MATIUS 28
28
Tong pengebetéé' Yésus
(Mrk. 16:1-10, Luk. 24:1-12, Yoh. 20:1-10)
1Tong dau migu teka rema, tai Meriam Magdalena ngan Meriam éh jah nah ke' roh na'at tanem Yésus nah. 2Beleka', ja'au tegen tana', jah meliket Tuhan tuai jin seruga ngan mega' bateu' jin ubaa' luvang tanem nah ngan iah menyun tong néh. 3Layan meliket nah barei' kela'ap ngan pakai néh mebéng mu'un barei' avun éh mebéng mu'un. 4Irah seradu éh mavaa' tanem nah riet réh medai, kuba' réh barei' kelunan matai.
5La'ah meliket nah pané ngan rawah redo inah, ka' ha' néh, Mai koh medai, kawah pitah Yésus éh penatai réh tong kayeu' salib rai, 6bang bé' éh pu'un siteu' hun iteu', betéé' tenéh éh, barei' ha' néh ngan keh lepah nah. Tuai koh na'at jalan réh modoo' patai néh rai. 7Rigah koh tai ngan irah bakéh néh ngan bara' ngan réh, Allah lepah pebetéé' éh jin patai néh, ngan hun iteu' pu'un éh lakau saa' tenah keh tai tana' Galilia, sinah keh omok temeu' ngan néh. Mai koh ngelepan ha' ké' nah da', ha' meliket nah ngan rawah redo inah.
8Biau mu'un rawah lakau, pu'un kemedai roh, bang ja'au mu'un kemurung roh, nekedeu' roh ke' roh bara' rengah inah ngan bakéh roh.
9Lem roh lakau nah, beleka', Yésus temeu' ngan roh, ka' ha' néh, Pawah kenin koh, ha' néh. Tai roh tavin éh ke' roh ngamit gem néh ngan seva' éh. 10Ha' Yésus ngan roh, Mai koh medai, jian koh tai nyohoo' kekat padéé' ké' tai tana' Galilia, sinah réh omok temeu' ngan ké' kepéh, ha' néh.
Tong irah kelunan éh mavaa' tanem Yésus
11La'ah tovoo' rawah redo inah lakau nah, jelua' irah seradu éh mavaa' tanem Yésus nah moléé' réh tai leboo' kepéh ke' réh bara' ngan irah pengeja'au imam tong kekat éh lepah pu'un nah. 12Irah pengeja'au imam nah tioo petipun ngan irah pengeja'au kelunan Yahudi ke' réh pitah jalan. Inah irah mena' rigit pinaa' ngan irah seradu nah ngan bara' ka' ngan réh, 13Tong Yésus nah jian keh bara' irah bakéh néh tuai sioo' merem lem keh pegen alaa' patai néh. 14Hun lakei' ja'au Gabenor jam ha' keh nah, omok mé' pané ngan néh ke' néh seruh éh pu'un kenat mu'un, mai keh medai, bé' iah ngukum keh, ha' réh.
15Irah seradu alaa' rigit inah ngan bara' kenat ngan séé'-séé' éh neteng réh. Avéé' dau iteu' péh kenat ha' irah Yahudi.
Tong Yésus pepoléng usah néh ngan irah bakéh néh
(Mrk. 16:14-18, Luk. 24:36-49, Yoh. 20:19-23, Peng. 1:6-8)
16 La'ah tai irah bakéh Yésus éh jah poloo' jah usah nah tong tokong tong tana' Galilia éh sohoo' Yésus ngan réh lepah nah. 17Hun réh na'at Yésus nah, pu'un réh seva' éh, bang jelua' réh kurang ngelan. 18Tuai Yésus déhéé' réh ke' néh bara' ka', Tamen Ké' pu'un mena' penyukat ngan Ké', kenat péh tong seruga, kenat péh tong tana' iteu'. 19 Jian keh tai tavin kekat arong kelunan pah tipo tana'. Ngan keh maneu' réh bakéh ké'. Jian keh ngebatis réh dalem ngaran Tamen ngan Anak ngan Sahéé' Ni'ai. 20Jian keh nebaraa' réh kivu kekat sohoo' Ké' ngan keh. Nesen keh, Adang Akeu' ngelayau pu'un ngan keh pah avéé' ga' tana' ha' Néh.
Currently Selected:
MATIUS 28: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia