YOHANES 6
6
Yésus pakan lemah ibu kelunan
(Mat. 14:13-21, Mrk. 6:30-44, Luk. 9:10-17)
1La'o Yésus pané kenat, tai éh papit baa' Banget Galilia, éh nateng jelua' kelunan baa' Banget Tiberias. 2Pinaa' kelunan kivu Éh uban réh lepah na'at telana' éh naneu' Néh tong Néh peka'o kelunan sakit. 3Lakau Yésus tai jah tokong mokoo' Éh ngan irah éh bakéh Néh. 4La'ah lepah danii' jaka' irah juk maneu' Dau Ja'au Paska. 5Ngejuwak Yésus na'at kelunan pinaa' nah tuai tavin Éh, boh Éh pané ngan Pilipus. Ka' ha' Néh, Semah tam melih ka'an ngan kelunan pinaa' iteu', ha' Néh. 6Yésus pané kenat ke' Néh silam Pilipus, éh mu'un néh kejam Yésus éh juk neu' Néh.
7Boh Pilipus mipa Éh, ka' ha' néh, Na' péh lu' melih penguman ngan réh duah ato rigit pirek, si'ik awah éh tong réh, bé' réh omok beso neu' néh, ha' néh.
8Boh jah bakéh Yésus éh ngaran néh Anderias, éh padéé' Simon Péterus, pané ngan Yésus, ka' ha' néh, 9Pu'un jah anak siteu' éh pu'un lemah roti ngan duah seluang, bang bé' éh sukup tong kelunan pinaa' iteu', ha' néh.
10Ka' ha' Yésus ngan irah bakéh Néh, Jian keteleu' nyohoo' réh menyun, ha' Néh. Pu'un ureu' pinaa' ngan jian sinah, sinah réh menyun, ngioo' pengekekat réh lemah ibu irah lakei' awah. 11Yésus alaa' roti inah ngan sebayang bara' jian kenin ngan Allah, la'o inah Iah petulat éh ngan irah éh menyun nah, kenat péh tong seluang inah, irah béé kuman éh avéé' réh beso. 12La'o réh kuman, boh Yésus pané ngan irah bakéh Néh, ka' ha' Néh, Tipun kekat la'an ka'an inah, mai keh bet éh awah, ha' Néh. 13Boh réh alaa' kekat la'an ka'an inah, jah poloo' duah gaweng penoo' neu' la'an ka'an kinan réh nah.
14Tovoo' irah na'at telana' naneu' Yésus ja'au mu'un kenat, boh réh bara' ka', Adang kelunan iteu' Iah éh Nabi éh pejajii' Tuhan tuai tong tana', ha' réh. 15Uban Yésus jam irah juk alaa' Éh ke' réh maneu' Éh raja' réh, lakau Éh kepéh tai jah tokong ke' Néh mokoo' tengéé' sitai.
Yésus lakau bau baa'
(Mat. 14:22-33, Mrk. 6:45-52)
16Tovoo' dau tahup la'o Yésus pakan kelunan pinaa' nah, irah bakéh Néh tuhun jin tokong nah ke' réh tai baa' banget. 17Boh réh jalan alut papit baa' banget inah ke' réh tai leboo' Kapernaum. Hun dau lepah merem bang Yésus to ke' bé' jak tai ngan réh. 18Boh pu'un kepu gahang ngan lipak ja'au 19ngan inah kepéh irah lepah memesai avéé' tong belu'an baa', juu' si'ik jin dirin baa' ri'. Boh réh na'at Yésus lakau bau baa' inah tai tavin alut réh. Medai réh na'at éh lakau bau baa' nah. 20Ka' ha' Yésus ngan réh, Mai keh medai, Akeu' itut, ha' Néh. 21Jian kenin réh, irah tioo alaa' Éh lem alut réh, tioo avéé' réh tong leboo' Kapernaum éh jalan réh juk tai nah.
Tong kelunan pinaa' pitah Yésus
22Barei' dau sagam kelunan pinaa' nah to pu'un apé iteu' baa' banget nah, boh réh na'at jah alut awah éh to sinah. Kejam réh Yésus bé' pu'un kivu bakéh Néh, bé' Éh tai lem alut réh, bang papit tengéé' réh. 23Pu'un alut kepéh sinah éh déhéé' tana' jalan kelunan pinaa' nah kuman hun Yésus sebayang bara' jian kenin ngan Allah rai, bang alut inah anah kelunan éh jah, éh tuai jin leboo' Tiberias. 24Hun irah pinaa' nah jam Yésus bé' pu'un sinah, ngan irah bakéh Néh bé' pu'un sinah, boh réh alaa' alut éh pu'un sinah tai leboo' Kapernaum ke' réh pitah Yésus sitai.
Tong Yésus ka'an éh purip kelunan
25Hun réh avéé' saa' dipa baa' inah, sinah réh temeu' ngan Yésus, ka' ha' réh ngan Néh, O Guru, hun mah Ke' avéé', ha' réh.
26Ha' Yésus ngan réh, Akeu' pané ngan keh, bé' keh tuai pitah Akeu' uban keh na'at kekat telana' éh naneu' Ké' éh ja'au nah rai, bang pu'un keh tuai uban keh kuman ka'an éh nena' Ké' ngan keh pah avéé' keh beso rai awah éh. 27Mai keh kereja' pitah ka'an éh omok bangah awah, bang jian keh kereja' pitah ka'an éh omok pelinguh. Omok Anak Kelunan mena' ka'an inah ngan keh, uban Allah éh Tamen Ké', pu'un Éh mena' penyukat Néh ngan Ké', ke' Ké' omok mena' ka'an inah ngan keh, ha' Néh.
28Boh réh neteng Yésus kepéh ka', Ineu' éh tekep ke' mé' maneu' dokoo' mé' maneu' pengeloo' Allah, ha' réh.
29Ka' ha' Yésus ngan réh, Inah éh pengeloo' Allah, jian keh ngelan tong Iah éh tuai sohoo' Allah, ha' Néh.
30Ka' ha' réh kepéh, Ineu' éh juk neu' Ko' ja'au dokoo' Ko' pekelenaa' ngan mé' Ka'au pu'un tuai jin Allah mu'un, ke' mé' omok ngelan tong Ke'. Maneu' ineu' Ke' da'? 31 Tepun mé' kuman mana hun réh pu'un tong tana' pegawa sahau, pekua' ha' lem surat Allah éh bara' éh, Pu'un Allah mena' ka'an jin seruga ngan réh, ha' surat Allah nah.
32Ha' Yésus ngan réh kepéh, Akeu' bara' mu'un ngan keh, ka'an éh nena' Musa ngan keh rai, bé' éh jin seruga, bang Tamen Ké' omok mena' atek ka'an mu'un jin seruga ngan keh. 33Éh atek ka'an mu'un éh juk nena' Allah ngan keh, inah éh, Iah éh pu'un tuai jin seruga ke' Néh purip kekat kelunan tong tana', ha' Néh.
34Ka' ha' réh kepéh, O Guru, jian Ke' ngelayau mena' ka'an inah ngan améé', ha' réh.
35Ka' ha' Yésus ngan réh kepéh, Akeu' iteu' ka'an éh purip kelunan, séé'-séé' éh tuai tavin Akeu', bé' éh jam la'au' kepéh, ngan séé'-séé' éh ngelan tong Akeu', bé' éh jam mapeu' batok kepéh, ha' Néh.
36Ka' ha' Yésus kepéh, Akeu' bara' ngan keh rai, Pu'un keh lepah na'at Akeu' bang bé' keh ngelan tong Akeu'. 37Siget kelunan éh nena' Tamen Ké' ngan Ké', adang néh pu'un tuai tavin Akeu', ngan séé'-séé' éh tuai tavin Akeu', bé' Akeu' bet éh. 38Bé' Akeu' tuai jin seruga dokoo' Ké' kivu kenin Ké' tengéé', bang Akeu' tuai dokoo' Ké' kivu sohoo' Iah éh nyohoo' Akeu' tuai rai. 39Inah éh pengeloo' Iah éh nyohoo' Akeu' tuai rai, dokoo' kekat irah éh nena' Néh ngan Ké', mai pu'un jah usah péh tawang awah, bang tekep Akeu' pebetéé' réh ngan purip kekat réh béé sioo' ga' dau vam. 40Uban iteu' éh pengeloo' Tamen Ké', kekat kelunan éh seruh mu'un tong Akeu' éh Anak Néh ngan éh ngelan tong Akeu', tekep éh alaa' urip pelinguh, ngan avéé' tong ga' dau vam, inah Akeu' pebetéé' réh ngan purip réh kepéh, ha' Yésus ngan réh.
41La'ah irah Yahudi selem-selem pané maneu' Yésus neu' ha' Néh bara' ka', Akeu' iteu' ka'an éh tuai jin seruga. 42Ha' réh kepéh, Kelunan iteu' Yésus ngaran Néh éh anak Yusup rai. Malai lu' ngan tinen tamen Néh, kineu' Iah bara' Iah tuai jin seruga, ha' réh.
43Ka' ha' Yésus ngan réh kepéh, Kineu' ka'ah selem-selem pané kenat, 44bé' pu'un séé'-séé' omok tuai tavin Akeu' hun Tamen Ké' éh nyohoo' Akeu' tuai rai bé' ngusii' kenin néh, ngan Akeu' omok pebetéé' ngan purip éh sioo' ga' dau vam. 45 Irah nabi pu'un réh nyurat bara', Kekat kelunan adang Allah juk nebaraa' réh. Siget kelunan éh menéng ha' Tamen Ké' ngan éh nesen tong tebaraa' Néh, pu'un éh tuai tavin Akeu'. 46Mai keh seruh neu' ha' Ké' kenat pu'un kelunan éh jah lepah na'at Tamen Ké', bé' éh pu'un kenat. Iah éh tuai jin Allah, Iah awah éh pu'un na'at Tamen Ké', ha' Yésus nah.
47Ka' ha' Yésus kepéh, Akeu' bara' mu'un ngan keh, kelunan éh ngelan, inah éh pu'un urip pelinguh. 48Akeu' iteu' ka'an éh purip kelunan. 49Tepun keh kuman mana tong tana' pegawa sahau, bang matai réh. 50Ka'an éh tuai jin seruga, tengéé' mu'un éh, séé'-séé' éh kuman éh bé' éh omok matai. 51Akeu' iteu' ka'an éh purip kelunan, éh tuai jin seruga, séé'-séé' éh kuman ka'an iteu' omok éh murip pelinguh. La'ah ka'an éh juk nena' Ké' ngan néh, inah éh usah Ké', éh juk nena' Ké' dokoo' Ké' purip kekat kelunan pah tipo tana', ha' Yésus ngan réh.
52Pesakat irah Yahudi neu' ha' Yésus pané kenat. Ka' ha' réh, Kineu' éh omok mena' usah Néh ngan lu' kelu' kon éh da', ha' réh.
53Ka' ha' Yésus kepéh, Akeu' bara' mu'un ngan keh, hun keh bé' kuman usah Ké', ngan mesep dahaa' Ké', bé' keh pu'un urip mu'un dalem keh. 54Séé'-séé' éh kuman usah Ké' ngan mesep dahaa' Ké', iah pu'un urip pelinguh. La'ah Akeu' pebetéé' ngan purip éh kepéh sioo' ga' dau vam. 55Uban usah Ké' iteu', inah éh atek ka'an mu'un, ngan dahaa' Ké' iteu', atek baa' éh nesep mu'un. 56Séé'-séé' éh pu'un kuman usah Ké' ngan éh mesep dahaa' Ké', Akeu' pu'un petem dalem néh ngan iah péh pu'un petem dalem Akeu'. 57Tamen Ké' éh pu'un urip, Iah éh nyohoo' Akeu' tuai, ngan naneu' Tamen Ké' nah, inah Akeu' murip. Kenat péh séé'-séé' éh kuman usah Ké', omok éh murip neu' Ké' kepéh. 58Kenat péh iteu' éh atek ka'an mu'un éh tuai jin seruga, bé' éh barei' ka'an éh kinan tepun keh sahau rai, la'ah matai réh. Kelunan éh kuman ka'an iteu' omok éh murip pelinguh, ha' Yésus nah.
59Kenat ha' Yésus pané ngan réh tovoo' Néh nebaraa' réh tong lamin sebayang irah Yahudi tong leboo' Kapernaum rai.
Ha' tebaraa' éh omok purip kelunan
60Pinaa' kelunan jin belah irah éh kivu Éh, hun réh menéng ha' Yésus pané kenat, boh réh bara' ka', Leko lah mé' menéng ha' Néh pané kenat ne', séé' keloo' menéng ha' Néh kepéh, ha' réh.
61Bé' pu'un séé'-séé' bara' ha' réh kenat ngan Yésus, Iah tengéé' ke' jam irah pinaa' nah pu'un selem-selem pané kenat, boh Éh bara' ka' ngan réh, Kineu' keh, tawang keh tong ha' Ké' kenat? 62Hun néh kenat kineu' hun keh na'at Ku' moléé' tong jalan Ké' bu'un. 63Sahéé' Ni'ai awah omok purip kelunan, usah kelunan bé' éh omok kenat, kekat ha' éh benara' Ké' ngan keh, inah éh jin Sahéé' Ni'ai ngan omok Éh purip kelunan. 64Bang na' péh kenat, pu'un jelua' keh bé' ngelan, ha' Néh. Uban jin bu'un Yésus tuai, kejam Néh irah éh bé' keloo' ngelan, ngan kejam Néh séé' éh juk memalo Éh. 65Ka' ha' Yésus kepéh, Kenat ha' Ké' ngan keh ri', Jah-jah usah péh bé' éh omok tuai tavin Akeu' hun Tamen Ké' bé' ngusii' kenin néh, ha' Néh.
66Neu' ha' Yésus pané kenat, pinaa' kelunan moléé' murin jin pengelan réh. Bé' réh kivu Éh kepéh. 67Boh Yésus pané ngan irah bakéh Néh éh jah poloo' duah usah nah, ka' ha' néh, Kineu' keteleu' bakéh Ké' iteu', avéé' keteleu' moléé' murin kivu irah pinaa' nah, ha' néh.
68Ka' ha' Simon Péterus mipa Éh, O Tuhan, séé' ke' mé' omok tavin la'ah da', Ka'au awah Éh pu'un ha' tebaraa' éh omok purip kelunan ke' réh omok murip pelinguh. 69 Ngan améé' jam ngan améé' ngelan, adang Ka'au Anak Allah, ha' Péterus.
70Ka' ha' Yésus ngan réh kepéh, Pu'un Akeu' ngevéléé' jah poloo' duah usah iteu', bang pu'un jah usah jin belah ka'ah éh pu'un lem kamit Sitan, ha' Néh. 71Inah Éh bara' tong Yudas anak Simon Iskariot, na' péh Yudas nah jah bakéh Néh mu'un, pu'un éh memalo Yésus.
Currently Selected:
YOHANES 6: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia