ÉH POLÉNG 16

Tong pigan tong Kemerek Allah

1La'ah nenéng ké' jah ha' éh ja'au pané jin Umaa' Allah ngan tujuu' meliket nah, ka' ha' Néh, Tai keh mujek kemerek Allah jin pigan inah tong tana', ha' néh. 2#Kel. 9:10 Tai meliket éh bu'un nah mujek kemerek nah tong tana' jin pigan inah. Irah éh pu'un telana' ka'an ngan éh seva' butun éh pekua' layan ka'an inah, irah tioo buteu' éh sa'at mu'un ngan sakit mu'un réh.

3Boh meliket éh keruwah nah mujek kemerek nah tong baa' banget jin pigan inah. Baa' inah paléu barei' dahaa' kelunan éh lepah matai, ngan kekat-kekat arong éh pu'un lem baa' banget nah matai béé.

4 # Kel. 7:17-21, Msm. 78:44 Boh meliket éh keteleu' nah mujek kemerek nah tong kekat baa' ngan usit baa' jin pigan inah, ngan baa' inah paléu dahaa'. 5La'ah nenéng ké' ha' meliket éh pu'un penyukat bau baa' bara', O Iah éh Ni'ai, éh pu'un hun iteu' ngan éh lepah pu'un tenéh, teneng Ke' maneu' kekat ukum kenat, 6pu'un réh mematai kelunan éh anah Allah ngan irah nabi, ngan hun iteu' pu'un Ke' mena' dahaa' ngan réh kepéh ke' réh mesep éh. Pu'un réh alaa' éh tekep ngan réh, ha' néh, 7La'ah akeu' menéng ha' jin jalan réh motong kemenyan pané, Tuhan, Allah éh ja'au penyukat! Ukum neu' Ko' inah teneng ngan pejek mu'un!

8La'ah meliket éh kepat nah mujek kemerek nah tong maten dau jin pigan inah, ngan pu'un kelunan sakit ngan lasoo' neu' kepana néh. 9Pu'un kelunan lasoo' neu' éh pana mu'un, ngan pu'un réh menoo' ngaran Allah éh pu'un penyukat maneu' kekat penusah inah. Bang bé' réh piso jin penyala' réh ngan ngerera' kenin réh ngan seva' Allah.

10 # Kel. 10:21 Boh meliket éh kelemah nah mujek kemerek nah tong nyun jalan ka'an inah mokoo' raja'. Tioo pu'un merem tong kekat tana' éh lem nihau ka'an inah, ngan pu'un réh menya' jela' réh uban pengeketa réh, 11pu'un réh menoo' Allah tong seruga uban kesakit ngan pengeketa réh. Bang bé' réh piso jin kesa'at réh.

12 # Yes. 11:15 Boh meliket éh kenem nah mujek kemerek nah tong baa' ja'au Eprat jin pigan inah. Tioo baa' inah mapeu' dokoo' maneu' jalan ngan irah raja' éh tuai jin tana' éh saa' usit maten dau. 13Boh akeu' na'at teleu' sahéé' éh sa'at éh barei' layan sa'ai musit jin ujun berungan, jin ujun ka'an inah, ngan jin ujun nabi éh ngelavo'. 14Sahéé' inah sahéé' éh sa'at éh maneu' kuraa'-kuraa' telana' éh ngebéé kenin kelunan. Teleu' sahéé inah tai tavin kekat raja' pah tipo tana', ngan pepemung réh ke' réh pekayau tong dau Allah éh ja'au penyukat ngelohoo' ukum Néh.

15 # Mat. 24:43-44, Luk. 12:39-40, Pol. 3:3 Menéng keh! Akeu' juk tuai barei' kelunan nekau! Murung kenin kelunan éh mavaa' ngan mihau pakai néh, ke' néh bé' lakau ugai ngan menyaa' ta'an kelunan pinaa'!

16 # 2 Raj. 23:29, Sak. 12:11 La'ah sahéé' inah mihin kekat raja' inah pemung tong jah retek éh lem ha' Ibrani ngaran néh Harmegedon.

17Boh meliket éh ketujuu' nah mujek kemerek nah tong sawang jin pigan inah. Tioo pu'un jah ha' éh ja'au jin nyun tong Umaa' Allah éh bara', Iteu' néh pengebéé néh, ha' néh. 18#Pol. 8:5, 11:13, 19 Tioo pu'un kela'ap ngan ha' ja'au ngan ha' lengedo ngan tegen tana' ja'au mu'un. Jin bu'un-bu'un kelunan pu'un tong tana', bé' pu'un tegen tana' pekua' tegen tana' inah. Tegen tana' inah pelapah sa'at jin kekat tegen tana' éh jah. 19#Yes. 51:17 Leboo' ja'au éh kenajung réh, pebila' teleu', ngan kekat leboo' ja'au tong siget tana' pu'un tasa' mu'un. Allah nesen Babel éh ja'au ngan maneu' éh mesep baa' agun jin sawan Néh, inah éh mesep kemerek Néh. 20#Pol. 6:14 Kekat tana' éh siik salai béé ngan kekat tokong bé' pu'un la'ah. 21#Kel. 9:23, Pol. 11:19 Pu'un taa' bateu' éh ja'au pelohoo' jin langit teneng tong kelunan. Kebahat jah tétéé' taa' inah avéé' jah pikun. Pu'un kelunan menoo' Allah uban taa' bateu' inah, uban néh sa'at mu'un.

Currently Selected:

ÉH POLÉNG 16: PNT

Highlight

Copy

Compare