Mboe 28
28
Tomtom ta isuŋ Merere be ipokot mbulu kizin wal sananŋan
Mboe ki Dabit
1O Yooba, nu ta tuŋ ŋonoono. Pa nu pombolmbol yo mi poroukalkaala yo.
Tana iŋgi bobi tio ima ku be uulu yo.
Ŋgun talŋom pa suŋŋana tio ti.
Kokena tit kalŋoŋ,
to aŋgaaba zin wal ta tisula len Andewa na, mi aŋla leŋ.
2Iŋgi aŋsara nomoŋ ima urum ku leleene ta potomŋana kat na,
mi aŋtaŋroro u be uulu yo.
Leŋ tiŋiizi tio ti mi muŋai yo. Pa nio mbesooŋo ku tau. #Mbo 63:4, 134:2
3Zin wal sananŋan ta tiute u som
mi tinok sanaana kamŋana na,
ziiri yo raama zin pepe. Kokena niamŋan amla leyam.
Wal tana kwon na, izzo sua pizin tomtom kembei lelen be ziŋan tiparlup zin ma tiwe tamen.
Tamen lelen na, iurur be tipasaana zin.
4Pokot mbulu sananŋana ta tikamam na.
Pa naman imbel sanaana kamŋana kek.
Tana ur kadoono pizin mi pokot mbulu kizin. #Mt 16:27; Tur 20:12*, 22:12
5Pa uraata bibip ki Yooba mi nama muriini na,
tikam ŋgar pa risa som.
Tana ni ko ipambiriizi zin ma timap kat.
Ko irao timaŋga mini na som.
6Nio aŋpakur Yooba zaana!
Pa nio aŋtaŋroro i be imuŋai yo, mi ni ileŋ tiŋiizi tio kek.
7Nio aŋkamam mburoŋ se ki Yooba tau. Mi ni iwe siŋgiao pio.
Nio aŋpase pini, mi ni iuluulu yo.
Tana leleŋ ambai kat, mi aŋbo mboe.
Ko aŋpakurkur zaana ma isala kor.
8Yooba wal kini tikamam mburan se kini.
Mi ni iwe kembei siiri mbolŋana pa king ta itunu iroogi mi iuri pa uraata na mi iuluuli. #Kam 15:2; Mbo 18:1, 27:1
9Yooba, kamke wal ku mi kampe zin. Pa zin na, koroŋ ku ŋonoono.
Motom pizin sipsip ku mi mboro zin ta buri, mi iseeŋge iseeŋge ma ila. #Mbo 23:1, 95:7
Currently Selected:
Mboe 28: mnaNT
Highlight
Copy
Compare
Share
Want to have your highlights saved across all your devices? Sign up or sign in
© 1996, Wycliffe Bible Translators, Inc. All rights reserved.
