Mboe 47
47
Anutu ikamam peeze pa koroŋ ta boozomen
Mboe kizin Kora
1Niom iwal ta boozomen, menmeen yom mi kepespeeze nomoyom!
Kalŋoyom isala, mi kombo mboe mi kapakur Anutu!
2Yooba, ni Anutu kor kana kat. Kozo komototo i mi keleŋleŋ la kalŋaana.
Pa ni ta king biibi ŋonoono, mi ikamam peeze pa wal boozomen ta timbotmbot toono na. #Mbo 46:10, 95:3; Mt 5:35
3Ni ikoto zin karkari, mi iur zin ma timbot la niam kopoyam mbarmaana.
Mi ipun zin wal matan munŋan mburan ma imap kat, tabe kumbuyam ise ŋguren.
4Niam wal ta Yakop popoŋana kini na, menmeen yam mi niyam ise pa Yooba.
Pa ni leleene piam, mi iur leyam matamur ndabokŋana kat. #1Pe 1:4
5Anutu izalla be mbuleene se muriini peeze kana.
Tana twiiri itaŋtaŋ, mi tomtom kalŋan izalla mi tiyotyooto raama menmeen zin. #Mbo 68:18
6Kombo mboe mi kapakur Anutu.
Kombo mboe mi kiwit king kiti uruunu ma isala kor!
7Pa Anutu, ni king biibi ŋonoono ta ikamam peeze pa toono ta boozomen.
Tana kombo mboe mi kapakuri! #Mbo 95:3; Kol 3:16
8Anutu imbotmbot se muriini peeze kana ta potomŋana i,
mi imborro karkari ta boozomen. #Tur 4:9
9Tana zin bibip kizin karkari ko timar ma tilup raama yam,
mi niamŋan ambesmbeeze pa Anutu ki Abaraam.
Pa ni mburaana ilip pa zin peeze kan ta boozomen ki toono. Tana timap timbot la ni kopo mbarmaana men.
Tapakur zaana isala ta kor a!
Currently Selected:
Mboe 47: mnaNT
Highlight
Copy
Compare
Share
Want to have your highlights saved across all your devices? Sign up or sign in
© 1996, Wycliffe Bible Translators, Inc. All rights reserved.
