RUM 13

Tekep lu' kivu sohoo' peritah

1Jian siget-siget usah kivu sohoo' kekat pengeja'au peritah, uban Allah ke' éh kejeraa' irah omok pengeja'au, kenat péh kekat irah éh kereja' lem kereja' peritah, uban Allah éh kejeraa' éh kenat, inah maneu' irah pu'un kenat. 2Uban néh kenat séé'-séé' éh ngelawan ngan ngelapah tong ha' peritah, inah irah ngelawan tong éh neu' Allah, ngan kelunan éh ngelawan kenat, adang réh teneng kenukum Tuhan neu' pengepalui réh tengéé'. 3Uban kelunan éh maneu' jian ngan éh teneng barék, bé' réh medai tong peritah réh, bang kelunan éh maneu' sa'at adang réh pu'un medai. Kineu', keloo' keh bé' medai tong peritah kei? Hun keh keloo', jian keh maneu' kekat éh jian boh pengeja'au keh pu'un mejing keh kepéh. 4Uban peritah nah kelunan éh sohoo' Allah, ngan pu'un iah pitah jalan ngan kereja' dokoo' keh omok murip jian. Bang hun keh maneu' sa'at, tekep keh medai uban iah pu'un penyukat ngukum keh. Uban peritah nah kelunan éh sohoo' Allah ngan hun iah merek ngan kelunan éh maneu' sa'at, inah iah pepoléng keleko ngan kemerek Tuhan tong kesa'at réh inah. 5Uban néh kenat tekep keh kivu sohoo' peritah nah, bé' makat uban keh medai kemerek Allah, bang uban kenin keh keloo' kivu éh kenat.

6Uban néh kenat jian ka'ah mena' sukai ngan réh, uban irah peritah hun réh kereja' mu'un ngan maneu' kekat éh jian, irah péh seleket kereja' ngan Allah. 7#Mat. 22:21, Mrk. 12:17, Luk. 20:25 Hun keh bé' jak sakui bayan sukai, jian keh bayan éh ngan sukup, kenat péh siget koléé' hun sukup tong tatek keh bayan éh kurah, jian keh bayan éh kivu sohoo' réh siget koléé' kepéh. Jian keh ngerera' ngan murung kekat réh béé.

Tebaraa' éh bara' tong pika

8Mai keh putang ineu'-ineu' jin kelunan, bang jian keh pika kekat kelunan. Uban séé'-séé' éh pika kelunan éh jah, pu'un iah kivu sohoo' lem Surat Musa. 9#Kel. 20:13-15, 17, Ula. 5:17-19, 21, Ima. 19:18 Uban kekat sohoo' lem Surat Musa inah, barei' ha' néh bara', Mai ke' nuyang, mai ke' mematai kelunan, mai ke' nekau, mai ke' magat ineu'-ineu' anah irah, kekat sohoo' inah ngan ineu'-ineu' éh jah kepéh, pu'un éh lem jah ha' inah éh bara', Tekep ke' murung padéé' ko' pekua' ke' murung usah ko' tengéé', ha' nah. 10La'ah séé'-séé' éh murung padéé' néh, bé' éh maneu' sa'at ngan néh. Hun néh kenat hun lu' jam murung réh kenat, boh lu' kivu kekat sohoo' lem Surat Musa.

11Jian keh seruh maneu' kekat barék éh jian, uban ka'ah jam tong sioo' éh pu'un hun iteu', inah éh uban lebéé' tenéh keh pu'un pegen awah, to'ot keh hun iteu'. Uban jaka' Tuhan juk purip lu' lepah danii' jin hun bu'un lu' ngelan rai. 12La'ah hun iteu' merem iteu' juk rema. Hun néh kenat mai lu' maneu' kekat penganeu' éh merem kepéh. Jian uleu' alaa' kekat kelevit ngan lajam lu' hun rema inah pu'un, dokoo' lu' ngelawan kekat éh jin merem. 13Tekep uleu' maneu' kekat barék éh teneng, pekua' éh tekep tong kelunan éh murip tong rema, mai maneu' inga' éh sa'at ngan mavuk, mai petuyang ngan maneu' barék éh sa'at, ngan mai punan ngan pana kenin. 14Bang jian keh alaa' Tuhan Yésus Kristus lajam keh mu'un. Ngan mai la'ah keh purip pengagat éh sa'at lem kenin keh pah avéé' keh kivu sohoo' néh.

Currently Selected:

RUM 13: PNT

Highlight

Copy