌaapa ichiaba waa iru ĩgreste akꞌɨda–e pai. Mãgɨ́ tede na Ásia eujãdepemaarã mãikꞌaapa jõmaweda Roma jua ekꞌari pꞌanɨɨrã irumaa ɨtꞌaa tꞌɨ̃pata. ¿Wãara–ekꞌã aji, mɨa jara bɨ?
28Arii pꞌanadapꞌedaarãpa mãga ũridakꞌãri, kꞌĩraudachida mãikꞌaapa biukꞌa nɨ̃beeji:
—¡Artemisa Waibɨa; tachi Éfeso pidaarã nawe!
29Mãpai eperãarã waapɨara cheepuru nɨ̃beeji mãikꞌaapa pꞌuuru pidaarã jõma kꞌĩraupikꞌa para beeji. Mãpai Gayo, Aristarco ome jita atajida mãikꞌaapa atadachida ãchi chipꞌedaipatamaa. Ma eperãarã omé Macedonia eujãdepemaarã paji. Ichiaba Pablo ome nipapachida. 30Pablo wãitꞌee paji ma pꞌuuru pidaarã kꞌĩrapite pedeede. Mamĩda ijãapataarãpa wãpida–e paji. 31Ichiaba Asiadepema poroorã ũkꞌuru Pablo ome kꞌõpꞌãyo meraadapꞌedaa perã, jara pëijida wãnaamerã ma eperãarã kꞌĩraupikꞌa para bɨmaa. 32Mãɨmisa, chi cheepurudapꞌedaarã waapɨara kꞌĩraupikꞌa para beeji. Ũkꞌuruurãpa ne–inaa jarapachida; awaraarãpa biapachida. Mapa biukꞌa nɨ̃baji. Ũkꞌuruurãpa kꞌawada–e pꞌanajida sãapꞌeda cheepurudapꞌedaa. 33Judiorã arii pꞌanadapꞌedaarãpa Alejandromaa nepɨrɨdapꞌeda, jõmaarã taide ateejida. Mãpai Alejandropa juapa jaraji kꞌĩupꞌee pꞌaneedamerã, ãchi kꞌapꞌɨa pedeeitꞌee perã. 34Mamĩda eperãarã kꞌĩraupikꞌa para badaarãpa ichi judío kꞌawaadakꞌãri, perá hora omé waapɨara biukꞌa nɨ̃beeji. Mãgapachida:
—¡Artemisa Waibɨa; tachi Éfeso pidaarã nawe!
35Mãpai aɨ pꞌuurudepema secretariopa eperãarã kꞌĩupꞌee pꞌanapiji mãikꞌaapa mãgaji:
—Éfeso pidaarã, jõmaarãpa kꞌawa pꞌanɨda aji, na pꞌuuru pidaarã́pata tachi nawe Artemisa jĩakꞌa ɨtꞌariipa baaida ichi ĩgrestede jɨ̃apata. 36Apidaapa nãgɨ́ pꞌoyaa merada–e perã, kꞌĩra jĩpꞌa pꞌanéetɨ, ne–inaa kꞌachia pariatua ooda–ee. 37Na eperãarã parãpa anee pꞌanɨ tachi ĩgrestedepema netꞌaa maarepida chɨada–e pꞌanɨ mãikꞌaapa tachi nawe ãpɨte pedee kꞌachia jarada–e pꞌanɨ. 38Demetrio wa chi kꞌõpꞌãyoorã nepɨra iru pꞌanɨ pɨrã awaraa ome, Romadepema charraarãmaa wã́tɨ. Ãrapa akꞌɨdaipɨ, ma–itꞌee pꞌanadairã. 39Mamĩda jõmaarãpa awaraa nepɨra iru pꞌanɨ pɨrã, kꞌĩra jĩpꞌa cheepurudakꞌãri, ma nepɨra jõ pëidai. 40Idipema oodapꞌedaa kꞌaurepa Romadepemaarãpa kꞌĩsiadaitꞌee tachi chõoyaa pꞌanɨ. Nãga bɨde ãchia iidi pꞌanɨ pɨrã sãapꞌeda idi nãga oojida, ¿sãga pꞌanaudayama? aji.
41Mãga jarapꞌeda, eperãarã jõmaweda ãchi te chaa pëikꞌooji.
Currently Selected:
Hechos 19: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
Hechos 19
19
Pablo Éfeso pꞌuurude
1Apolo Corinto pꞌuurude bɨ misa, Pablo wãyaaji Galacia mãikꞌaapa Frigia eujãde Éfeso pꞌuurude parumaa. Mama Cristode ijãapataarã ununaji. 2Mãpai Pablopa iidiji:
—Parãpa Cristode ijãadakꞌãri, ¿Tachi Akꞌõre Jaure parã kꞌapꞌɨade ba chejikꞌã? aji.
Pꞌanaujida:
—Taipa kꞌawada–eda ajida, Tachi Akꞌõre Jaure ba chepari ijãapataarã kꞌapꞌɨade.
3Mãpai Pablopa iidiji:
—Parãpa poro choopidakꞌãri, ¿kꞌãare–itꞌee poro choopijidama? aji.
Pꞌanaujida:
—Juanpa jaradakꞌa poro choopijida akꞌɨpidaitꞌee pꞌekꞌau kꞌachia oo amaa kꞌinia pꞌanɨ.
4Mãpai Pablopa mãgaji:
—Juanpa wãara poro choojida aji, waa pꞌekꞌau kꞌachia oo kꞌiniada–e pꞌanadapꞌedaarã. Mamĩda Juanpa ichiaba jarapachi ijãadamerã ichi tꞌẽe cheru eperãde. Mãgɨ́ eperã Jesucristo.
5Ma eperãarãpa mãga ũridakꞌãri, aramata ãchi poro choopijida Tachi Waibɨa Jesús tꞌɨ̃de akꞌɨpidaitꞌee irude ijãa pꞌanɨ. 6Maapꞌeda Pablopa jua bɨji ma poro choodapꞌedaarã ɨ̃rɨ. Mãgá bɨkꞌãri, Tachi Akꞌõrepa ichi Jaure ãra kꞌapꞌɨade ba chepiji. Mãgɨpa ãramaa pedeepipachi kꞌawada–e pꞌanɨ pedeede. Mãgá jarajida Tachi Akꞌõrepa jarapidakꞌa. 7Chi mãgá poro choodapꞌedaa eperãarã doce paji.
8Maapꞌeda Pablo wãji Tachi Akꞌõre Ũraa jarateepata tedee. Mama ɨ̃ipata ewari chaa atane õpee Tachi Akꞌõre Ũraa waawee–ee jarateeji. Jaraji Tachi Akꞌõrepa pia ooda Jesucristo pëikꞌãri, judiorãpa irude ijãadamerã. 9Mamĩda ũkꞌuruurãpa ijãa kꞌiniada–e paji Pablopa jaratee bada mãikꞌaapa waapɨara pedee kꞌachia jarajida Tachi Akꞌõre Ode Pꞌanɨɨrã ãpɨte. Maperã Pablo mamãikꞌaapa ãyaa wãji ijãapataarã ome. Jaratee banaji eperã tꞌɨ̃jarapatapꞌedaa Tirano escuelade. Mama ewari chaa jarateepachi. 10Irua Tachi Akꞌõre Ũraa jarateeji año omé. Mãgá judiorã mãikꞌaapa judio–eerã Ásia eujãde pꞌanapatapꞌedaarãpa ũrijida Tachi Akꞌõrepa jara pëida Jesude. 11Ichiaba Tachi Akꞌõrepa Pablomaa oopipachi ne–inaa eperãarãpa pꞌoyaa oodakꞌaa ãchi juadoopa. 12Pablo kꞌapꞌɨade pꞌaru tꞌõbaidapapai, kꞌayaa beerã jɨpapachida. Ichiaba netuara eperãarã kꞌapꞌɨade merãtɨa bee uchiapachida.
Netuarapa Esceva warrarãmaa ooda
13-14Mãpema judiorã ũkꞌuru Cristode ijãada–e pꞌanadapꞌedaarãpa netuara merãtɨa bee eperãarã kꞌapꞌɨadeepa uchiapikꞌoopachida. Mãga oo nipajida judiorã pꞌaareerã poro Esceva warrarã. Ãra siete paji. Mãɨrãpa kꞌawaadakꞌãri netuaraarã uchia pꞌanɨ Pablo kꞌaurepa ichia Tachi Waibɨa Jesús tꞌɨ̃ jarakꞌãri, aukꞌa oo kꞌinia pꞌaneejida. Mapa jarajida netuara merãtɨa bɨmaa:
—¡Pablopa jara bɨ Jesús tꞌɨ̃de uchíatɨ!
15Mamĩda mãga oodakꞌãri, ma netuara eperã kꞌapꞌɨade merãtɨa badapa mãgaji:
—Mɨa kꞌawa bɨda aji, Jesús. Ichiaba kꞌawa bɨ kꞌaita Pablo. Mamĩda parã ¿kꞌairã́ma? aji.
16Mãpai ma netuara kꞌapꞌɨade merãtɨa bada eperãpa ãchi ɨ̃rɨ cheji mãikꞌaapa ãchi jõmaweda sĩkꞌooji. Mãgá pꞌu oopꞌeda, chi netuara uchiapi chedapꞌedaarã mamãikꞌaapa ãkꞌadaa pꞌira uchiakꞌoodachida. 17Éfeso pꞌuurude pꞌanapataarã, judiorã mãikꞌaapa judio–eerãpa mãga ũridakꞌãri, jõmaarãta pꞌerajida mãikꞌaapa Tachi Waibɨa Jesús tꞌɨ̃ pia tꞌo pꞌanajida.
18Mãpemaarã ũkꞌuru Cristode ijãa pꞌaneejida. Maapꞌeda Pablomaa jara chepachida ãchia kꞌachia oopatapꞌedaa, aɨ naaweda ijãa pꞌanadapꞌedaa perã petau tau kꞌawaa beerãpa oo pꞌanadapꞌedaade. 19Ichiaba ũkꞌuru petau tau kꞌawaa beerãpa aneepachida ãchi libro jõmaarã taide paakꞌoodaitꞌee. Mãgɨ́ libro valor pꞌaratꞌade juasiadakꞌãri, uchiaji pꞌaratꞌa tau cincuenta mil. 20Ma jõma oo pꞌanadapꞌedaa kꞌaurepa ma eujãdepemaarãpa waapɨara ijãapachida Tachi Akꞌõrepa jarapidade.
21Ma tꞌẽepai, Tachi Akꞌõre Jaurepa Pablomaa kꞌĩsiapiji wãitꞌee Jerusalendee, wãyaapꞌeda Macedonia eujãde mãikꞌaapa Acaya eujãde. Ichiaba Jerusalendeepa Pablo wã kꞌinia baji Romadee. 22Mãga kꞌĩsiapꞌeda, Pablopa chi kꞌõpꞌãyoorã Timoteo Erasto ome naa pëiji Macedonia eujãdee. Jõdee ichi Ásia eujãde jarateemaa beeji. Maapꞌeda wãji ãra tꞌẽe.
Éfeso pꞌuurudepemaarã kꞌĩraudaidapꞌedaa
23Maapai Tachi Akꞌõre Ode Pꞌanɨɨrã kꞌaurepa, Éfeso pꞌuurudepemaarã jõma kꞌĩraupikꞌa para baji 24ne–inaa pꞌaratꞌadee oopari Demetrio apatapꞌedaapa ãra ãpɨte pedee kꞌachia jarada perã. Mãgɨ́ eperãpa ne–inaa ma–ãri santokꞌa pꞌaratꞌadee oopachi, ãchi ɨtꞌaa tꞌɨ̃pata nawe Artemisa te waibɨa kꞌirãpapataadamerã. Mãga oo bɨpa ichia mãikꞌaapa apemaarã ne–inaa oo kꞌawaa beerãpa pꞌaratꞌa waibɨa jitapachida. 25Maperãpɨ Demetriopa mãgɨɨrã mãikꞌaapa awaraa ne–inaa oo kꞌawaa beerã tꞌɨ̃ pꞌe atapꞌeda, mãgaji:
—Kꞌõpꞌãyoorã, parãpa kꞌawa pꞌanɨda aji, nãgɨ́ mimia oo pꞌanɨpa tachi pꞌaratꞌa jitapata. 26Ma awara parãpa unu pꞌanɨ mãikꞌaapa ũri pꞌanɨ Pablopa jaratee bɨ, ne–inaa ooda eperãarãpa aɨ kꞌĩrapite ɨtꞌaa tꞌɨ̃pata akꞌõre waibɨarã–e. Mãga jara bɨpa eperãarã chokꞌara ichi eere ũraa pꞌe iru bɨ. Mãga jara–e bɨ nama Éfeso pꞌuurudepai. Ichiaba mãga jara bɨ jõma Ásia eujãde. 27Iru pedee ijãaruta pɨrã, tachia ooda neto amaadai mãikꞌaapa tachia pꞌaratꞌa waa jitada–e pai. Ma awara tachi nawe Artemisade ijãada–e pai mãikꞌaapa ichiaba waa iru ĩgreste akꞌɨda–e pai. Mãgɨ́ tede na Ásia eujãdepemaarã mãikꞌaapa jõmaweda Roma jua ekꞌari pꞌanɨɨrã irumaa ɨtꞌaa tꞌɨ̃pata. ¿Wãara–ekꞌã aji, mɨa jara bɨ?
28Arii pꞌanadapꞌedaarãpa mãga ũridakꞌãri, kꞌĩraudachida mãikꞌaapa biukꞌa nɨ̃beeji:
—¡Artemisa Waibɨa; tachi Éfeso pidaarã nawe!
29Mãpai eperãarã waapɨara cheepuru nɨ̃beeji mãikꞌaapa pꞌuuru pidaarã jõma kꞌĩraupikꞌa para beeji. Mãpai Gayo, Aristarco ome jita atajida mãikꞌaapa atadachida ãchi chipꞌedaipatamaa. Ma eperãarã omé Macedonia eujãdepemaarã paji. Ichiaba Pablo ome nipapachida. 30Pablo wãitꞌee paji ma pꞌuuru pidaarã kꞌĩrapite pedeede. Mamĩda ijãapataarãpa wãpida–e paji. 31Ichiaba Asiadepema poroorã ũkꞌuru Pablo ome kꞌõpꞌãyo meraadapꞌedaa perã, jara pëijida wãnaamerã ma eperãarã kꞌĩraupikꞌa para bɨmaa. 32Mãɨmisa, chi cheepurudapꞌedaarã waapɨara kꞌĩraupikꞌa para beeji. Ũkꞌuruurãpa ne–inaa jarapachida; awaraarãpa biapachida. Mapa biukꞌa nɨ̃baji. Ũkꞌuruurãpa kꞌawada–e pꞌanajida sãapꞌeda cheepurudapꞌedaa. 33Judiorã arii pꞌanadapꞌedaarãpa Alejandromaa nepɨrɨdapꞌeda, jõmaarã taide ateejida. Mãpai Alejandropa juapa jaraji kꞌĩupꞌee pꞌaneedamerã, ãchi kꞌapꞌɨa pedeeitꞌee perã. 34Mamĩda eperãarã kꞌĩraupikꞌa para badaarãpa ichi judío kꞌawaadakꞌãri, perá hora omé waapɨara biukꞌa nɨ̃beeji. Mãgapachida:
—¡Artemisa Waibɨa; tachi Éfeso pidaarã nawe!
35Mãpai aɨ pꞌuurudepema secretariopa eperãarã kꞌĩupꞌee pꞌanapiji mãikꞌaapa mãgaji:
—Éfeso pidaarã, jõmaarãpa kꞌawa pꞌanɨda aji, na pꞌuuru pidaarã́pata tachi nawe Artemisa jĩakꞌa ɨtꞌariipa baaida ichi ĩgrestede jɨ̃apata. 36Apidaapa nãgɨ́ pꞌoyaa merada–e perã, kꞌĩra jĩpꞌa pꞌanéetɨ, ne–inaa kꞌachia pariatua ooda–ee. 37Na eperãarã parãpa anee pꞌanɨ tachi ĩgrestedepema netꞌaa maarepida chɨada–e pꞌanɨ mãikꞌaapa tachi nawe ãpɨte pedee kꞌachia jarada–e pꞌanɨ. 38Demetrio wa chi kꞌõpꞌãyoorã nepɨra iru pꞌanɨ pɨrã awaraa ome, Romadepema charraarãmaa wã́tɨ. Ãrapa akꞌɨdaipɨ, ma–itꞌee pꞌanadairã. 39Mamĩda jõmaarãpa awaraa nepɨra iru pꞌanɨ pɨrã, kꞌĩra jĩpꞌa cheepurudakꞌãri, ma nepɨra jõ pëidai. 40Idipema oodapꞌedaa kꞌaurepa Romadepemaarãpa kꞌĩsiadaitꞌee tachi chõoyaa pꞌanɨ. Nãga bɨde ãchia iidi pꞌanɨ pɨrã sãapꞌeda idi nãga oojida, ¿sãga pꞌanaudayama? aji.
41Mãga jarapꞌeda, eperãarã jõmaweda ãchi te chaa pëikꞌooji.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.