YOHANES 16
16
1La'ah ka' ha' Yésus kepéh, Pu'un Ku' bara' kenat ngan keh, dokoo' keh bé' putui pengelan. 2Pu'un réh juk meta' keh masek tong lamin sebayang ngan pu'un sioo' kepéh pu'un réh mematai keh. Lem kenin réh hun réh maneu' kenat, irah seruh réh kivu pengeloo' Tuhan. 3Pu'un réh maneu' kenat uban réh bé' jam Akeu' ngan bé' jam Tamen Ké' kepéh. 4Bang pu'un Ku' bara' kenat ngan keh hun iteu', dokoo' hun penusah inah pu'un, ka'ah omok nesen Akeu' lepah bara' éh ngan keh tenéh, ha' Néh.
Tong kereja' Sahéé' Ni'ai
Ka' ha' Yésus kepéh, Hun lepah rai bé' Ku' pu'un bara' kenat ngan keh uban Ké' pu'un keto ngan keh. 5Bang hun iteu' Akeu' juk moléé' tai Iah éh nyohoo' Akeu' tuai, ngan bé' keh pu'un neteng Akeu' tong Ké' juk tai nah. 6Bang uban Ké' bara' Ku' juk piso jin keh, besau kenin keh. 7Bang Akeu' bara' mu'un ngan keh, pelapah jian hun Ké' tai kenat, uban hun Ké' bé' tai, bé' Penolong inah omok tuai ngan keh. Bang hun Ké' tai boh Ku' nyohoo' Éh tuai ngan keh. 8Hun Néh pu'un tuai omok Éh bara' kekat seneruh kelunan tong tana' iteu' tong penyala', sala' awah éh, ngan omok Éh bara' tong kekat éh teneng ngan tong kenukum Allah ngan réh kepéh. 9Sala' mu'un kekat penyeruh réh tong penyala' uban réh bé' ngelan tong Akeu'. 10Kenat péh sala' kekat penyeruh réh tong kekat éh teneng uban Ké' moléé' ngan Tamen Ké' ngan bé' keh omok na'at Ku' kepéh. 11Pu'un éh juk bara' tong kenukum Allah ngan réh uban pengoloo' tana' iteu' kenukum Néh tenéh, ha' Néh.
12Ka' ha' Yésus kepéh, Pinaa' ha' kepéh éh juk benara' Ké' ngan keh, bang bé' keh omok ngeretep menéng éh jak. 13Hun Sahéé' éh pepoléng kekat éh teneng tong Allah pu'un tuai, Iah omok mihin keh tong kekat éh teneng. Bé' Éh pané kivu kenin Néh tengéé', bang kekat éh nenéng Néh, inah ke' éh benara' Néh kepéh, ngan Iah juk bara' kepéh tong kekat éh juk avéé' vam. 14La'ah pu'un Éh ngajung Akeu', uban kekat éh juk benara' Ké' ngan keh, pu'un Éh alaa' éh jin Akeu' ke' Néh bara' éh ngan keh kepéh. 15Kekat éh anah Tamen Ké', anah Ké' ke' éh, kenat péh ha' Ké' bara' Sahéé' pu'un alaa' éh jin Akeu' ke' Néh bara' éh ngan keh kepéh, ha' Néh.
Tong besau kenin ngan murung kenin
16Ka' ha' Yésus kepéh, Bé' lebéé' la'ah bé' keh omok na'at Akeu', ngan bé' lebéé' kepéh la'o inah, boh keh omok na'at Ku' kepéh, ha' Néh.
17Ka' ha' irah jelua' bakéh Néh éh jah, 18Ineu' sin tong ha' Néh kenat, bé' lebéé' kepéh la'o inah, boh keh omok na'at Akeu' kepéh, ngan pu'un ha' Néh kepéh, pu'un éh kenat uban Ké' juk moléé' ngan Tamen Ké. Ineu' sin tong ha' Néh, bé' lebéé' kepéh, bé' améé' nesen ha' Néh kenat.
19Kejam Yésus irah juk neteng Éh, inah Iah bara' ngan réh, ka' ha' Néh, Pu'un keh pané belah ka'ah ke' tong ha' Ké' bara', bé' lebéé' la'ah bé' keh omok na'at Akeu', ngan bé' lebéé' kepéh la'o inah boh keh omok na'at Akeu', kenat éh nané keh ri'? 20Akeu' bara' mu'un ngan keh, pu'un keh juk mangaa' mu'un ngan besau kenin, bang kelunan tong tana' iteu' murung kenin réh. Ka'ah pu'un tusah kenin, bang penusah kenin keh inah juk paléu kemurung keh kepéh. 21Hun redo sakit nganak, besau kenin néh uban néh keta sakit, bang hun anak néh pu'un, bé' éh seruh tong kesakit néh kepéh, murung kenin néh uban anak néh pu'un. 22Kenat péh ka'ah, hun iteu' besau kenin keh, bang Akeu' juk tuai ngan keh kepéh la', boh keh murung mu'un ngan kemurung éh kenat, bé' kelunan éh jah omok alaa' éh jin keh kepéh.
23Tovoo' dau inah bé' makat keh juk menyat ineu'-ineu' jin Akeu' kepéh. Akeu' bara' mu'un ngan keh, ineu'-ineu' keh menyat jin Tamen Ké' dalem ngaran Ké', omok éh mena' éh ngan keh kepéh. 24Bé' jak keh pu'un menyat ineu'-ineu' dalem ngaran Ké', jian keh menyat éh, boh keh omok alaa' éh, boh kemurung keh pu'un sukup mu'un, ha' Néh.
Yésus bara' Iah lepah ngalah tana' iteu'
25La'ah ka' ha' Yésus kepéh, Pu'un Akeu' pané ngan keh lem ha' tapan awah rai, bang la'o iteu' kepéh, bé' Ku' pané lem ha' tapan kepéh, bang Akeu' juk pané petek awah bara' Tamen Ké' ngan keh. 26Tovoo' dau inah, ka'ah ke' juk menyat jin Néh dalem ngaran Ké', ngan bé' éh Akeu' éh menyat jin Iah ngan keh makat, 27uban Tamen Ké' péh murung keh. Pu'un Éh murung keh uban keh murung Akeu', ngan pu'un keh ngelan Akeu' pu'un tuai jin Allah. 28Pu'un Akeu' tuai jin Tamen Ké' avéé' tong tana' iteu' ngan hun iteu' Akeu' juk piso jin tana' iteu' kepéh moléé' ngan Tamen Ké', ha' Néh.
29Boh irah bakéh Yésus bara' ngan Néh kepéh, ka' ha' réh, petek mu'un ha' Ko' hun iteu', bé' Ke' pané lem ha' tapan kepéh, ha' réh. 30Hun iteu' kejam mé' Ka'au jam tong kekat ineu'-ineu' péh ngan bé' Ke' tusah neteng ineu'-ineu' kepéh. Neu' ha' Ko' kenat, pu'un améé' omok ngelan Ka'au pu'un tuai jin Allah mu'un, ha' réh.
31Ka' ha' Yésus mipa éh, kineu, kenelan keh éh hun iteu'? 32Pu'un jah jaka' kepéh, éh mu'un néh lepah avéé', hun kekat ka'ah purat béé-béé moléé' tai lamin keh tengéé' ngan bet Akeu' awah, bang bé' Akeu' mokoo' tengéé' uban Tamen Ké' pu'un ngan Ké'. 33Pu'un Akeu' bara' kenat ngan keh dokoo' keh omok pawah kenin dalem Akeu'. Kelebéé' keh pu'un tong tana' adang keh pu'un tusah, bang jian keh reken kenin, Akeu' éh lepah nyopéé' kekat éh tong tana' iteu', ha' Néh.
Currently Selected:
YOHANES 16: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia